OS SOCIALISTAS AGARDAN QUE CALQUERA DECISIÓN SOBRE UNHA INSTALACIÓN MUNICIPAL COMO A LOMBA PASE POLO CONSELLO REITOR DA FUNDACIÓN DE DEPORTES

O PSdeG cree que hai que rematar coas arbitrarias decisións do PP sobre a privatización de instalacións deportivas municipais para explotación privada

Vilagarcía de Arousa, 23 de decembro de 2012.- As conversas públicas que están a manterse nos medios de comunicación sobre posibles cambios e o futuro do campo de fútbol municipal de A Lomba volven a poñer de manifesto o nulo sentido democrático que o PP concibe sobre a xestión do público. Sen todavía saír do bochorno que para a maioría de cidadáns supón a actuación do Goberno Local no caso do pádel de Fexdega, os veciños, especialmente aqueles vinculados ao mundo do deporte, observan como o Alcalde pretende validar públicamente procedimentos fora de lugar na xestión de instalacións deportivas municipais, aínda que participando dunhas conversas a través dos medios de comunicación e no que incluso a opinión do Alcalde non parece ter moito interese para os outros interlocutores.

O debate sobre a sustitución do céspede natural por artificial en A Lomba é un debate que hai anos que se ven intercambiando entre a xente do deporte municipal e a Fundación de Deportes. Neste sentido, o concelleiro Miro Serén, representante do PSdeG na Fundación de Deportes Municipal, valorou hoxe que “independientemente das opinións e distintas posturas sobre o tema, o innegable é que unha decisión dese calibre debe pasar, sen lugar a dúbidas, pola Fundación de Deportes”. Os socialistas consideran que este caso é un exemplo máis da actitude do PP coa Fundación de Deportes, “á que usaron de parapeto nalgunha ocasión para escudarse ante certas decisións que non souberon tomar por si mesmos, pero á que ningunearon cando quixeron tomar decisións incomprensibles sobre unha instalación municipal agora utilizada para o ámbito deportivo, como Fexdega”, apostillou Serén. Esta dobre moral evidencia, segundo os socialistas, que o PP soamente quere as institucións e os órganos de participación, como meras ferramentas para utilizar segundo lle conveña para según que obxectivos.

Ademáis da posible implantación de céspede artificial en A Lomba, existen outras aportacións e ideas sobre unha posible reforma no campo municipal, que suporían, na práctica, a concesión para explotación privada dalgúns servicios en espazos e instalacións públicas. Este formato xa non é a primeira vez que se plantexa, e o actual Goberno Municipal mantivo posicións certamente distintas sobre distintos casos. Para evitar agravios comparativos, como os sucedidos nas distintas ocasións que houbo proxectos deportivos recentemente en Fexdega, Serén insistiu na “necesidade de convocar ao Consello Reitor da Fundación se se queren tomar decisións sobre instalacións deportivas municipais”.

Os socialistas esperan que desta ocasión non existan situacións nas que Fole e Elena Suárez pretendan obviar aos representantes do deporte de Vilagarcía, e sexa necesario forzar unha convocatoria da Fundación como xa ocorreu. Esperan, tamén, que se poida manter un criterio sobre a utilización e disposición das instalacións deportivas municipais. Por último, Serén apuntou que “está ben saber, aínda que sexa pola prensa, que a Deputación ten posibilidade de facilitar para Vilagarcía fondos que son públicos, e non de disposición personal de Louzán como se foran do seu peto. Sabendo iso, agora os representantes lexítimos do deporte de Vilagarcía temos que decidir sobre a súa utilización”.

O esperpéntico proceso do pádel de Fexdega deixa só e en evidencia a un Alcalde no que xa non confía ninguén.

Tania García considera que Fole “xa non está lexitimado para abrir de novo o concurso”, como se pretende facer incorporando agora a representantes da Deputación sen aportar un céntimo e sen ser de Vilagarcía.

García: “O cambio no procedemento e no canon, dános a razón aos socialistas na nosa postura defendida”

Vilagarcía de Arousa, 22 de decembro de 2012.- O proceso polo que o Goberno local de Vilagarcía, e semella con moito interese especial o Alcalde Tomás Fole, pretendeu abrir a concesión privada unha parte do recinto Fexdega, culminouse onte co rechazo do Padroado da Fundación que rixe o pavillón a tal iniciativa.

