Os socialistas de Vilagarcía consideran que a bandeira vermella da praia Concha-Compostela é o símbolo da incapacidade de xestión dos areais por parte do Alcalde Tomás Fole

Lémbranlle ao rexedor que pasou toda o seu tempo na oposición bramando sobre a praia e facendo moreas de promesas que agora desapareceron

Apuntan que o único investimento real propio deste Goberno Local foron máis de 60.000€ en hinchables

Vilagarcía de Arousa, 31 de xullo de 2013.- O Partido Socialista de Vilagarcía, a través da súa voceira municipal Tania García, colocou hoxe á bandeira vermella da praia Concha-Compostela como o símbolo da capacidade de xestión do Alcalde e o Goberno Local en materia de praias. A socialista considera que a situación deixa en evidencia ao equipo de goberno, e pide que se aclare que teñen feito os responsables directos sobre a situación para tentar de evitala.

Nesta liña, adianta García que “os vertidos sobre a praia é unha problemática sobre a que dende o Partido Socialista vimos alertando hai moito tempo, e apuntamos dende sempre que merecen unha actuación real e eficaz”. Por el contrario diso, García queixouse de que “o conselleiro Agustín Hernández a través do Plan de Saneamento Integral das Rías, prometeu de todo, por prometer que non falte, e Fole fíxose fotos de todas as posturas e en todos os lugares posibles da praia, pero ao final xa vemos a intervención real: cero”, e apunta que “Fole converteuse nun alumno aventaxado do PP na técnica do prometer e prometer para logo non facer, como aplicou Marta Rodríguez co Hospital do Salnés e como Rajoy está a facer en España”.

Para Tania García o problema dos vertidos necesita dun plantexamento serio, e que non pode ser tratado a golpe de impulso ou poñendo parches. Unha das medidas que se iniciaron na anterior lexislatura foi a da canalización do río Tripera, que permitiría ademáis intervir sobre un dos principais puntos de vertidos. Esta actuación quedou aparcada coa chegada de Fole ao Goberno de Vilagarcía, e García lembra que “houbo moitos recordatorios por parte do noso partido, apuntando á importancia desa intervención. Incluso presentamos no Pleno Municipal unha moción instando á execución das obras no inverno pasado. O Goberno Local votou a favor, e estamos en agosto e aí están as obras”. “Este Goberno é un desastre”, sentenciou García.

A modo de exemplo resumo de todo o anterior, a voceira socialista deixou para a reflexión que “o único investimento en dous anos de Goberno Fole sobre a praia Concha-Compostela foron aproximadamente 60.000€ e estaban destinados a colocar hinchables durante uns breves días no verán”. 

O Consello Portuario debatirá mañá a renovación da concesión para a nave de Moral, sobre a que os socialistas instan ao Alcalde a cumprir o acordo plenario de facilitar a desembocadura do río do Con a ceo aberto

O PSdeG de Vilagarcía lembra que hai meses presentou unha moción ao Pleno Municipal, aprobada por unanimidade, que propoñía traballar para a liberación da desembocadura

Os socialistas apuntan a que “o momento de facer as cousas ben é este”, dado que a proposta de renovación é por 10 anos

Vilagarcía de Arousa, 30 de xullo de 2013.- O Consello Portuario que se celebrará mañá mércores 31 pola tarde debatirá, entre outros asuntos, a renovación da concesión da nave comercial que se ubica ao final do cauce do río do Con. Os socialistas veñen dende hai moito tempo apuntando que a liberación do río do Con para que desemboque a ceo aberto sería un avance grande, tanto nas medidas a tomar para paliar e evitar as continuas inundacións que se provocan polo desborde do río como no aspecto e impacto paisaxístico e urbanístico da fachada marítima.

Por estas razóns, os socialistas presentaron unha moción ao Pleno Municipal no mesmo sentido que xa fixeron propostas nos últimos anos, na que se instaba ao Goberno Local a facilitar esta desembocadura a ceo aberto e lembran que daquela a moción foi aprobada por unanimidade, obviamente incluídos os membros do Bipartito Local ao completo. O maior problema para esta intervención está na nave comercial que se ubica no punto final do cauce, que limita esa posible apertura da desembocadura e obriga ao río a chegar ao mar por unha canalización que se volve pequena cando hai chuvias que coinciden coa preamar. Neste momento no que se vai debatir a renovación desta concesión os socialistas consideran que é o momento de actuar.

