Tania García aplaude a decisión do Alcalde de facerlle caso e retirar a decisión de implantar a zona de azul de pago

Os socialistas preguntan, sen embargo, que pasa agora co orzamento no que constaba a previsión económica de ingresos a través da zona azul

O PSdeG consideran unha desautorización ao concelleiro de tráfico, Cholo Dorgambide que dixo que ía “poñer todo o seu empeño en sacar adiante” a zona azul

Vilagarcía de Arousa, 23 de febreiro de 2013.- A intención do Alcalde de Vilagarcía de retirar a súa decisión de implantar a zona azul de pago por aparcamento é, para os socialistas de Vilagarcía, unha rectificación que “chega tarde, pero chega”, segundo manifestou Tania García hoxe. “Dende o Partido Socialista consideramos, obviamente, que a non aplicación desta medida é positiva. Sen embargo o que tamén consideramos é que non foi retirada ata que chegamos a un punto de indignación cidadá inaguantable, e para iso houbo que aguantar a lamentablemente habitual actitude do Alcalde de facer as cousas a golpe de puntos suspensivos”. Lembran os socialistas que foron o único grupo político que presentou xa no seu día alegacións contra os orzamentos, e específicamente contra a partida que indicaban a previsión de ingresos. Precisamente neste punto Tania García sinalou algúns dos problemas que xurden agora con este paso atrás de Fole: “a estratexia do cangrexo conleva algunha problemática, xa que agora están aprobados uns orzamentos que prevén 250.000€ de ingresos a través deste sistema e que agora non existirán”, e non dubidou en sinalar que as presas amosadas ao inicio evidencian que Fole foi un “temerario” nas súas previsións.

Ademáis dos problemas orzamentarios, Tania García cree que Fole debe dar resposta aos problemas de deslexitimación que se xeran dentro do seu propio Goberno, xa que “o concelleiro Cholo Dorgambide manifestou que poría todo o seu empeño – literalmente – en sacar adiante a proposta da zona azul de pago”. A decisión actual deixa a Cholo absolutamente desautorizado dentro do equipo de Goberno, e García Sanmartín se pregunta se isto vai dar lugar á enésima crise de Goberno.

Por último, os socialistas consideran que todo este caótico proceso tampouco foi resolto de todo correctamente polo Alcalde, ao que reprochan que non convocase aos grupos políticos para trasladarlle esa decisión. “Vemos que ao final o Alcalde tivo que tomar unha decisión que os socialistas xa lle transmitimos hai tempo. Se o final vai facer o que nós lle dicimos, podía aprender e convocarnos algunha vez para reflexionar e tomar decisións sobre os temas ou, polo menos para informar aos grupos da oposición das súas decisións”, concluíu Tania García.

Tania García afirma sentirse “preocupada” pola situación de Vilagarcía ante un goberno “desnortado, en guerra contra os cidadáns”

A voceira socialista critica a “estratexia do cangrexo” ao retirar do pleno o regulamento de instalacións municipais

Os socialistas piden ao Goberno Local que reflexione sobre a conveniencia de pechar negocios nesta época de crise

Vilagarcía de Arousa, 21 de febreiro de 2013.- Os socialistas de Vilagarcía, a través da súa voceira municipal, amosaron hoxe a súa “preocupación pola situación actual do goberno de Vilagarcía” ao que calificaron de “desnortado” e de estar “en guerra contra os cidadáns”.

Estas declaracións xurden a partir das decisións que os socialistas coñeceron no día de onte. Por un lado a retirada da orde do día do pleno, por parte do goberno local, da aprobación do regulamento de utilización das instalacións municipais, que prevía o cobro polo uso de instalacións culturais. A crítica que, entre outros, o Partido Socialista plantexou a este regulamento e á súa falta de concreción sobre o importe das taxas e os criterios para cobrar, fixo ao Goberno Local aplicar “a estratexia do cangrexo”, en palabras de Tania García, “que xa utilizaron outras veces como aquel ridículo de aprobar unha ordenanza de mobilidade que impedía andar en patinete ou reunirse tres persoas nas beirarrúas, pero sair do pleno dicindo que o Goberno ía enmendar a ordenanza que acababan de aprobar”. Ao fío desta situación, os socialistas reiteran, como xa solicitou García Sanmartín na xuntanza de voceiros do pasado luns, que ademáis de retirar do debate plenario o regulamento, debería estar acompañado pola ordenanza fiscal que regule o prezo dos locais. “Xa que o alcalde fixo caso parcial ao PSdeG ao retirar o regulamento do debate do pleno, pedímoslle que faga caso completo e presente tamén a ordenanza fiscal cos prezos que o goberno propón”.