Na primeira parte do esperpento o Goberno Local iniciou un procedemento de urxencia (sen que houbera ningún motivo para elo) e cun prezo irrisorio de 1€ por metro cadrado (e sacando 2000 metros cadrados a concesión nun lugar privilexiado como é Fexdega). Aquel proceso, ante o que os socialistas presentaron un recurso de reposición, foi anulado por un defecto de forma no procedemento. Pero Fole tivo moito interese e volveu a abrir o procedemento.

Nesta segunda fase os socialistas consideran obvio que as apreciacións feitas no primeiro caso estaban no certo, xa que o Goberno Local decidíu non introducir aquí a urxencia no procedemento (caendo no surrealista caso de que Fole consideraba de urxencia o proceso no primeiro caso, pero non cando o propio proceso se demorou), e modificar lixeiramente o canon para plantexar agora 2000€ maís o IVE. Tampouco esto semella ser un prezo digno para unha instalación como Fexdega, con todas as súas vantaxes: céntrica, con aparcamento, servizos,…

Esta chapuza de proceso rematou co só apoio do PP ao novo prego de adxudicación, que foi finalmente rexeitado porque non o apoiaron as outras forzas políticas nin os representantes sociais presentes no Padroado de Fexdega.

Ante tal situación, os socialistas están asombrados polas intencións anunciadas xa polo Alcalde, de volver a abrir o proceso outra vez contra vento e marea, apoiándose nesta ocasión en que a Deputación de Pontevedra vai incorporar ao padroado de Fexdega dúas representantes, e por tanto as contas do PP poderían sair adiante. Pero esta intención resulta absolutamente ilexítima e indigna dende calquera punto de vista. A Deputación non aportará nen un so euro ao financiamento de Fexdega, (achégase acordo da Deputación), e vai incorporar dúas persoas que non son de Vilagarcía para decidir o futuro dunha instalación municipal durante dez anos, co único argumento de que Louzán e Fole así o desexan. Sen ningún motivo máis. Tania García, representante do partido socialista na Fundación Fexdega declarou hoxe que “é unha indecencia. Non é aceptable. Estaremos en contra da maneira máis firme posible porque esto non é o patio de recreo de ninguén. Unha vez mais, ante a incapacidade deste Alcalde de falar con ninguén, Louzán volve a comprarlle unha maioría absoluta, outra vez”. Pero García aproveitou para recalcar o que xa transmitíu nos pasados días “As maiorías absolutas non outorgan a razón absoluta. E menos cando son ilexitimamente mercadas”. E sentenciou “Vilagarcía xa dixo non ao seu proxecto estrela de Tomás Fole. E con esto ten que rematar”.

Dende o Partido Socialista creen que a gobernabilidade de Vilagarcía está agora mesmo sostida por fíos de papel, cun Alcalde no que ninguén confía e que perdeu a confianza da cidadanía e dos axentes sociais, e como exemplo o ocorrido neste caso do pádel. García considera que a imaxe de Fole é dun home “só, desquiciado e dando paus de cego”, facendo referencia aos enfrontamentos que dende a Alcaldía se manteñen cos hostaleiros polas sancións e as regulacións da Festa da auga, cos cidadáns e comerciantes pola implantación da zona azul e o circo (queixas ante as que o Alcalde soamente soubo contestar “que reflexionen”), á división no seu goberno e as espantadas ocorridas e por ocorrer…

O GOBERNO LOCAL DE VILAGARCÍA VOLVE A ACEPTAR A INSTALACIÓN DUN CIRCO NO APARCADOIRO DE FEXDEGA, EN CONTRA DA VONTADE DOS VECIÑOS

Coa instalación do anterior espectáculo circense, veciños do entorno presentaron queixas por escrito ante o Goberno que foron absolutamente ignoradas

Os socialistas insisten en que se trasladen os circos ao Ramal, onde sempre estiveron, que é o lugar con mellores características

Vilagarcía de Arousa, 17 de decembro de 2012.- Os representantes do Partido Socialista observan con asombro a decisión do Goberno Local de Vilagarcía de permitir, novamente, a instalación dun circo no aparcadoiro do recinto feiral de Fexdega, pese a que xa nas últimas ocasións que esto sucedeu acarreou varios problemas para os veciños.

