Enmendas presentadas aos orzamentos autonómicos da Xunta para o ano 2016

Enmendas presentadas aos orzamentos autonómicos da Xunta para o ano 2016, no referente ao Concello de Vilagarcía. 

A deputada Patricia Vilán, a instancias dos socialistas de Vilagarcía, presentou estas enmendas que dende o PSdeG consideramos fundamentais para o vindeiro ano.

Comunicado acerca das informacións xurdidas sobre as retribucións dos concelleiros

Ante as informacións xurdidas nos últimos días sobre as retribucións  dos concelleiros da Corporación de Vilagarcía e co único interese de clarificar os datos e o seu posicionamento, o PSdeG-PSOE de Vilagarcía quere manifestar o seguinte:

- O pleno da Corporación aprobou o pasado 25 de setembro a organización que todos os concellos deben aprobar. Neste asunto establécense, entre outros temas, o número de concelleiros liberados e o seu salario, indemnizacións aos concelleiros non liberados pola súa asistencia aos órganos colexiados (plenos, comisións informativas e xuntas de Goberno local) e as asignacións aos grupos municipais.

- Ata a aprobación da organización, ningún concelleiro e, por suposto o alcalde, cobraron absolutamente nada, nin en concepto de salario nin de indemnización. Ademais de poder comprobalo nos distintos departamentos do Concello, é doado entender que non poden ter cobrado un diñeiro do que non sen ten aprobada a súa contía.

- A aprobación das indemnizacións por asistencias aos órganos colexiados, recoñécense por lei con carácter retroactivo, non así os salarios dos liberados que se percibiron por primeira vez o 29 de outubro. É dicir, os concelleiros de todos os partidos que conforman a Corporación, teñen dereito a cobrar pola súa asistencia a estes órganos. Os concelleiros liberados non perciben estas indemnizacións dende o momento en que pasan a estar liberados para o exercicio da súa laboura política.

-  O pasado 29 de outubro, entre outros moitos asuntos do pleno, someteuse a votación unha partida de gasto 26.000 € para afrontar estas aportacións aos grupos e concelleiros de todos os membros do pleno da Corporación, por unha mala previsión no Orzamento de 2015 redactado polo anterior goberno. Esta aprobación non implica un incremento no gasto dos órganos de goberno, xa que este goberno supón un aforro fronte ao anterior, porque malia ter máis persoas liberadas, os salarios son considerablemente inferiores aos que percibían os membros do goberno anterior. Esta información pódese tamén constatar mediante un informe elaborado polos servizos de intervención municipal do Concello.

- A pesar da necesidade deste trámite para seguir afrontando o gasto ata finais de ano, anteriormente, concretamente o pasado 05 de outubro, todos os concelleiros que conforman a Corporación recibiron as indemnizacións correspondentes aos meses de xuño, xullo, agosto e setembro, cuestión habitual no funcionamento do concello e que todos os grupos coñecían e coñecen esta realidade, participan dela, negocian e, por suposto, cobran as súas asignacións. Ningún dos grupos da oposición protestou nin dixo nada sobre ese asunto nese momento.

- O Partido Socialista está completamente dacordo coas indemnizacións pola asistencia aos órganos colexiados. Estas indemnizacións recoñecidas por lei e institucionalizadas en todos os concellos de España teñen a súa razón de ser para compensar a adicación a esta actividade, que incluso pode chegar a supoñer a redución da xornada laboral e o salario para  unha persoa que sexa concelleira no seu pobo.

- Como o Partido Socialista está dacordo na percepción destas indemnizacións, votou a favor de consignar orzamento para sufragalas. Aceptando, como é natural, que os partidos que non estean dacordo con este pago deberían, cando menos, devolver o xa cobrado e renunciar a cobralas ao longo de toda a lexislatura. Cobrar as indemnizacións por asistir a un pleno para, nese mesmo pleno, negarse a aprobar o orzamento para esas mesmas indemnizacións supón un exercicio de demagoxia inaceptable para calquera partido político, e o PSdeG-PSOE considera que é unha postura enganosa cara a cidadanía que non fai máis que enfangar o debate.