Valoran dende o PSdeG que existe agora a posibilidade de dar un paso enorme na mellora da fachada marítima e de contribuír enormemente a aminorar un problema para Vilagarcía como son as inundacións. Gracias a esta decisión se axudaría, ademáis, a rexeitar as intencións que vén manifestando a Xunta de intervir sobre a ponte histórica de Vista Alegre, incluso para derruíla, e que os socialistas consideran que son “inaceptables”. Para elo fai falta, como sinalaba hoxe Lino Mouriño, representante socialista no Consello Portuario, “dar xa os pasos necesarios para trasladar a nave que agora está ao final do cauce”.

Este proceso, segundo os membros do PSdeG debería facerse xa mesmo mediante a concesión doutro espazo distinto en terreos portuarios, sobre o que apuntaba Mouriño que “hai moi pouquiño, apenas unhas semanas, aínda había una parcela libre a moi poucos metros de alí. O desbaraxuste, e outras cousas máis escuras que xa todos sabemos, lévanos a que agora non poidamos utilizar ese espazo para unha cuestión de moita importancia para o Porto e para toda Vilagarcía”. Pero para facilitar a tarefa ao Concello, os socialistas apuntan tamén outra proposta, indicando que “se o Porto asume que non ten agora mesmo un espazo propicio, e o Concello non é quen de contribuír a unha solución, aínda queda a opción de facer a renovación da concesión actual en precario de forma que teña que ser renovada cada ano a expensas de que no momento en que xurda unha oportunidade se inicien os trámites para trasladar a nave actual”. Creen dende o PSdeG que estas propostas, ou ben trasladar a nave agora mesmo ou renovar en precario a expensas de que xurda unha oportunidade, “facilita a continuación do negocio, contribúe á mellora de Vilagarcía e a súa ordeación urbanística e medioambiental, e ademáis aporta un grado importante de coherencia á xestión política pois daríase cumplimento a un acordo plenario”.

Sobre este último punto sinalado, o representante socialista e concelleiro Lino Mouriño quixo apuntar que “aos socialistas de Vilagarcía non nos importa que o Goberno Local absorba as ideas que lle plantexamos votando nos Plenos a favor do que nós presentamos. Ao contrario, estamos tan convencidos de que as propostas son boas que o que queremos é que nos fagan caso, e será que non o facemos mal cando somos o grupo político que máis mocións saca adiante por unanimidade. Esperamos que agora que o Alcalde ten a oportunidade de traballar por poñer en marcha unha das ideas sobre as que votou a favor, non incurra na absoluta incoherencia de non facelo”. 

Os socialistas de Vilagarcía piden ao Alcalde que atenda ás suxerencias dos hosteleiros de non programar o Combate Naval para o día 17 de agosto

Dende o PSdeG apuntan que “da a sensación de que o Alcalde abandoa á súa sorte aos sectores sobre os que máis inciden as festas”

A formación socialista critica que esta situación se de “a tres semanas vista, cando non temos aínda ningunha programación oficial que impide actuar con previsión”

Vilagarcía de Arousa, 27 de xullo de 2013.- O Partido Socialista de Vilagarcía súmase á petición que os hosteleiros van trasladar ao Alcalde nestes próximos días de que retrase a celebración do Combate Naval máis alá do día 17 de agosto no que está agora previsto. Na formación socialista creen que fixar ese día para o Combate conlevaría moitas situacións negativas, principalmente a concentración excesiva dos eventos principais que derivaría nunha perda de actividade dos sectores que se benefician maiormente das festas locais de San Roque. Como apuntou Tania García “sempre se plantexou dende o Concello, dende hai moitísimos anos, a intención de xerar eventos e actividades que puideran extender as datas de festas. Todo o mundo entendeu sempre que ampriar o abanico de días era positivo pois repercutía en maior dinamización económica, e maior visibilidade de Vilagarcía e dos negocios que a integran”. Nesta liña, entenden dende o Partido Socialista que non é comprensible aglutinar Festa da Auga o 16, Combate Naval o 17 e incluso o posible desfile de carrozas o 18.