A instalación de todo o entramado do espectáculo circense conleva diversos problemas para o entorno. Por un lado, elimina temporalmente o aparcadoiro de Fexdega, de tanta utilidade para os vilagarciáns e os veciños de outros lugares que acoden a Vilagarcía a traballar, realizar compras ou xestións. Por outro lado están os inconvintes en termos de ruidos e molestias para os veciños do entorno, que se multiplican no caso de que o circo teña animais dados os cheiros e problemas de hixiene que se xeneran.

Cabe lembrar que estas problemáticas veciñais son coñecidas por Tomás Fole, que recibiu de veciños deste entorno un escrito de queixa que pasou por Xunta de Goberno Local de 29 de outubro deste mesmo ano, solicitando que non se volva a instalar un circo alí.

Sen embargo semella que Fole está ampliando a súa rede de colectivos aos que non fai nin caso. Ademáis dos grupos políticos da oposición de Vilagarcía, aos que pretende ningunear por todos os seus medios, xa non atende nen sequera ás peticións veciñais como é o caso.

Tania García, voceira do PSdeG no Concello de Vilagarcía, plantexou hoxe que “non é comprensible que o sr. Fole non entenda que, evidentemente, a explanada do Ramal é moito mellor lugar para unha instalación deste tipo”. García apuntou que o aparcadoiro de Fexdega é o máis utilizado de Vilagarcía, porque da servizo a todos aqueles que veñen ao centro de Vilagarcía tanto para moitos dos servicios da administración (INEM, Seguridade Social…) como para facer as súas compras (praza de abastos, supermercados, centro comercial, tendas…) e por suposto aos que veñen a traballar a Vilagarcía. Para comprobar esto, os socialistas apuntaron que soamente é necesario comparar a utilización unha mañá calquera do parking de Fexdega, rozando o completo case sempre, e o do Ramal, por debaixo do 50%.

A voceira socialista pediulle ao Alcalde “que escoite, polo menos, aos veciños que lle piden que modifique algunhas decisións polo ben de todos”, e insiste en que o lóxico sería trasladar os circos ao Ramal, onde afecta moito menos aos veciños, está igual de céntrico e non afecta tanto ao aparcamento. Aínda que os socialistas se preguntan se non será que Fole está ensaiando xa métodos para que a futura zona azul de pago sexa máis rentable para o Concello. 

OS SOCIALISTAS DE VILAGARCÍA APUNTAN QUE O DESVARÍO DO GOBERNO LOCAL ESTÁ LEVANDO A VILAGARCÍA A UNHA SITUACIÓN DE CAOS INGOBERNABLE

A asamblea local aprobou por unanimidade a xestión da Comisión Executiva e do Grupo Municipal na última xuntanza do ano

Tania García anunciou a presentación dunha moción no Concello para instar ao Goberno á defensa da permanencia da fábrica de Cuca e dos necesarios postos de traballo

Vilagarcía de Arousa, 15 de decembro de 2012.- Os socialistas de Vilagarcía celebraron no día de onte a súa última asamblea do ano 2012, na que se fixo balance da actividade política da Executiva e do Grupo Municipal.

As actuacións de ambos órganos, Executiva e Grupo Municipal, foron aprobadas pola unanimidade dos presentes, que ademáis participaron dun debate sobre a situación actual de Vilagarcía e das despostas do partido socialista.

O secretario xeral municipal, Miro Serén, recolleu de entre os militantes a boa acollida que están a ter os debates organizados sobre temas de actualidade, e adiantou que o ano próximo os socialistas continuarán a desenvolver estas actividades, nas que promoverán xuntanzas e charlas sobre cuestións de interese para os vilagarciáns. Apuntou que con estas actuacións pretenden poñer sobre a mesa ideas e solucións para os grandes problemas existentes hoxe en día, en vista de que “o Goberno Local non é quen de facelo e está sumido nunha perigosa parálise”. Serén, tamén concelleiro no Pleno, valorou que os socialistas de Vilagarcía adicáronse este ano a “taponar o mal goberno e denunciar o desgoberno”.