- O Partido Socialista aplaude a liña política marcada polo Goberno de Vilagarcía, que sendo en termos económicos o de menor custe para os cidadáns dos últimos anos, segue traballando en aumentar os canles de diálogo e participación, cunha cidadanía moi implicada no desenvolvemento e no futuro de Vilagarcía, que rexeita os debates estériles, pouco produtivos de cara a resolver os problemas reais.

O Partido Socialista de Vilagarcía pídelle a dimisión a Cores Tourís por "colar pola porta de atrás" a Tomás Fole na xuntanza sobre o ximnasio de Rubiáns

O secretario de organización local, Julio Torrado, acusa a Fole de "pretender dinamitar o acordo a escondidas nos despachos, para non quedar en evidencia a súa incapacidade de non resolvelo antes"

Torrado traslada que os socialistas observan "entre apenados e decepcionados" os esforzos de Fole por non convencerse de que os cidadáns o botaron fora.

Vilagarcía de Arousa, 7 de outubro de 2015.- O secretario de organización do PSdeG de Vilagarcía manifestou hoxe, en nome da dirección local da agrupación, o seu "asombro" e o seu "rexeitamento" ao feito coñecido hoxe de que o delegado da Xunta, Cores Tourís, e o delegado de Educación, César Ares, "colaran" sen avisar e pola porta de atrás a Tomás Fole cando se iniciaba a xuntanza entre os concelleiros Miro Serén e Lino Mouriño cos responsables do goberno autonómico. A xuntanza tiña por obxectivo aproximarse a unha solución ao problema do ximnasio de Rubiáns, que o goberno local de Vilagarcía está a intentar resolver.

A presenza de Tomás Fole por sorpresa cando se iniciaba a xuntanza amosa, para o secretario de organización do PSdeG, "unha absoluta falta de ética e de respeto polas institucións por parte de Tourís e do propio Fole". Torrado pediulle a Tourís a súa inmediata dimisión, por considerar que "esta situación non ten ningunha explicación. Se quere convidar aos membros da oposición de Vilagarcía, que o faga tamén cos representantes de IU, BNG e SM, cousa que tería máis lóxica que esto". A petición de dimisión se fundamenta en que "se Tourís non é quen de diferenciar o debate partidario da representación institucional é que non entende a súa responsabilidade".

Torrado expresou a "sorpresa" dos socialistas por observar o "ridículo" que está a protagonizar Tomás Fole, "quen parece non asumir que o seu único protagonismo está en ter o récord da maior caída que se lembre ninguén dun goberno municipal en Vilagarcía. E parece non ter aprendido, dado que continúa a querer colarse nas fotos a semellanza do pequeno Nicolás, e a contar mentiras delirantes sobre acordos, obras ou decisións de orzamentos non existentes para xustificar as súas posicións". Dende o PSdeG consideran este tipo de actuacións unha "fuxida cara adiante" dun Tomás Fole que estiman que está "acorralado" dentro do propio PP, pero que "necesita" da política e por iso pretende atopar o seu novo oco. Torrado estimou que "non habería mellor noticia, en termos electorais, para os socialistas de Vilagarcía que encontrarse con Fole como candidato no 2019", pero creen que sería perxudicial para Vilagarcía.

A pesares das circunstancias, os socialistas celebran que os concelleiros Serén e Mouriño conseguiran que a Xunta rectificara a súa posición, arrancándolle o acordo de solucionar os problemas do ximnasio do CEIP de Rubiáns. A xuicio dos socialistas, esto evidencia que "tivo que chegar un goberno sensato que consegue un acordo en tres meses para desatascar o que nin Fole nin Tourís puideron ata agora en anos", e están convencidos de que "a presencia de Fole tiña como fin dinamitar os acordos, para non quedar en evidencia que agora hai un goberno que resolve e antes había un que complicaba". "Uns traballan e resolven e outros buscan fotos", concluiu Torrado.