Apuntan tamén dende o PSdeG que a celebración do Combate Naval o 17 traería outro problema serio, que é a loxística da organización e da asistencia de tanto público á praia Concha-Compostela un día despois da Festa da Auga. Esta celebración, que nos últimos tempos ven focalizando especialmente na praia unha grande celebración na noite previa, obriga a un esforzo extra en toda Vilagarcía dos servizos de limpeza “aos que non se lles pode esixir e cargar coa responsabilidade de que fagan nun día o que ata o de agora tardaban máis, como é normal”, indicou García. Pregúntanse os socialistas si dende o Concello se valorou a situación na que pode quedar Vilagarcía ante os visitantes que veñen a ver o Combate si non están terminadas as labores de limpeza.

Tania García plantexou que “este tipo de problemáticas veñen arrastradas do feito de que non existe, a día de hoxe, unha programación oficial sobre as festas e unha valoración conxunta cos axentes sociais e económicos implicados”. Como apuntou a voceira socialista “case é comprensible que o concelleiro de Cultura permaneza agochado no seu despacho sen sair, porque a situación á que chegou despois da información desvelada polos socialistas que apuntan a un posible fraude de subvencións é para dimitir. Non entanto, semella que o Alcalde vai polo mesmo camiño e non ten constancia real do día a día de Vilagarcía”. Concluiu García que “ou non sabe ou non pode” dar resposta ás necesidades, pero “en ambos casos a situación é preocupante porque está en xogo a actividade económica de moitos empresarios e moitos negocios de Vilagarcía na semana na que máis ingresos obteñen”.

COMUNICADO ACLARATORIO en relación ao caso da instalación dun complexo deportivo en terreos portuarios e as acción políticas e xudiciais derivadas

O Partido Socialista de Vilagarcía, ante alguna información publicada en relación ao caso da instalación dun complexo deportivo en terreos portuarios e as acción políticas e xudiciais derivadas, coa vontade de esclarecer na maior medida posible a situación e favorecer o coñecemento máis amplo posible do tema, quere apuntar:

1) O Partido Socialista, a través do Grupo Municipal Socialista no Concello de Vilagarcía ten como función revisar e controlar a labor do Goberno Local, así como de facer propostas alternativas ás decisión tomadas. No exercicio destas funcións, nas recentes datas os representantes socialistas constatan o que consideran unha vulneración da legalidade no caso dunhas obras iniciadas sen licenza en terreos portuarios e a negativa do Alcalde a paralizar as obras a pesares de afirmar ter coñecemento. Dado que esa ilegalidade é cometida polo responsable de outorgar a licencia (Concello de Vilagarcía) e que culmina un proceso sobre o que o Partido Socialista considera que existíu trato de favor, presentan unha denuncia por presunto delitos de prevaricación e tráfico de influencias contra a figura do Alcalde de Vilagarcía. Non existe ningunha denuncia contra ningunha entidade privada ou empresa por parte do Partido Socialista, como se pode dar a entender en algunhas informacións.

2) A responsabilidade urbanística no Concello de Vilagarcía é exclusivamente do Alcalde.

3) O Partido Socialista non se considera responsable de ningún tipo sobre os problemas, mercantiles ou de calquer tipo, que poidan xurdir derivados de tal denuncia, ao considerar que a denuncia sobre unha ilegalidade é unha acción ineludible para un representante político. O exercicio da labor política dos socialistas irá sempre encamiñado a apoiar e favorecer calquera actuación boa para Vilagarcía, sempre garantindo como normas fundamentais e inviolables o respecto á legalidade e á igualdade de oportunidades.

4) Non existe, nin existirá, ningún tipo de interese persoal ou partidista cara unha determinada entidade pública ou privada nin por parte do Partido Socialista como colectivo nin por parte dos seus actuais representantes. Dende o Partido Socialista, respectando profundamente o dereito á opinión e información libre de persoas e empresas, considera que calquera insinuación neste sentido debe ser probada ou constrastada. Os ataques gratuitos á honorabilidade das persoas e entidades, e a súa difusión, supoñen un delito penal tipificado que dende o Partido Socialista consideramos especialmente grave.