Tania García, voceira municipal, aproveitou á ocasión para lembrar que o Grupo Socialistas no Concello é o que máis iniciativas e mocións presentou, “máis que o bipartito de dereitas, no que son ata 11 membros despois de comprar unha mayoría absoluta”, e destacou que ata os populares se ven obrigados a recoñecer o bon traballo porque moitas destas mocións son aprobadas por unanimidade. “Outra cousa é que despois teñan a cara de non cumprir o que aproban”. García exemplificou esta labor coa xuntanza que os socialistas mantiveron esta semana coa asociación de veciños de A Torre, na rolda de visitas que están a realizar a distintos colectivos veciñais. Nesta rolda “os socialistas estamos comprobando que Fole está a montar un búnker na Alcaldía, aillándose dos cidadáns”.

Moitos militantes mostraron a percepción dos veciños de Vilagarcía do desgoberno existente en Ravella, e a incapacidade dos membros do Goberno Local, apuntando a decisións e iniciativas incomprensibles como as sancións á hostelería pola Festa da Auga, o aumento das tasas municipais exponencialmente, a tristemente famosa ordenanza de movilidade, a chapuza en torno á privatización de Fexdega ou a intención actual da privatización da zona azul.

García, ademáis, anunciou novas accións como a intención dos socialistas de presentar unha moción para instar ao Goberno Local a defender a permanencia en Vilagarcía da fábrica de Cuca e dos postos de traballo, criticando a inacción de Tomás Fole que “reuniuse cos empresarios, estes dixéronlle que non fixera nada, e non fixo nada”.

OS SOCIALISTAS INSTAN AO ALCALDE A QUE POR UNHA VEZ ESCOITE Á OPOSICIÓN E AOS COLECTIVOS E RENUNCIE A IMPLANTAR A ORA NA ZONA AZUL

Os socialistas pídenlle que mire o programa electoral do PsdeG-PSOE das pasadas eleccións municipais para extraer ideas sobre o aparcamento

Vilagarcía de Arousa, 08 de decembro de 2012.- Os socialistas de Vilagarcía recrimínanlle ao Alcalde non escoitar á cidadanía de Vilagarcía. “Parécenos incomprensible que diga que a medida que pretende implantar, a ORA, é positiva para os comerciantes, xa sabemos que non escoita a ninguén pero polo menos que mire a prensa a local para coñecer a opinión dos comerciantes, hostaleiros, dos cidadáns de Vilagarcía, que se manifestaron días a raíz da polémica suscitada pola intención do Goberno local de cobrar por aparcar na rúa.” Os socialitas pídenlle ao Alcalde que renuncie a esta medida recaudatoria a costa dos petos dos veciños, nun momento de grave dificultade económicas para moitas familias da nosa localidade.

Tamén lle piden ao Bipartito de dereitas “que lle bote un ollo ao programa electoral do Partido Socialista das pasadas eleccións municipais para extraer ideas para solventar o problema do aparcamento. Os socialistas plantexábamos no seu día negociar cos propietarios de solares céntricos sen uso a posibilidade de ceder o espazo para aparcamento, nun momento ademais no que a construción está en horas baixas, permitindo con ilo a disposición de amplas bolsas de aparcamento. Pouco lle podemos pedir a este goberno incapaz, que fai un ano que asumíu Fexdega e o seu aparcamento segue a estar a día de hoxe infrautilizado.”

E por último o PsdeG-PSOE de Vilagarcía, ao fío das declaracións feitas por Tomás Fole no día de onte xustificando esta medida polo mal uso que fan os condutores, lle pregunta ao Alcalde se ten pretesión de cobrar polo uso de todos os servizos e equipamentos dos que algúns veciños poidan facer mal uso. “¿Ten pensado o alcalde cobrar por estar nos xardíns se os donos dos cans non recollen os excrementos?, e se algúns nenos fan mal uso dos columpios, ¿ten pensado cobrar por utilizar os parques infantís?.

A Zona azul leva anos funcionando en Vilagarcía, sempre estivo controlada e nunca dou problemas ata a chegada do Partido Popular á alcaldía, recordan os socialistas, “¿non será que se deixou sen controlar precisamente para agora dicir que non funciona e cobrar por aparcar?”