As direccións local, provincial e autonómica do PSdeG respaldan sen fisuras a labor dos 100 días do goberno municipal de Vilagarcía

A executiva local, tras a habitual reunión despois dos plenos municipais, apoiou por unanimidade a xestión dos 100 días e a resolución do esquema organizativo do Concello

A dirección local manifestou a súa decepción cos partidos da oposición, aos que acusa de "buscar o boicot ao goberno e non o interese xeral"

Vilagarcía de Arousa, 26 de setembro de 2015.- A Comisión Executiva Municipal dos socialistas de Vilagarcía celebrou onte a súa reunión, habitual tras os plenos municipais, e valorou os 100 días de goberno municipal e a resolución do esquema organizativo do Concello. Os membros da dirección valoraron positivamente a "Proposta de Cidade" que o goberno propuxo aos demáis partidos políticos de Vilagarcía e o resultado final no pleno, considerando que a acción do goberno municipal durante 100 días nos que os concelleiros traballaron a pleno rendemento sen cobrar, e pagando os gastos do seu peto, evidencia a absoluta intención de acordos amosada polo goberno, e deixa en mal lugar á oposición á que solicitan que, dunha vez, dalgún argumento de por que non compartiron a proposta.

A dirección socialista considera que o pleno municipal deixou en evidencia a actitude dalgúns grupos en particular, ao coñecerse os innumerables intentos por parte dos socialistas de falar e chegar a acordos cos partidos de esquerdas, que escaparon da responsabilidade. Os socialistas constataron a súa decepción pois dende un principio sempre se confiou en posibles posicións flexibles e de entendemento, tanto para formar goberno como se plantexou, como para chegar a acordos puntuais. Non entanto os socialistas comproban que a Estratexia do Non volve a Vilagarcía. Especialmente asombroso resulta para a dirección do PSdeG que non houbese explicación por parte dalgún grupo da oposición de por que non quixeron nin negociar un acordo ante a proposta efectiva de Varela de rebaixarse o soldo a 37.000€ como se lle pedía inicialmente. A dirección reforzou tamén a posición do grupo en termos de responsabilidade porque considera que non é decente manifestar o acordo coa proposta pero logo votar en contra no pleno por unha cuestión de suposta imaxe.

Na executiva socialista valorouse tamén a posición adoptada polo PP, que finalmente acabou aceptando unha proposta que resulta máis austera e máis efectiva que a do anterior goberno, e criticaron con dureza que intentara difundir abertamente que existía un acordo de goberno, ou que o PP participaría en decisións de goberno, cando ningunha desas cuestións estivo nen sequera en dúbida por parte do goberno municipal. "Nin goberno de coalición, nin a oposición decide obras, nin se asumen investimentos que o goberno non considera, nin decisións que non teñan o visto bo dos socialistas. Nada de nada", manifestou o Grupo Municipal na xuntanza. De feito, a dirección local manifestou a súa sorpresa polo revuelo organizado, do que culpan á mala fe de Tomás Fole e á política de eslogan do resto da oposición, que pretenderon convertir esta situación en algo que non era. "Esta resolución vai no mesmo sentido que as que poden existir en Pontevedra, Compostela, Coruña, Ferrol ou calquera outra cidade e que se resolveron no primeiro mes. De feito, se aquí tardou en salir adiante é porque o goberno municipal aguantou o que puido esperando á responsabilidade da oposición de esquerdas", manifestou o Alcalde na xuntanza.

Ao fío da confusión creada polas diversas interpretacións erróneas do escenario, que chegou a tildarse de acordo de goberno, os socialistas creen que nestes próximos días a normalidade evidenciará que moitas das cousas que se plantexaron non responden ao que di a proposta de cidade, que está xa publicada na web coa firme vontade de que todo o mundo a poida comprobar. Neste sentido tamén, a dirección provincial e nacional do PSdeG manifestaron nestes días o seu apoio sen fisuras á acción do goberno de Vilagarcía.

