O Grupo Municipal do PSdeG-PSOE recórdalle ao Alcalde de Vilagarcía que xa hai solicitados polo anterior goberno máis de millón e medio de euros para a prevención de inundacións no entorno do Río Matosinhos
O Acordo, a proposta da ex Concelleira de Xestión do Territorio, Tania García, foi tomado en Xunta de Portavoces estando presente o Sr. Fole, en febreiro deste mesmo ano
Vilagarcía de Arousa, 15 de xuño de 2011.- O Grupo Municipal do PsdeG-PSOE de Vilagarcía, ao fío das declaracións feitas polo Alcalde de Vilagarcia sobre o investimento dos fondos de Luz Salgada na prevención das inundacións en Matosinhos, quere recordarlle ao Sr. Fole que en xuntanza de todos os portavoces dos distintos grupos da anterior corporación municipal celebrada en febreiro deste ano, na que el mesmo estaba presente, acordouse, a proposta da ex Concelleira de Xestión do Territorio, Tania García, solicitar 1.633.710€ ao Programa Operativo Rexional de Galicia de axudas FEDER para o proxecto “Nova canalización do regueiro de Santa Mariña no entorno da rúa Matosinhos”.
Esta solicitude, aprobada en Xunta Local de Goberno de 01 de marzo de 2011 e feita pública a través dos medios de comunicación e nas propias actas da Xunta de Goberno, presentouse a través da Deputación de Pontevedra o pasado 03 de marzo de 2011, dando así cumprimento ao Acordo plenario do pasado outono para previr as inundacións no entorno de Matosinhos.
Asimesmo, a ex Concelleira e portavoz do Grupo Municipal Socialista, Tania García, recórdalle ao Goberno Local que está tamén pendente de resolución por parte da Deputación de Pontevedra, unha subvención de 114.000€ solicitada tamén polo anterior goberno para a mellora dos sistemas de bombeo do Río do Con co obxectivo de eliminar as verteduras que habitualmente se producen no entorno do Río de Santa Mariña.