MOCIÓN PRESENTADA POLO PSdeG-PSOE DE VILAGARCÍA PARA PRESERVAR A RIVAS BRIONES COMO SALA DE EXPOSICIÓNS

EXPOSICIÓN DE MOTIVOS

A Sala  de Exposición Rivas Briones construída no seu día polo Goberno de Javier Gago, naceu como resposta á dinámica actividade cultural de Vilagarcía de Arousa. Este espazo supuxo un cambio radical na organización e programación cultural. O importante número de artistas plásticos de Vilagarcía e doutras localidades tiñan dende ese momento un espazo onde expoñer a súa obra, erixíndose en pouco tempo nunha das salas referentes de Galicia, tanto polo número de exposicións como na calidade das obras e dos artistas que expuxeron nela.

Coa chegada do Partido Popular ao Goberno de Vilagarcía as exposicións caeron vertixinosamente tanto no número de eventos como na calidade das exposicións, devaluando así o nome da Sala Rivas Briones como espazo de promoción e proxección do arte e da cultura, que tiña gañado tras máis de dez anos de intensa actividade.

A través dos medios de comunicación o Goberno local foi desvelando a súa verdadeira pretensión, eliminar parte do espazo adicado a exposicións, a segunda planta, para adicala a outros usos. Isto contribúe unha vez máis a desprestixiar a sala, restando ademais un amplo espazo para expoñer, quedando reducida a zona de exposición exclusivamente á planta baixa o que perxudicará notablemente á actividade e ao número de obras que poidan ser expostas.

Polo exposto, o Grupo Municipal Socialista somete á consideración do Pleno esta MOCIÓN, para que este adopte o seguinte ACORDO

1º.   Preservar todo o espazo da Rivas Briones para Sala de Exposicións.

2º. Implementar o uso da Sala Rivas Briones ampliando a oferta cultural e promovendo máis exposicións de arte.

O GRUPO MUNICIPAL SOCIALISTA SOLICITARÁ A COMPARECENCIA EN PLENO DOS CONCELLEIROS DE SEGURIDADE E FACENDA PARA CLAREXAR A INTENCIÓN DE IMPLANTAR A ORA NA ACTUAL ZONA AZUL

O PSdeG-PSOE de Vilagarcía pregúntalle ao Partido Popular polas 1.000 novas prazas públicas de aparcamento que prometeu no seu programa electoral

Vilagarcía de Arousa, 6 de decembro de 2012.- O Grupo Municipal Socialista solicitará mañá por rexistro a comparecencia en pleno dos Concelleiros de Seguridade e Facenda, Cholo Dorgambide e José Manuel Pardal para que dean explicacións sobre a inteción do Goberno de implantar o sistema de pago por aparcar na rúa, a ORA, na actual Zona Azul. “Ante o oscurantismo e a inconcreción do Goberno, os socialistas pediremos toda a información, tanto técnica como económica, sobre esta medida aos concelleiros, aínda que por respecto á cidadanía esperamos que o Goberno deixe de estar agochado, dea a cara e as oportunas explicaciñons canto antes sobre este asunto que os socialistas consideran un atraco á cidadanía”

Os socialistas de Vilagarcía vanlle preguntar ao Partido Popular polo seu compromiso de campaña de poñer a disposición dos cidadáns 1.000 novas prazas públicas de aparcamento. Unha vez máis e como en todos os ámbitos, os populares minten aos veciños en campaña e despois fan todo o contrario ao prometido.

“As únicas novas prazas que se crearon en Vilagarcía foron a costa de cortar árbores (Praia Compostela) e de habilitar catro perigosos aparcamentos no medio dun vial (Praza Peixería)”.

Os socialistas recordan que as case cen prazas que se conseguiron na urbanización Villa Güimil, grazas ás xestións do concelleiro de urbanismo Jesús Paz, sendo Alcalde de Vilagarcía Javier Gago, foron pensadas no seu día para darlle cobertura aos usuarios da praia. Os socialistas non comparten a utilización dese espazo para depósito municipal, tendo ademais serias dúbidas da viabilidade técnica desta idea, e plantexan, ademais, alternativas como a utilización dunha parcela de titularidade municipal sita no Polígono do Pousadoiro.

“Co tema dos aparcamentos amósase unha vez máis a incapacidade e as falsedades deste goberno, mentindo e non dando explicacións á cidadanía sobre as súas pretensións de cobrar por aparcar na rúa, incapaces porque non son quen de solucionar o problema de aparcamento en Vilagarcía, vaia como exemplo que fai máis dun ano que o Concello asumíu a xestión de Fexdega e aínda non tivo a ben sinalizar o parking, algo que os socialistias levamos meses demandando.”