A dirección local aprobou, ademáis, o esquema de funcionamento do plan de información dos 100 días de goberno, que xa trataran en reunións pasadas, e que se iniciará cunha xuntanza de militantes para evaluar estes tres primeiros meses e que pretende, despois, volver a visitar ás parroquias de Vilagarcía para organizar charlas abertas aos veciños de cada lugar. 

O PSOE de Vilagarcía votou por unanimidade a Julio Torrado como candidato ao Congreso dos Deputados

A concurrida asemblea do día de onte aprobou a proposta da Executiva, apoiada tamén polo Grupo Municipal

Torrado pediu extender esa unanimidade aos compañeiros da provincia que tamén se postulan

Vilagarcía de Arousa, 22 de setembro de 2015.- A asemblea dos socialistas de Vilagarcía debatiu e votou onte a proposta da Comisión Executiva Municipal, de presentar a Julio Torrado, secretario de organización local, como candidato ao Congreso dos Deputados nas vindeiras eleccións municipais. Os socialistas deron comezo así á precampaña dirixida ás eleccións xerais do vindeiro decembro, e na que onte manifestaron a súa vontade de “ganar as eleccións para liderar o cambio necesario para este país”, como indicou o propio Julio Torrado.

Miro Serén, secretario xeral da agrupación plantexou á asemblea, onte moi concurrida, a proposta de elevar o nome de Julio Torrado á dirección provincial, que terá que configurar a lista definitiva da candidatura dos socialistas da provincia de Pontevedra. Torrado, tamén apoiado por moitas outras agrupacións da provincia, agradeceu a proposta e presentouse porque “dar este paso é un compromiso necesario para todas as persoas que creen que poden aportar solucións nun momento tan importante e tan complexo para a política”, e afirmou que está disposto a representar aos cidadáns “dende unha perspectiva radicalmente socialdemócrata, que defenda a igualdade de oportunidades e afronte as transformacións necesarias en termos de transparencia, participación e calidade democrática”. Torrado recoñeceu que o Partido Socialista cometeu erros no pasado, froito de enredarse “na xestión do poder e non nas súas posibilidade” e que se precisan obxectivos claros, “a cuestión non é ganar para obter o poder, senón ganar para transformar a sociedade”.

O Alcalde de Vilagarcía, Alberto Varela, defendeu a proposta de Julio Torrado como “boa para Vilagarcía” e apostou pola súa inclusión en postos de saída porque eso permitiría ter “o mellor complemento para este Goberno Municipal”. Varela destacou a labor dos seus compañeiros de goberno, aos que agradeceu o seu compromiso e eficacia, poñendo en marcha proxectos que eran necesarios para Vilagarcía.

Despois de varias peticións de militantes, o apoio á candidatura de Torrado foi por unanimidade dos 109 membros presentes na asemblea. O propio Torrado manifestou o seu agradecemento, e pediu expresamente aos presentes o apoio por unanimidade tamén para os compañeiros Dolores Galovart, de Vigo, e Guillermo Meijón, de Pontevedra (Congreso), así como para Abel Losada (Senado).

Julio Torrado é secretario de organización da agrupación socialista local e ten 33 anos. Torrado é  doutor en Psicoloxía Social pola Universidade de Santiago, na que traballa como investigador. É tamén profesor da Universidade Pontificia de Ecuador, e desenvolveu esta labor no pasado na Universidade Lusófona do Porto. É coñecido en Vilagarcía pola súa actividade na dirección do Club Xadrez Fontecarmoa. A única ocasión que integrou unha candidatura foi no ano 2012, nas eleccións ao Parlamento de Galicia, ás que concurriu no 9º posto, sen opción de ser elexido.

