Varela destacou a necesidade de apostar por un sector capaz
de aportar valor engadido a oferta turística de Vilagarcía
O candidato cualifica de “nefasta” a xestión de Fole en
materia de patrimonio cultural, con varios dos máis importantes xacementos de
Vilagarcía en serio perigo de desaparición
Vilagarcía de Arousa, 21 de marzo de 2015.- Alberto Varela, candidato do PSOE á Alcaldía de Vilagarcía,
considera prioritario o desenvolvemento dunha política de protección,
conservación e difusión do patrimonio cultural que reverta o actual estado de
deterioro da meirande parte dos bens patrimoniais de Vilagarcía. “A lexislatura
que está a piques de finalizar representa un claro retroceso en materia de
conservación do patrimonio arqueolóxico de Vilagarcía”, sinalou Alberto Varela,
quen advirte do serio risco que corren xacementos emblemáticos de Vilagarcía
como os petróglifos de Os Ballotes, en Bamio. O candidato socialista visitou no
día de onte este xacemento en compañía de membros da súa candidatura e do
arqueólogo vilagarcián, Félix González, destacou que “os petróglifos de Os
Ballotes presentan un estado de evidente de abandono que fai inapreciables os
seus gravados, único a nivel de toda Galicia”. Neste sentido recalcou que “é
unha mágoa que un xacemento de tan fácil acceso e sobre o que cada verán se
realiza unha actividade de difusión patrimonial a que acoden moitos veciños, sexa
totalmente ignorado polas autoridades municipais”. Alberto Varela tamén tivo
palabras para os petróglifos de Xiabre “situados nun entorno privilexiado e que
permanecen no esquecemento pola nula xestión en materia patrimonial do Sr.
Fole”, remarcando que “as actuacións para a adecuación de este tipo de sitios
non supoñen un elevado custe económico, senón simple vontade política, a
principal carencia do Sr. Fole ao longo deste catro anos”.
Varela considerou
inexplicable que a Diputación rexeitase un proxecto para a limpeza e posta en
valor de Os Ballotes, mentres que gasta millóns de euros en escavacións de
xacementos que non se atopan nun estado de conservación tan delicado como este.
Neste sentido tamén subliñou a “incapacidade de Tomás Fole á hora de conseguir
que a Diputación actuase sobre o Castro Alobre mentres se gastaba millóns en
outros xacementos da comarca como A Lanzada en Sanxenxo, Monte de Castro en
Ribadumia ou Igrexa Vella en Valga”.
Propostas para a revalorización do patrimonio cultural
vilagarcián
Alberto Varela amosouse
convencido de que “o patrimonio cultural pode xogar un papel moi importante á
hora de actuar como atractivo turístico, contribuíndo á dinamización da
economía de Vilagarcía e a consecuente xeración de emprego”. Segundo o
candidato, “os pasos a dar comezan coa revisión do catálogo de bens a conservar
do Concello, que culminaría coa elaboración dunha guía do patrimonio cultural
de Vilagarcía que permita aos cidadáns e aos turistas a posibilidade dun
achegamento aos principais bens patrimoniais do municipio, acompañado da
limpeza e acondicionamento deses lugares”. Neste sentido, Alberto Varela avogou
pola “ampliación das rutas de sendeirismo de Xiabre integrando espazos a
revalorizar como os petróglifos de Fontefría ou o túmulo de Pinar do Rei,
dotando de contido cultural eses percorridos”. Tamén propuxo o fortalecemento
de rutas como a dos pazos, que “precisa un esforzo de difusión máis importante
para acercala aos cidadáns”; ou a creación de outras novas como as das igrexas,
destacando o rico patrimonio arquitectónico relixioso co que conta Vilagarcía e
que a día de hoxe “atópase totalmente infravalorado e infrautilizado”. “As
igrexas románicas de Vilaxoán e Fontecarmoa son dous exemplos”, concluíu
Varela.
En materia de
protección do patrimonio, consciente de que a difusión do patrimonio é
fundamental para que os cidadáns o valoren e polo tanto o protexan, Varela
apostou por “unha campaña de educación patrimonial nos diferentes centros
educativos do Concello, que teña como obxectivo que os rapaces sexan conscientes
do valor e da importancia de protexer e conservar o noso patrimonio”,
convencido de que “a educación e concienciación cidadán son as ferramentas máis
eficaces para converternos nunha sociedade respectuosa cos elementos
patrimoniais que son propiedade de todos os veciños”.