OS SOCIALISTAS CONSIDERAN UN ATRACO MÁIS Á CIDADANÍA DE VILAGARCÍA A PRETENSIÓN DO BIPARTITO DE TOMÁS FOLE DE COBRAR POR APARCAR NA ZONA AZUL

Outra das medidas que o PSdeG-PSOE denuncia é a intención do Goberno Local de cobrar pola utilización dos locais de ensaio

Vilagarcía de Arousa, 5 de decembro de 2012.- Os socialistas de Vilagarcía consideran un atraco máis á cidadanía de Vilagarcía a pretensión de cobrar por aparcar na Zona Azul. Os socialistas recordan que esta fórmula, que se empezou a aplicar sendo Alcalde o socialista Javier Gago, favorece a mobilidade e o aparcamento sen nengún custe para os cidadáns. “O goberno ocultou esta información non só aos partidos políticos, non informando desta medida en ningunha das xuntanzas mantidas coa oposición e utilizando unha linguaxe ambigua na redacción da documentación dos orzamentos, pero tamén aos cidadáns, tanto na presentación pública do orzamento como no debate plenario.”

Con esta medida o Alcalde pretende recaudar 1.500 € ao día, só por aparcar na vía pública, algo que os vilagarciáns sempre disfrutaron de xeito gratuíto, os socialistas consideran que este medida suporá tamén que moitas persoas van deixar de vir a Vilagarcía a facer as súas compras, perxudicando notablemente ao comercio local.

Ademais desta medida o Goberno prevé tamén unha vertixonosa subida na recadación por multas, por non falar das subidas de impostos e taxas. Isto amosa a incapacidade do goberno para buscar outras fórmulas para recadar ingresos, só rascando nos petos dos veciños de Vilagarcía, non tendo en conta a grave situación económica que estamos a vivir e o elevado número de desempregados que hai na nosa localidade.

Entre tanto oscurantismo, os socialistas tamén se preguntan como se pode tomar como referencia para elaborar os Orzamentos municipais a proposta dunha empresa. Os socialistas presentarán por rexistro unha solicitude para consultar toda a información referida a este asunto.

Cobro polo uso dos locais de ensaio

Os socialistas tamén queren denunciar outra medida que o Goberno local pretende aplicar o vindeiro ano, o cobro pola utilización dos locais de ensaio, polo que pretente recadar 6.000€ ao ano. De todos é coñecido o pouco ou ningún apoio que dende o Goberno local se lle está a prestar aos grupos musicais locais, non contando con eles en ningunha programación cultural, pero esta medida vai supoñer un freazo máis aos músicos locais que van ter que pagar por utilizar o auditorio para os seus ensaios, compre recordar que o sector da mocidade é un dos máis castigados polo paro e polos recortes económicos dos gobernos do PP e este é un máis.

A nefasta política do Bipartito de dereitas, reflíctese nestes orzamentos que afogan aos vilagarciáns economicamente que non ven compensado ese esforzo económico na prestación de servizos, que cada vez son menos e agora moitos deles de pago. Uns orzamentos que non aportan unha progresividade na fiscalidade, os socialistas demandan que os máis teñen máis paguen e tamén plantexan outras medidas recaudatorias (ordenanza de telefonía móbil, o cobro do Ibi á Igrexa, maior cobro de impostos ás vivendas de veraneo, de maior valor catastral, aos coches de alta gama,...). O Goberno amosa a súa insensibilidade cos problemas económicos que están a padecer os cidadáns de Vilagarcía, que con Fole pagan máis e reciben moito menos en Servizos Sociais, Eduación, Cultura,... eso si, hai cartos para pagar o burato que supón o seu proxecto para Fexdega, para equipos informáticos, publicidade, dietas para o Goberno, hinchables,...

O PARTIDO SOCIALISTA AVERGÓNZASE DA ACTUACIÓN DO GOBERNO DE VILAGARCÍA NA CHAPUZA DA CONCESIÓN DE ESPAZOS EN FEXDEGA PARA EXPLOTACIÓN PRIVADA

A cancelación do proceso por defectos de forma nas ofertas presentadas é a culminación dun proceso torpe, opaco e confuso.