PROPOSTA DE PACTO DE ORGANIZACIÓN DO CONCELLO

En sintonía co noso compromiso de transparencia coa cidadanía de Vilagarcía, facemos pública a proposta de organización remitida aos restantes grupos políticos da Corporación.

PROPOSTA DE PACTO DE ORGANIZACIÓN DO CONCELLO

Aínda cando os acordos, directivas, leis, decretos, recomendacións e ata códigos éticos sobre a Administración Local emanadas dende o Consello de Europa, o Goberno do Estado, as Autonomías e as federacións de municipios dan por suposto que os concellos deben ter políticos con dedicación exclusiva e cargos da súa confianza, para realizar tarefas distintas ás adscritas normalmente ao persoal funcionario, o certo é que delimitar o número de liberacións e de contratos eventuais e, sobre todo, a súa remuneración non está exenta de polémica, provocando así numerosas contradicións que non sempre son ben entendidas pola cidadanía.

Partindo do marco legal existente e da experiencia propia do Concello e doutros a nivel comarcal, autonómico e estatal, cómpre formular unha proposta de pacto que evite que cada catro anos se produza o mesmo debate coas mesmas contradicións.

MARCO LEGAL

O artigo 75 da Lei de Bases de Réxime Local establece que “los miembros de las Corporaciones locales percibirán retribuciones por el ejercicio de sus cargos cuando los desempeñen con dedicación exclusiva, en cuyo caso serán dados de alta en el Régimen general de la Seguridad Social, asumiendo las Corporaciones el pago de las cuotas empresariales que corresponda”.

No artigo 75 bis establécese que serán os Presupostos Xerais do Estado os que fixen o límite máximo legal, partindo do baremo dun Secretario de Estado. No caso de Vilagarcía –municipio de entre 20.000 a 50.000 habitantes- sinálase que ese máximo será –disposición Nonagésima da citada lei- de 55.000 euros. Segundo o informe da FEMP sobre a aplicación da Disposición Adicional Nonagésima en la Ley 22/2013, de 27 de decembro de 2013, de racionalización y sostenibilidad de la Administración Local, “este límite no incluye ni las cuotas a la Seguridad Social a cargo de la Corporación ni las indemnizaciones por los gastos efectivos ocasionados en el ejercicio de su cargo”. A proposta actual para o pleno organizativo de Vilagarcía é de 48.000 euros.

En canto ao número de concelleiros con dedicación exclusiva–art. 75ter.1.K da Lei de Bases- sinálase que “en los Ayuntamientos de municipios con población comprendida entre 35.001 e 50.000 habitantes, los miembros que podrán prestar sus servicios en régimen de dedicación exclusiva no excederá de once”. A proposta actual para Vilagarcía é de cinco –5- (incluído o alcalde), é dicir, menos da metade prevista pola lexislación.

Por lo que respecta ao persoal de confianza, a propia Lei de Bases recoñece a súa existencia e mesmo necesidade ao indicar que (art. 89) que “el personal al servicio de las Entidades Locales estará integrado por funcionarios de carrera, contratados en régimen de Derecho laboral y personal eventual que desempeña puestos de confianza o asesoramiento especial”. Son varios os artigos da Lei que se refiren a eses mesmos postos, pero cabe subliñar o 104.bis no que, como no caso das remuneracións dos concelleiros, tamén se trata de fixar uns límites a ese tipo de contratos na administracións locais. Así, no caso de Vilagarcía, por ser un municipio de entre 20.000 e 50.000 habitantes, podería incluír no seu plantel “puestos de trabajo eventual por un número que no podrá exceder de siete”. Para o pleno organizativo a proposta é de dous (2), nin sequera un terzo do permitido legalmente, e para postos con longa tradición no propio concello: o de secretario do alcalde e o de director de actividades deportivas, existente dende a mesma creación da Fundación de Deportes, e mantido no tempo con gobernos de distinto signo e mesmo en coalición.