 “Se tiveran pensado no mecanismo normal de funcionamento”, continuou a socialista, “podíamos ter falado antes o grupos políticos, e convocar a entidades e asociacións implicadas para que deran a súa visión sobre o tema” Como exemplo dende o PSdeG sinalan que “é normal falar de cobrar por certo tipo de actos, como os de empresas privadas ou os que teñen ánimo de lucro, pero non a outros que organizan colectivos que, moitas veces, fan labores que complementan espazos aos que non chega a administración”.

Por outro lado, o PSdeG tamén coñeceu onte a decisión do alcalde Tomás Fole de pechar varios locais de hostalería de Vilagarcía. Dende a formación socialista consideran esta medida como “unha declaración de guerra contra os seus propios veciños”, e valoran que “pechar un local de hostalería, na situación económica actual, supón un perxuizo que o alcalde probablemente non sabe valorar”. Sinalan ademais que a época de peche collerá integramente a Semana santa, que supón o único balón de oxíxeno para a hostelería entre carnavais e verán, co cal o dano se agrava. “Este tipo de actitudes do goberno”, apostillou Tania García, “como pechar locales de hostelería, recriminar aos comerciantes as críticas á zona azul ou chamar vagos aos policías locais amosan unha concepción do poder que resulta inaceptable”.

Os socialistas invitan ao goberno a que se deteña e reflexione, pedindo opinión aos demais grupos, para reencamiñar a xestión municipal por outras vías e con outras formas. “Os socialistas estamos á disposición do Goberno Local para favorecer que Vilagarcía non entre nunha espiral de desgoberno”.

O PSdeG de Vilagarcía denuncia a intención do Goberno Municipal de cobrar polo uso das instalación culturais

O bipartito de dereitas pretende aprobar un regulamento de utilización de instalacións culturais sen ter dialogado cos demais partidos e cos colectivos máis implicados

O Goberno Local pretende que o Pleno aprobe a posibilidade de cobrar sen información da tabela de prezos, que decidiría despois o PP

Vilagarcía de Arousa, 19 de febreiro de 2013.- O Partido Socialista de Vilagarcía considera “un erro grave”, en palabras da voceira municipal Tania García, a intención do Goberno Local de aprobar un regulamento de utilización de instalacións culturais que ten como finalidade cobrar pola utilización de instalacións municipais. Dende o PSdeG valoran que esta decisión supón un ataque frontal ao eido cultural, sector que está xa a sofrer gravemente as políticas de recorte do PP e que tomaron forza co indiscriminado aumento do IVE cultural ata o 21%.

De maneira específica os socialistas creen que este tipo de regulamentos, que afectan a instalacións municipais como é o caso, deberían intentar ser consensuados cos demáis partidos políticos e cos colectivos implicados, neste caso as entidades culturais, asociacións, grupos de música, asociacións veciñais, etc. O regulamento afectará a locales como o Auditorio, a Sala de Exposición Rivas Briones, o salón García, a Praza da Peixería, os locais de ensaio e outros espazos utilizados por colectivos que non puideron aportar ningunha idea sobre posibles melloras na súa xestión. “Se así fora”, apuntou Tania García, “os membros do Goberno Local podíanse ter encontrado con algunas ideas interesantes que circulan entre persoas do sector. Ou podiamos ter falado de cobrar cando se realicen actividades con ánimo de lucro pero non cando non o teñan, porque resultaría difícilmente explicable cobrar pola utilización de espazos públicos a asociacións e colectivos que realizan tarefas non de lucro e que repercuten positivamente na sociedade e que complementan as posibilidades que ofrece a administración pública”.