5) Os representantes do Partido Socialista, na súa condición de representantes da cidadanía, teñen por costume acudir, na medida das súas posibilidades, aos actos aos que son convidados (culturais, deportivos, empresariais, sociais, etc.). O exercicio deste compromiso é común a todos os representantes políticos calquera que sexa o partido ao pertenza, e é perfectamente entendido pola inmensa maioría dos cidadáns como o natural exercicio da representación.

6) O Partido Socialista estima que a difusión de información de determinadas empresas de Vilagarcía, por parte doutras empresas, contribúe a alimentar certas dúbidas existentes en todo o proceso ao que se vén facendo referencia nos últimos días. Resulta canto menos sorprendente que persoas particulares posúan información sobre os trámites administrativos municipais de carácter privado doutras empresas da competencia.

7) O Partido Socialista, a través dos seus representantes, continúa e continuará a manter as posición políticas e a realizar as acción pertinentes na procura dun modelo de sociedade máis xusto, máis solidario, que garanta os dereitos e as liberdades das persoas, que defenda a quenes máis o necesitan especialmente nestes tempos de dificultades, que promova unha concienciación da importancia do traballo político a través dun exercicio limpo e nobre da política e todo esto garantido o respecto á legalidade e a igualdade de oportunidades. Será difícil, moi difícil, que ataques persoais ou colectivos sin fundamento modifiquen o rumbo do Partido Socialista de Vilagarcía. O compromiso dos socialistas, lonxe de ser quebrantados por determinadas posición estratéxicas, está cos cidadáns de Vilagarcía aos que ademáis dende o PSdeG queremos agradecer as constantes mostras de aprobación e de ánimo que se reciben, especialmente con motivo destas recentes situacións.

Os socialistas de Vilagarcía afirman estar atónicos ante a nova ocorrencia de Fole de abrir novamente a opción de Fexdega para instalar as pistas de pádel

“Semella que non se enterou que o problema da ubicación actual é a ilegalidade do inicio de obras sen licencia, non outro”, apuntou Tania García

Dende o PSdeG ven que o Alcalde “entrou en barrena” e cuestiónanse por que tanto empeño

Vilagarcía de Arousa, 18 de xullo de 2013.- No Partido Socialista de Vilagarcía, a través da súa voceira municipal, decláranse estar “atónitos” ante a nova ocurrencia do Alcalde Tomás Fole de abrir a posibilidade de facilitar novamente Fexdega para a instalación dunhas pistas de pádel, como resposta aos problemas existentes coas obras na parcela portuaria concedida.

Tania García plantexou hoxe que “é posible que teñamos que explicar novamente a Fole que o problema da instalación dunhas pistas de pádel no Porto, que deu lugar á denuncia por presuntos delitos de prevaricación e tráfico de influencias, está na ilegalidade de permitir comezar unhas obras sen licencia a pesar de ter sido consciente e coñecedor dese inicio”. “Ese é o problema e aí está a ilegalidade que nos denunciamos, pero parece que o Alcalde entrou en barrena e xa non sabe moi ben onde está e sobre que tratan as cousas”, comentou Tania García. Dadas as declaracións do Alcalde, García dixo “comezar a entender algo da situación, pois se agora plantexa levar o proxecto do pádel a Fexdega é que xa entrou en barrena de tal  manera que xa se pode explicar que puidéronse cometer ilegalidades por unha cuestión de incapacidade no exercicio da súa labor”.