Cabe lembrar que a definición do “persoal de confianza” está recollida pola Lei de Bases e polo Estatuto Básico do Empregado Público e ratificada pola sentenza do Tribunal Supremo de 25 de abril de 2008, que textualmente di: “Se trata de tareas de colaboración inmediata con quienes ostentan el poder de superior decisión política, en las que predominan las notas de afinidad y proximidad política que es inherente a la confianza”.

Nun e noutro caso –concelleiros e persoal eventual-, ambos están suxeitos á Lei 19/2013, de 9 de decembro, de transparencia, acceso á información pública e bo goberno, que, no seu artigo 8, sobre “Información económica, presupuestaria y estadística”, di que é obrigatoria a publicación de:

“f) Las retribuciones percibidas anualmente por los altos cargos y máximos responsables de las entidades incluidas en el ámbito de la aplicación de este título. Igualmente, se harán públicas las indemnizaciones percibidas, en su caso, con ocasión del abandono del cargo.

h) Las declaraciones anuales de bienes y actividades de los representantes locales, en los términos previstos en la Ley 7/1985, de 2 de abril, Reguladora de las Bases del Régimen Local. Cuando el reglamento no fije los términos en que han de hacerse públicas estas declaraciones se aplicará lo dispuesto en la normativa de conflictos de intereses en el ámbito de la Administración General del Estado. En todo caso, se omitirán los datos relativos a la localización concreta de los bienes inmuebles y se garantizará la privacidad y seguridad de sus titulares”.

A POSTURA DA FEMP E DA FEGAMP

Partindo da evidencia de que “en un contexto económico, social y político en el que la ciudadanía manifiesta un alto grado de desconfianza respecto de la política, las instituciones y los responsables públicos”, a Federación Española de Municipios e Provincias (FEMP), á que pertence Vilagarcía, aprobou un “Código de Bo Goberno Local”. O texto foi elaborado por un grupo de traballo integrado, ademais de por técnicos de distintos concellos de España, por representantes de todos os partidos con representación na Comisión Executiva da FEMP: PP, PSOE, IU, CIU e PAR.

O Código Ético, aprobado en 2009 e modificado en xuño de 2015 para adaptalo á nova Lei de Transparencia e Bo Goberno, tivo en conta as recomendacións do Consello de Europa. Con relación á remuneración dos cargos públicos no eido local, o Código Ético –aprobado por unanimidade de todos os partidos representados na Comisión Executiva e refrendado polo Consello Federal da FEMP- di o seguinte:

-       Desde el respeto a la autonomía local, las retribuciones de los representantes de los Gobiernos Locales deben responder a criterios objetivos tales como la población, el presupuesto o la situación financiera municipal

-       Igualmente deberá establecerse una relación de Concejales de gobierno y oposición con retribución y dedicación plena en función de los mismos criterios.

-       Se recomienda la dedicación exclusiva de los alcaldes y alcaldesas de los Municipios de más de dos mil habitantes.

-       Las cuantías retributivas se fijarán partiendo de unos baremos que utilizarán, como límites y criterios comparativos, el régimen retributivo de cargos públicos de otras instituciones y/o funcionarios públicos que desempeñen cargos de similar responsabilidad ya sea en el ámbito local, estatal o autonómico”.

No mesmo texto, e para garantir a labor de oposición e cumprir coas normas de transparencia e participación cidadá, se asume que “los diversos grupos políticos dispondrán en las dependencias municipales de un despacho o local para reunirse e recibir visitas, poniendo el alcalde o alcaldes a su disposición los medios materiales y humanos que permita el Presupuesto”.

A Federación Galega de Municipios e Provincias (FEGAMP), á que tamén pertence o Concello de Vilagarcía, puxo en marcha un proceso para tratar de establecer un baremo que marque de maneira clara os límites retributivos. Ese proceso aínda está inconcluso, pero xa se deron a coñecer algunhas claves; por exemplo que para os municipios de menos de dous mil habitantes a remuneración do alcalde debe ser comparable ao dun xefe de sección da administración, é dicir, arredor de 34.000 euros. Parece evidente que establecendo ese baremo aos distintos tramos de poboación, a proposta final da Fegamp para un municipio como o de Vilagarcía vai estar máis ben preto dos límites fixados polos Presupostos do Estado para os concellos de 35.000 a 50.000 habitantes.