Tania García expresou hoxe a idea dos socialistas de que “o concepto de xestión que parecer ter o señor Fole como Alcalde non é optimizar os recursos existentes, senón arreglar todo a golpe de taxa ou imposto. E que paguen os cidadáns, que parecen ser o saco sen fondo do que o PP pretende obter cartos”. García lembrou así a suba de impostos municipais que chegará ata un 30% e que aprobou o bipartito local, ou a recente intención de cobrar por aparcar na rúa que o PP quere implantar con todo o seu empeño, a pesares da oposición de cidadáns, hostaleiros e comerciantes. “Para gobernar así, vale calquera” sentenciou a voceira socialista, que engadíu que “para o PP xuntar o eido cultural e o público nun mismo concepto supón para o PP como xuntar a fame e as ganas de comer. Estaba visto que o atacarían”.

Por último, “e para redondear”, o bipartito local levará a pleno este regulamento sen proposta de prezos, co que pretende aprobar que se cobre por utilizar e, despois, decidir os prezos. Os socialistas demandan a información completa para coñecer as intencións do Goberno Local, e avisan ao PP de que intentar aprobar novas cargas para os cidadáns sen decir canto será o que se cobre semella unha táctica un tanto “incomprensible”. 

O PSdeG insta ao Alcalde Tomás Fole a evitar os “disparos a discreción buscando culpables de todos os seus propios males”

A marcha de Marta Rodríguez é, para Tania García, “unha mostra de que no Alcalde xa non confían nin os seus”

Vilagarcía de Arousa, 16 de febreiro de 2013.- Os socialistas de Vilagarcía, a través da súa voceira municipal Tania García, chamaron á reflexión hoxe al Alcalde Tomás Fole para que “abandone a súa posición habitual dos últimos tempos de botarlle a culpa de todo aos demáis”, como consideran os socialistas que ven facendo coas decisións máis polémicas e pouco aceptadas dos últimos tempos.

Os socialistas consideran que declaracións públicas do Alcalde como as que se lamenta das críticas ao proxecto da privatización de parte de Fexdega para a instalación dunhas pistas de pádel e sinala que por culpa diso as empresas poden estar buscando outras solucións, son precisamente posicións que contribúen aínda máis á falta de seriedade do Goberno Local, “único causante dos problemas que Fole pretende botarlle aos demáis” segundo Tania García.

A socialista apuntou que “os socialistas vamos defender as cuestións que consideremos positivas para Vilagarcía, pero ese criterio non o vai marcar un Goberno no que xa non cre ninguén”, e considerou que as palabras de Fole “demostran que non entendeu nada do que está a ocorrer”. Segundo os socialistas, o Goberno Local tivo problemas para sacar adiante ata o de agora os seus proxectos, a pesares de ter maioría absoluta no pleno do Concello gracias ao bipartito con IVIL, porque son ideas que non convencen a ninguén. “Sen embargo”, apuntou Tania García, “Fole di que a xona azul é moi boa e os hosteleiros e comerciantes teñen que reflexionar porque están equivocados; o seu socio de Goberno argumenta di os policías son todos uns vagos e por eso non funciona o sistema actual; Fole empéñase no proxecto das pistas de pádel e se non sae adiante di que é bo e que os demais estamos fastidiando o proxecto, pero ningún membro do padroado de Fexdega votou a favor salvo o propio PP… Un desastre”.

Goberno en descomposición

Froito desde “desgoberno” que observan dende o PSdeG se dan as situacións nas que o Goberno Local vai mudar unha vez mais. Lembran os socialistas que a conformación do bipartito (“comprando unha maioría absoluta enviando a Rivera Mallo ao Senado”) xa produciu un cambio no Goberno Local, e o enfrontamento de Fole con algúns dos seus membros; lembran tamén a dimisión de Garrigós, e tamén a reordenación de áreas posteriores que para os socialistas evidenciaban “que o PP non tiña, nin ten, capacidade suficiente para asumir as responsabilidades de Goberno”. Agora a máis que previsible marcha de Marta Rodríguez de Vilagarcía, que era presentada como un dos grandes valores deste equipo do PP, amosa que “o Goberno Local está en descomposición, e despois de comprobar como o Alcalde non convence a ninguén axente social nin á cidadanía dos seus proxectos, agora xa non van quedar no Goberno nen a fichaxe estrela que era o exconcelleiro de deportes Garrigós nen a suposta gran baza política que era Marta Rodríguez”.

