O candidato socialista non comprende decisións como a de onte de rexeitar o
debate sobre unha moción sobre a atención aos enfermos de hepatite C
Varela pregúntase cal é o motivo da urxente renovación do convenio coa
empresa concesionaria da limpeza
Vilagarcía de Arousa, 24 de
febreiro de 2015.- O
candidato socialista á Alcaldía de Vilagarcía, Alberto Varela, asistiu onte ao
Pleno Municipal como leva facendo dende hai tempo e valorou as situacións que
se producen neste debate, considerando que a actitude do goberno local é
“lamentable”. Varela afirmou que “non pode ser que un Alcalde promova
confrontacións, teña actitudes retadoras e pretenda solventar as situacións a
base de imposicións ou decisións salomónicas. Na política necesitamos máis
tranquilidade e menos agresividade”.
O alcaldable do PSdeG puxo como exemplo da situación “esperpéntica” o
debate sobre a moción acerca do tratamento médico aos enfermos de hepatite C.
Houbo dous grupos municipais que solicitaron debatir mocións sobre o tema,
PSdeG e BNG, que o alcalde rexeitou, e houbo unha petición de urxencia, coa
presencia no pleno dos representantes dos afectados. Con esta situación, Varela
afirma sentirse “indignado” cando escoita “media hora de discurso
autoxustificativo para motivar que non se debata un tema deste calado que
afecta a veciños e veciñas de Vilagarcía, que estaban aí presentes, que teñen
un problema grave cuxa solución ten que vir das decisións políticas”. “En menos
tempo que o Alcalde adica a repetir tres ou catro veces as cousas para terminar
por non dicir nada, o Pleno de Vilagarcía podía ter aprobado una declaración de
apoio, que era case o único que os afectados solicitaban”, explicou Alberto
Varela.
Varela tamén quixo valorar a decisión do goberno municipal de prorrogar a
concesión á empresa encargada do servizo de limpeza de Vilagarcía, e afirmou
que “ao igual que expuxo estes días a nosa voceira municipal, eu tamén me
pregunto por que o Alcalde acelerou este proceso cando o contrato remataba en
xullo. A lóxica indica que sería unha nova corporación a que tivera que debater
esto, e un novo goberno municipal o que teña que deseñar a prórroga ou nova
concesión. Fole ven de hipotecar as decisións sobre a limpeza de Vilagarcía por
3 anos”. Ademáis das dúbidas sobre as motivacións para unha decisión de tanto
calado, os socialistas amosaron a súa preocupación polo que pode supor para os
traballadores, apuntando que “esperamos que esta prórroga non supoña
precarización da situación laboral dos traballadores, ou condicións leoninas
que teñan como fin último traballar explotadamente os tres meses que quedan
para as eleccións para que Fole poida utilizar o seu esforzo de maneira
electoralista”.