A POSTURA DOS PARTIDOS

Como a FEMP recoñece no preámbulo do seu Código Ético, tamén os partidos a título individual tratan de poñer límites aos gastos denominados de “órganos de goberno”. En xeral, todos están de acordo en que é preciso “dignificar” a xestión política con salarios que permitan a participación da cidadanía nos asuntos públicos. Algúns partidos incluso levaron este asunto ao seu Programa Marco para as últimas eleccións locais, é o caso de Izquierda Unida, que no seu punto 3 (“Medidas contra la corrupción”) expresamente di: “Los salarios de los representantes electos no pueden exceder al del funcionario de rango más alto de la administración en la que ejerce su labor”.  No mesmo Programa Marco, e con respecto aos contratos eventuais, este partido avoga pola “limitación en el número de asesores y de cargos de confianza política y transparencia en los nombramientos y en sus retribuciones”. “Limitar” en ningún caso é “eliminar” e é ben coñecido que calquera concello do España con presuposto e poboación similar á Vilagarcía, incluso moi inferior, dispón de cargos de confianza, sexa o goberno da cor que sexa, e mesmo incluso para os grupos da oposición.

En canto á estruturación do número de concellerías “liberadas” e cargos eventuais, parece evidente que debe ser o goberno quen defina as súas, dentro dos límites que establece a lei. Así se admitiu, por poñer un exemplo ben preto, no de Pontevedra, onde o Partido Popular anunciou a súa abstención nese punto porque “es una cuestión del equipo de gobierno”. (FV, 18 de xuño de 2015).

A SITUACIÓN EN VILAGARCÍA NO SEU CONTEXTO

Unha sinxela análise dos datos comparativos de Vilagarcía de Arousa con outros municipios de España de similares características poboacionais deixa ben ás claras a situación anómala que se está a vivir. Porque si se utilizan os criterios que marca a lei e recomenda a propia Federación de Municipios e Provincias co respaldo unánime de todos os partidos, é dicir, poboación, presuposto e situación financiera municipal, vese que a proposta de gastos da corporación de Vilagarcía (o 1,5% de 26.000.000 de euros) é máis que razoable respecto doutros concellos da súa categoría ou incluso superior:

Como se pode comprobar, os gastos de “órganos de goberno” –que inclúen tamén os de asistencia a plenos e comisións e as asignacións a todos os grupos- son en Vilagarcía a menos da metade do que o supón en Pontevedra (BNG) ou Teruel (PP)  ou un terzo de El Prat de Llobregat (IU).

No caso do persoal eventual, ou de “confianza”, a comparativa tamén é favorable a Vilagarcía de Arousa: en Rivas ou El Prat (IU) ou na Coruña (Mareas) hai sete veces máis persoal de confianza; en Pontevedra (BNG), cinco veces máis, e en Oleiros (Alternativa Veciñal), tres veces máis.

PERSOAL EVENTUAL COMPARATIVA VILAGARCÍA – CONCELLOS ESPAÑA
Concello	Goberno	Nº “confianza”
A Coruña	Marea Atlántica	13.5
Rivas Vaciamadrid	IU	14
Prat de Llobregat	IU	14
Pontevedra	BNG	10
Zamora	IU	9
Oleiros	AV	7
Ronda	PP	7
Basauri	PNV	2
Vilagarcía (*)	PSOE	2
* Segundo a proposta feita polo actual goberno

Cabe, por último, realizar unha última comparativa: a de Vilagarcía de Arousa respecto dos concellos da comarca que lidera:

COMPARATIVA CONCELLO DE VILAGARCÍA – CONCELLOS DO SALNÉS
Concello	Gobº / Partido	Poboación	Salario Alcalde	Custe/Hab
Illa de Arousa	PSOE	5.006	44.800		8.94€
Meis	PP	5.033	45.000		8.94€
Meaño	PP	5.428	43.000		7.92€
Vilanova de A.	PP	10.459	50.000		4.78€
Ribadumia (*)	IR	5.103	20.500		4.02€
Cambados	PSOE	13.399	40.000		2.96€
O Grove	PSOE	10.851	45.000		2.39€
Vilagarcía (**)	PSOE	37.712	48.000		1.27€
*Só a media xornada. **Segundo a proposta feita polo actual goberno

Os resultados de comparar Vilagarcía coa comarca son evidentes e unha demostración máis da anomalía que se vive no concello cabeceira: non é doado explicar, e menos entender, que con circunstancias económicas e sociais similares e aplicando os mesmos criterios –poboación, presuposto, situación financieira- se poida chegar á conclusión de que o salario de alcalde de Vilagarcía debe ser sensiblemente inferior ao de concellos aos que triplica, cuadruplica e ata septuplica. Os números son ben claros: aínda cun salario como o proposto -48.000 euros brutos- o alcalde de Vilagarcía –con independenza do seu nome ou partido- o custe para os veciños é notablemente inferior ao de calquera outro rexedor da comarca.

PROPOSTA DE PACTO PARA O FUTURO

Tendo en conta a lexislación vixente, as recomendacións da FEMP e FEGAMP e a experiencia de Vilagarcía, pero tamén do contexto que atinxe aos concellos da súa categoría, propoñemos:

-     O pleno do Concello de Vilagarcía de Arousa aprobará un límite de gasto para “órganos de goberno” que non excederá, de partida, do 1,5% do actual presuposto, tendo en conta, en todo caso, os límites marcados pola lei en canto a remuneración máxima do alcalde/sa e os concelleiros con dedicación exclusiva e o número de cargos eventuais de confianza.

-         A distribución dese presuposto será decidida polo goberno que corresponda en cada momento. De igual xeito se produciría no caso de que un ou varios grupos da oposición tiveran unha asignación para o desenvolvemento das súas tarefas.

-         Posto que os cargos adscritos a “órganos de goberno” pasarán a formar parte, mentres dure o mandato, do persoal ao servizo da Entidade Local tamén o seu salario variará en función da situación do persoal funcionario ou laboral, é dicir, subirá, baixará ou se conxelará do mesmo xeito que se aprobe para o resto do persoal do Concello.

-       A proposta de destinar inicialmente o 1,5% do presuposto inicial poderá variarse se así o decide a Corporación, por exemplo se, chegado o caso, se acorda que tamén os grupos da oposición teñan concelleiros con dedicación exclusiva ou parcial ou persoal eventual, como suxire o Código Ético aprobado por todos os grupos políticos da Femp, prevé a propia lexislación ou é común na inmensa maioría dos concellos de poboación e presuposto similar ao de Vilagarcía de Arousa.

-      A participación dos diversos grupos políticos nos órganos de representación –consellos, fundacións, consorcios, mancomunidades, etcétera- se realizará de xeito estritamente proporcional ao resultado electoral e, polo tanto, á súa presenza no pleno da Corporación.

-         De acordo coa Lei 19/2013, de 9 de decembro, de transparencia, acceso á información pública e bo goberno, e o Código Ético de Bo Goberno da FEMP, o Concello publicará na súa páxina web tanto as declaracións anuais de bens e actividades como as retribucións percibidas polos seus representantes políticos e cargos eventuais.

-       Para facilitar a labor da fiscalización, todos os grupos políticos con presenza na Corporación disporán dun local nas propias dependencias municipais, dotado do mobiliario correspondente, teléfono e aceso a internet, onde poidan reunirse e recibir aos cidadáns. Chegado o caso, poderían ter persoal –sexa do concello ou eventual ou de confianza- adscrito ao seu grupo.