Unha vez máis, García Sanmartín volveu a plantexar a Tomás Fole que “reflexione sobre a súa posición e comece a facer caso a moitas das propostas que lle facemos para mellorar a gobernabilidade de Vilagarcía, que hoxe está ameazada”.

Os socialistas de Vilagarcía consideran a actitude de "comercial" de feiras de Tomás Fole como unha evidencia do nulo proxecto real para FEXDEGA

O Alcalde de Vilagarcía eríxese agora como promotor feiral para intentar resolver o que antes estropeou

Critican unha vez máis o esperpento no que se está a convertir a situación do recinto feiral

Vilagarcía de Arousa, 12 de febreiro de 2013.- A xestión do recinto feiral FEXDEGA esta vivindo episodios de "auténtico esperpento", segundo declaraou hoxe Tania García, portavoz dos socialistas no Concello de Vilagarcia. 

Despois de contemplar como ata a Cámara de Comercio, impulso de Fexdega, abandoaba ao Alcalde no seu empeño de utilizar FEXDEGA como patio particular, a pesares das críticas recibidas dende todos os ámbitos, agora o propio Alcalde pretende resarcirse das críticas exercendo de comercial de feiras para auto xustificar a posición do PP sobre o recinto feiral. Mentras os populares declaraban constantemente que a actividade feiral no recinto caía en picado e que iso xustificaba o seu uso como recinto deportivo, agora Tomás Fole, ante a máis que probable perdida da feira do motor pola ausencia e apoio inicial por parte do goberno local que el mesmo preside, pretende erixirse agora en Salvador da actividade feiral pretendendo exercer de comercial no nome de FEXDEGA. 

Os socialistas recordaron hoxe que a actividade feiral de FEXDEGA, sendo necesariamente compatible con outros usos como sinalaron xa en campaña electoral (eventos deportivos, culturais, congresos) e que agora o PP copia como idea, aínda ten posibilidades de ser importante e frecuente. Pero para isto os socialistas consideran catastrófico todo o proceso que o PP provocou co recinto, asumindo a xestión por parte do Concello e o despido dos traballadores que eran os que mantiñan e tiñan capacidade de realizar a xestión de feiras. Se o PP non tivera entrado nesta espiral de insensatez non sería necesario agora que o Alcalde exercera de representante, senón que FEXDEGA tería actividade feiral compatible con outros usos.

Con todo, Tania García recordoulle hoxe ao Alcalde que a "maravillosa xestión provocou que FEXDEGA costara ás arcas municipais preto de cen mil euros en 2012. Ese gasto a maiores que está asumindo o concello provoca a falta de medios para o mantemento doutras instalacións municipais como as pistas de atletismo de Fontecarmoa ou o pabillón de Castelao, que adoecen de deficiencias importantes.

E todo para sacar adiante o empeño de Tomás Fole, privatizar unha cuarta parte do recinto durante dez anos, para que unha empresa o explote coa instalación dunhas pistas de pádel a cambio dun canon que non cubriría, sequera, os gatos en enerxía eléctrica que xenera o pavillón”. Un prezo a toda vista irrisorio, en opinión dos socialistas. "Todo un prodixio de xestión" añadíu García, "do que estamos convencido que aínda non sabemos todo e do que teremos máis capítulos inexplicables.

O PSdeG de Vilagarcía reclama o acceso á información sobre a instalación da pista de xeo na praza da peixería, que xa solicitaron hai tempo sen recibir contestación

Estiman que o custe para o Concello foi moito maior do publicitado, o cal podería ser unha das razóns para ocultar información. “Se non hai nada que ocultar, non debería haber problema en facilitar a información” sinalou Tania García

Os socialistas alertan de que esta negación da información é vulneración dun dereito fundamental

Vilagarcía de Arousa 9 de febreiro de 2013.- Os socialistas de Vilagarcía seguen á espera da información referida á instalación dunha pista de xeo na praza da peixería de Vilagarcía durante os pasados meses de decembro  e xaneiro. Con respecto a esta actividade a voceira municipal dos socialistas, Tania García, solicitou os datos referidos a esta instalación e os gastos en consumo de enerxía de eléctrica que supuxo ao Concello xa o pasado 21 de xaneiro mediante instancia por rexistro xeral do Concello, sen que ata o de agora fora facilitado nin un só papel ao respecto.