Os socialistas manifestaron estar sorprendidos, non entanto, polo coñecemento tan preciso que ten o Alcalde sobre o mercado existente para o pádel en Vilagarcía, que o levou a iniciar un procedemento de urxencia no seu día en Fexdega “pola necesidade” de instalar esas pistas rápidamente, que logo fixo que a idea se desvaecera a favor da instalación desas pistas no Porto e que agora poida abrir novamente a posibilidade pero sempre que “haxa dúas instalacións e non tres en Vilagarcía”. Dende o PSdeG valoran “moi positivamente” que o Alcalde teña coñecemento profundo, “polo menos sabe de algo” indicou Tania García, pero lamentan que non tivera a vontade de saber e coñecer máis sobre o estado do mercado e a situación na comarca do sector da conserva, onde podía ter axudado ás traballadoras de Cuca, ou do comercio, para non pretender implantar medidas destructoras como a zona azul de pago e a drástica subida de impostos e tasas.

En todo caso, para os socialistas segue a ser un enigma coñecer “por que tanto empeño na implantación dun negocio tan específico, en condicións tan privilexiadas, para Vilagarcía”, e destacan que “todo investimento é positivo e ben recibido, pero a administración debe garantir que se fai en igualdade de oportunidades e non a golpe de empeño e de puntos suspensivos do Alcalde”, concluiu García.  

O Partido Socialista de Vilagarcía denunciará ao Alcalde Tomás Fole por presuntos delitos de prevaricación e tráfico de influencias

A voceira municipal Tania García presentará mañá a denuncia nos xulgados de Vilagarcía en representación dos socialistas de Vilagarcía

A negativa a paralizar as obras do Porto destiñadas á instalación dunhas pistas de pádel, e a manifestación da intención de facilitar as cousas ao empresario, detonantes da decisión.

Vilagarcía de Arousa, 15 de xullo de 2013.- O Partido Socialista de Vilagarcía, a través da súa voceira municipal Tania García, presentará mañá nos xulgados de Vilagarcía unha denuncia contra o Alcalde de Vilagarcía, Tomás Fole, por presuntos delitos de prevaricación e tráfico de influencias. Os socialistas creen que a deriva na que entrou o Alcalde respecto ao tema da instalación dunhas pistas de pádel en Vilagarcía, que se están a preparar no Porto, levouno a vulnerar a lexislación en materia urbanística. Dende o Partido Socialista plantexan que alertaron do inicio das obras sen licenza durante a pasada semana, e que solicitaron a través dos medios de comunicación e por escrito no propio Concello que se paralizaran, a instancias da Lei 9/2002, de 30 de decembro de Ordenación Urbanística e Protección do Medio Rural de Galicia, que no seu artigo 209.1 é suficientemente explícita indicando que:

Cuando se estuvieren ejecutando obras sin licencia u orden de ejecución, o sin ajustarse a las condiciones señaladas en las mismas, el Alcalde dispondrá la suspensión inmediata de dichos actos y procederá a incoar el expediente de reposición de la legalidad comunicándoselo al interesado.

A tenor da lexislación os socialistas ven claro que o Alcalde debería ter paralizado de inmediato as obras, e sen embargo anunciou públicamente que era coñecedor de que a licenza non estaba aínda aprobada pero que non tiña intención de frear as obras. Ante o coñecemento dunha ilegalidade sobre a que ten a obriga de intervir, pero constatando que non o fará, os socialistas consideran que a denuncia por presunta prevaricación é necesaria para garantir o respecto ás leis e ao ordenamento xurídico.

Dende o Partido Socialista prepararon tamén un relatorio dos feitos ocorridos dende as primeiras intencións do Alcalde de facilitar a instalación das pistas de pádel en Fexdega, que valoran que amosa a intencionalidade de favorecer a unha empresa concreta vulnerando a lexislación. Para o PSdeG esta situación constitúe un presunto delito de tráfico de influencias polo que tamén denunciarán ao Alcalde.

O Partido Socialista de Vilagarcía solicitou ante o Concello e ante a Autoridade Portuaria a paralización inmediata das obras na parcela que se pretende destiñar ás pistas de pádel

Os socialistas afirman que “unha obra sen licenza non pode continuar” e instan aos responsables de ambas institucións a que paralicen as actuacións

Lembran ao Alcalde que, “aínda que ás veces non se de conta, Vilagarcía non é seu patio de recreo”

Vilagarcía de Arousa, 12 de xullo de 2013.- No Partido Socialista de Vilagarcía seguen convencidos de que as obras que se están a levar a cabo na parcela portuaria que se pretende destiñar á instalación de pistas de pádel non poden continuar. Baséanse os socialistas en que non foi aprobada ningunha licenza e, polo tanto, as obras non se poden levar a cabo.