Os socialistas están convencidos de que o Alcalde Fole empeñarase en volver a convocar o proceso, no que semella ter un especial interese.

Vilagarcía de Arousa, 1 de decembro de 2012.- O Partido Socialista de Vilagarcía asiste con sorpresa, e incluso con sonroxo, á finalización do proceso de concesión de espazos do recinto Fexdega para a explotación privada a través da instalación dunhas pistas de pádel no recinto.

Para os socialistas, a anulación do proceso por causa de defectos de forma atopados nas solicitudes das dúas empresas finalistas no procedimento supón un remate sonroxante a un tosco e pouco transparente camiño de erros por parte do Concello de Vilagarcía. A intención de conceder á explotación privada dunha parte do recinto Fexdega comezou hai xa un par de meses, co anuncio por parte do Concello de esta iniciativa. Este inicio xa foi calamitoso, pois o anuncio baseábase nunha “necesidade” que o propio Alcalde sinalou como moi demandada, e ante a ausencia de oferta do deporte do pádel en Vilagarcía. Sen embargo, a mesma semana deste anuncio inaugurábanse en Vilagarcía as instalacións dun centro deportivo privado en Trabanca Badiña, iniciativa empresarial dun grupo de vilagarciáns que tempo atrás consultaran co propio Alcalde sobre a posibilidade de que se fora a abrir tal proceso para concurrir á concesión dos espazos en Fexdega, o que abría a porta a interpretar a acción do Concello como unha clara competencia desleal.

Cabe lembrar tamén que o Partido Socialista, a través da súa voceira municipal e representante no patronato Fexdega Tania García, recurriu o proceso agora finalizado, presentando un recurso de reposición que apelaba a esta competencia desleal, discutía a lexitimidade dun prezo irrisorio para a concesión (1€/m2, absolutamente desproporcionado polo baixo en relación ao lugar privilexiado e os precios de mercado) e discutía que o procedimento fose convocado polo criterio de “urxencia”, non estando esta aclarada nin todavía agora ningunha razón de tal formulación. De maneira simbólica sobre o ridículo do proceso, foi incluso interpretado como “urxencia” a necesidade de incorporar rápidamente o pádel como disciplina na “temporada de inverno”, estando todavía por descubrir o carácter invernal de tal deporte. E para redondear o esperpento, o recurso de reposición presentado polo PSdeG foi respostado, sobre a competencia desleal, nos termos de que o proceso garantía a “libre concurrencia”, confundindo concurrencia con competencia sen ningún rubor por parte do señor Alcalde que sostivo na reunión do Patronato que, “ao final, veñen sendo o mesmo”.

Ante tal despropósito de proceso, os socialistas consideran que a anulación deste pode poñer un pouco de sensatez sobre a situación na que estaba a caer o patronato da Fundación Fexdega forzado pola intención do Alcalde Fole de lanzar esta idea, levado por non se sabe que intereses. O proxecto estrela do PP nesta lexislatura, adicar Fexdega para o deporte base, vese interrompido por un proceso como este, deslexitimando á Fundación de Deportes porque a ninguneou ao non pedirlle nen sequera opinión sobre unha iniciativa deportiva, facendo competencia desleal a emprendedores de Vilagarcía, retorcendo os procedimentos administrativos...

Sen embargo os socialistas observan que Fole parece ter demasiado interese en que esta iniciativa saia adiante, e a pesares do ridículo están convencidos da vontade de volver a abrir o concurso. Sen embargo, e dadas as circunstancias acontecidas e as situacións vividas, os socialistas prevén manter o seu rexeite a este proxecto de concesión dun espazo do recinto Fexdega para a explotación a través dunhas pistas de pádel por unha empresa privada. Pola non necesidade, dado que xa existen instalacións para a práctica deste deporte, porque vai contra o proxecto de deporte base en Fexdega e se acaso existiran defectos administrativos na convocatoria tamén serían obxecto da total oposición dos socialistas.

Confiando en que o resultado do proceso realizado sirva para reflexionar sobre a conveniencia de volver a iniciar este intento de concesión, os socialistas fan un chamamento á cordura para que Tomás Fole non entre nunha deriva de xestión orientada a non se sabe ben que.