Os representantes do PSdeG no Concello, Tania García, e no Porto de Vilagarcía, Lino Mouriño, presentan esta mañá sendos escritos nas dúas institucións solicitando a paralización das obras por ter sido iniciadas sen a licencia correspondente. Os socialistas reclaman que deixen de realizarse traballos na parcela portuaria, pero as súas peticions van mais alá pois esixen, como xa fixeron onte a través dos medios de comunicación, que o Alcalde Tomás Fole amose o proxecto presentado pola empresa que daba pé a permitir esa obra.

“Unicamente solicitamos que se cumpra a legalidade, que parece que é cada vez máis difícil con este Goberno Local e este Alcalde”, declarou Tania García. Os socialistas esperan que Fole rectifique e mande paralizar as obras, e que a presidenta do Porto Sagrario Franco “saia do escondite e faga cumprir as normas”. Confían en que todo volva á normalidade despois deste “despropósito” e instan ao Alcalde a que rebaixe a súa actitude impositiva porque “aínda que ás veces non se de conta, Vilagarcía non é seu patio de recreo”.

Tania García apunta que “esperaremos pola solicitude de licenza na xerencia de urbanismo e os informes que acompañen á solicitude, e veremos”, e non deixa de sinalar ao Alcalde como “responsable de que pareza que en Vilagarcía hai quen pode facer o que queira”.

Asombrados por ter que chegar a estes extremos, os membros do PSdeG dubidan “quen toma as decisións en Vilagarcía” en alusións a posibles inxerencias externas que o Alcalde, segundo os socialistas, acataría sin discutir.

Os socialistas de Vilagarcía creen que o Alcalde está “entrando en barrena” coa teima da instalación das pistas de pádel no Porto

Declaran sentirse “asombrados polas valoracións que vai facendo progresivamente” e que “empozoñan aínda mais a situación”

Insisten en que hai unhas obras iniciadas sen licencia, pero “semella que a legalidade xa non é preocupante para Fole, que o asume e o pretende xustificar con toda a cara”

Vilagarcía de Arousa, 11 de xullo de 2013.- Ante a información desvelada onte polo Partido Socialista de Vilagarcía, que denunciaba que se están a levar a cabo obras sen licencia na parcela que o Porto pretende destinar á instalación dunhas pistas de pádel, os socialistas consideran que a resposta feita pública polo Alcalde de Vilagarcía “cruza algunhas liñas das que Fole, se cadra, non é moi consciente”.

En primeiro lugar os socialistas, por boca da súa voceira municipal Tania García, sorpréndense de que o Alcalde Tomás Fole saia a dar a cara con toda a convición sobre unhas obras que se están levando a cabo en terreo portuario. Esta actitude amosa, segundo interpretan os socialistas, que a instalación das pistas de pádel no Porto é un proxecto “parido e instado dende a Alcaldía de Vilagarcía”, e para o que o Porto non fixo máis que poñer os terreos, “aínda que iso poida hipotecar o futuro do propio Porto”, apuntan dende o PSdeG.

Ademáis valoran os socialistas o contido das pretendidas xustificacións do Alcalde que se quedan nun ti vai facendo, segundo consideran os representantes socialistas. Esta táctica sáltase toda a legalidade. “O Sr. Fole esquécese de que como máximo representante da Administración local o que ten que facer é velar precisamente porque no se cometan irregulariades urbanísticas”, apuntou Tania García, que tamén esixe que o Alcalde, “antes de facer ningunha valoración atolondrada, amose o proxecto e os pertinentes informes técnicos que avalen o proxecto de obras presentado pola empresa.  Os socialistas xa sabemos que non pasou pola xerencia de urbanismo, que é o órgano que o ten que aprobar a licenza de obras, pero as obras que se están a facer polo menos se saberá para que son, ¿ou está o Alcalde permitindo unha obra que non sabe como é? ¿como saber se o que se vai construír cumpre coa normativa urbanística?”. Considera García que a “lixeireza” coa que Fole asume a situación “dá conta do concepto de legalidade e de respeto ás normas que ten”, pero lémbralle que “aínda que ao Alcalde e á Presidenta da Autoridade Portuaria non lles gusten as normas, hai que cumprilas” e pregúntase “¿que ocorre se o proxecto que se presenta non pode ser validado polos técnicos, pola cuestión que sexa, e leva informe negativo e despois non é aprobada a licenza pola xerencia de urbanismo?”.

Pero para os membros do PSdeG o Alcalde “entrou en barrena”, e destacan que pretenda xustificar unha situación “non argumentando sobre a súa legalidade, senón asumindo que non está ben pero que non se sabe que, e non se sabe cando, fíxose algunha cousa que non estaba ben”. Aínda mais, apuntan que Fole pretende explicar esta situación alegando sobre outras empresas sobre as que ninguén lle preguntou: “¿considera Fole que se defende ben aos empresarios de Vilagarcía cando aparece nos medios de comunicación atacando a uns para defender a outros?” e se cuestionan polos precedentes de que un Alcalde airee situacións de empresas en relación á súa situación coa administración. “Parece coma se houbera algo personal”, inducen dende as filas da formación socialista.

Por último dende o PSdeG queren responder a unhas declaracións feitas por Fole nas que afirma que os socialistas o que queren é que se pechen negocios. Tania García respondeu con contundencia ao afirmar que “precisamente os socialistas o que queremos é que abran moitos negocios, pero que o fagan en igualdade de oportunidades. Queremos que non existan privilexios para algúns. Os socialistas o que queremos é que non se hipotequen espazos públicos a precios irrisorios e non queremos ver ao noso Alcalde axeonllado sumisamente ante as esixencias de ninguén, sexa quen sexa. Os socialistas non queremos que se afundan negocios montados con moito esforzo, como cafeterías ou tendas de deportes que pagan os seus impostos e os prezos de mercado. Eso é o que queremos os socialistas, pero semella que o concepto que Fole ten de promoción económica é outro, que premia a ilegalidade, saltarse os procedementos e facer o que a cada un lle peta”.

O Partido Socialista esixe o cumprimento do protocolo habitual de seguridade pola entrada de barcos cheos de parafina no Porto de Vilagarcía

Os socialistas afirman “non entender para que existen as autoridades e os responsables do Porto” ante unha situación potencialmente tan perigosa para a ría máis produtiva do mundo

Os socialistas esixirán información sobre este grave asunto e sobre as obras sen licenza das pistas de pádel no vindeiro Consello de Administración da Autoridade Portuaria

Vilagarcía de Arousa, 10 de xullo de 2013.- Dende o Partido Socialista de Vilagarcía reaccionaron hoxe amosando a súa “indignación” pola entrada no Porto de buques cargados de parafina sen que se activara o protocolo de seguridade. A navegación pola ría sen práctico nin remolcador de barcos cunha mercancía altamente peligrosa, derivada do petróleo e que non se disolve no auga, pon en grave risco a riqueza a ría máis rica e produtiva do mundo da que viven directamente e indirectamente miles de familias. Dende o PSdeG consideran que non se pode correr semellante risco, e esixen que se sigan a activar os protocolos de seguridade establecidos nos tempos de Roberto Rietz ao fronte de Capitanía Marítima, que garanten o menor risco posible para a ría.

Os socialistas amosáronse firmes na esixencia a Capitanía Marítima de cumprir cos protocolos e pedirán explicacións no Consello de Administración do Porto á presidenta da Autoridade Portuaria, á que acusan, xunto co Capitán Marítimo, de que “é posible que non teña conciencia do que supón para a Ría de Arousa que estes barcos naveguen con tanta frivolidade polas súas augas”. Apuntan que “en cousas como estas se observa a indecencia que supón o mercadeo de cargos públicos ao que nos ten sometido o PP” e poñen en dúbida se Sagrario Franco é quen de percibir a gravidade do asunto. Deste grave asunto os socialistas pedirán cumprimentada información no vindeiro Consello de Administración do Porto, no que tamén preguntarán polas pistas de pádel.

Instalación das pistas do pádel

Os socialistas tamén critican duramente á Presidenta da Autoridade Portuaria e ao Alcalde de Vilagarcía por permitir obras sen licenza municipal nos terreos onde se ubicarán as pistas de pádel. “Estase a proceder á demolición de naves e hai maquinaria pesada na parcela cando aínda non foron aprobadas as obras no Consello de Xerencia de Urbanismo”, sinalou a voceira socialista e membro do Consello, Tania García.  Os socialistas critican duramente tanto á Autoridade Portuaria coma ao Concello  por permitir obras sen a correspondente e necesaria licenza e esíxenlles a ambas administracións que adoiten medidas ao respecto. “É  vergoñento que dúas adminstracións permitan obras sen licenza”, suliñou a socialista. Dende o PSdeG-PSOE critican tamén a ocupación de parte da parcela que anteriormente ocupaba a subsede de bombeiros para a instalación das pistas de pádel, “aos socialistas parécenos gravísimo que se prime a instalación dunha empresa privada en terreo portuario a costa dos terreos do parque de bombeiros, é máis aínda durante un periodo de 25 anos, ¿que pasará nun futuro se é preciso ampliar o parque de bombeiros?” preguntou para concluir Tania García.

Os socialistas de Vilagarcía atribúen ao “desgoberno das desordenanzas de Fole” os problemas coas instalacións de terrazas

Dende o PSdeG apuntan a que “ningún problema se resolveu nunca coa técnica do avestruz de agocharse e non facer nada”, en relación á aplicación da ordenanza de terrazas

Achacan a Fole que “predicou todas as maldades sobre unha ordenanza de terrazas, pero a súa idea foi deixar que impere a lei da selva”.

Vilagarcía de Arousa, 4 de xullo de 2007.- A voceira municipal socialista de Vilagarcía, Tania García, apuntou hoxe directamente ao Alcalde Tomás Fole como “responsable” das problemáticas que xurden por causa da ordeación das terrazas dos establecementos de hostalería. “Fole asumíu que era moi populista pero efectivo decir a todos que se ían deixar facer as cousas”, e o resultado é que os hostaleiros e veciños atópanse con problemáticas que un Concello serio debe de resolver, pero sen embargo comproban que este Goberno Local agocha a cabeza e deixa que as cousas ocorran”.

Dende o PSdeG son moi duros nas acusacións de “inacción” ao Goberno Local e apuntan particularmente ao Alcalde ao indicar que “este é o desgoberno das desordenanzas”, lembrando todos os intentos do bipartito de dereitas de intervir na convivencia municipal e as problemáticas xurdidas, tomando como exemplos a ordenanza de circulación, a regulación da utilización de locais culturais ou esta ordenanza de terrazas. Tania García apuntou que “a postura de Fole ante a existencia dunha ordenanza de terrazas foi decir que estaba todo moi mal e que nada valía para nada. A súa aportación a esta situación foi desatender as obrigas de establecer normas e regras”, e conclúen os socialistas que “cando non se aplican as normas existentes, e non se intervén para encontrar solucións, estase promovendo a lei da selva e o sálvese quen poida”. “¿En que cabeza cabe deixar que existan conflitos por culpa de non aplicar unha norma existente?” pregúntase García.

Os socialistas lembran que xa no seu día fixeron algunha proposta, que foi aceptada polo Bipartito, que podería contribuir a resolver algunas problemáticas, e apuntan directamente á “sinalación dos espazos que se poden ocupar polas terrazas, habendo mecanismos de sobra para facelo sen problema”. Segundo explican, “o obxectivo natural é facilitar a explotación dos espazos polos hostaleiros garantindo a convivencia co resto dos cidadáns e compartindo o uso dos espazos. Pois unha vez decidido canto poden e deben ocupar, plasmémolo. E que se estudie individualmente cada situación na que exista algunha dúbida, que é posible”. “O que non pode ser”, conclúe Tania García en nome dos socialistas, “é que os hostaleiros teñan problemas entre si ou cos veciños por culpa de que existe unha normativa que Fole non ten capacidade de aplicar”.