No seu momento, o Goberno Local fixo declaracións públicas que estimaban o custe da devandita pista en 6.000€. Sen embargo os socialistas consideran que ese custe é bastante probable que sexa máis elevado no consumo eléctrico. E aínda a esto hai que engadir os 5.000€ en entradas que o Goberno Local comprou á empresa organizadora da actividade (“5.000€ pola compra de 1.000 entradas para escolares e 500 para outros colectivos”, Xunta de Goberno Local de 14 de decembro), ademáis da posta a disposición de modo gratuíto dunha instalación pública céntrica e privilexiada durante as festas de nadal como é o caso da praza da peixería.

Os socialistas alertan de que a non facilitación de información ante a solicitude desta por parte de concelleiros municipais considérase violación dun dereito fundamental, que é o dereito ao acceso á información por parte dos concelleiros. Ante esta situación Tania García manifestou hoxe que “confiamos en que este goberno, con todos os frontes abertos de disputas que xa ten abertos cos diferentes colectivos e axentes sociais, non empece agora a utilizar tácticas que son máis do estilo Louzán ou Durán e haia que reclamarlle a información pola vía xudicial”. “Cando non hai nada que ocultar, non debería haber problema en facilitar a información”, concluiu García.

O PSdeG considera imprescindible que se convoque ao Consello Reitor da Fundación de Deportes para debatir sobre o proxecto do pádel en Fexdega

Consideran que, a tenor do tratado en ocasións anteriores neste órgano, a postura da concelleira de deportes no Padroado de Fexdega debe estar vinculada á postura que adoite o Consello Reitor

A petición maioritaria dos membros do Consello foi que os temas deportivos sobre Fexdega se debatisen nos órganos da Fundación de Deportes

Vilagarcía de Arousa, 7 de febreiro de 2013.- Os representantes do PSdeG no Consello Reitor da Fundación de Deportes, Miro Serén e Julio Torrado, expresaron hoxe a súa confianza en que a concelleira de deportes, Elena Suárez, convoque de maneira extraordinaria ao Consello Reitor da Fundación de Deportes se o Goberno Local decide abrir novamente o proceso de privatización de Fexdega para a instalación dunhas pistas de pádel.

Os socialistas lembran que no primeiro intento do Goberno por sacar adiante esta proposta a Fundación foi absolutamente ninguneada, ao non ser convocada nin con carácter consultivo nin para a toma de decisión con carácter vinculante. Lembran, ademáis, que existíu unha convocatoria “forzada polos clubes utilizando a posibilidade que recollen os estatutos” e que o Goberno Local retrasou ata celebrala despois de que o patronato de Fexdega tratara o tema con anterioridade, polo que a xuntanza do Consello Reitor non tivo ningún efecto. E tirando do recollido naquela reunión, os socialistas tamén recordan que a xuntanza servíu para que varios dos presentes demandaran a necesidade de aclarar a relación entre a Fundación de Deportes e a Fundación Fexdega, incluso coa sinatura dun convenio, para evitar aquelas situacións acontecidas anteriormente.

Apelando a aquel proceso, Serén e Torrado argumentan que a Fundación de Deportes terá extraído as conclusións necesarias para non cometer outra vez os mesmos erros, e desta volta non tentará de evitar que a Fundación se pronuncie. Agardan, ademáis, que a posición da concelleira de deportes na súa labor de representación no Padroado da Fundación Fexdega sexa vinculada á decisión que os membros do Consello Reitor tomen na súa xuntanza. Non sería a primeira vez, segundo argumentan dende o PSdeG, xa que en abril de 2012 foi tratada no Consello Reitor da Fundación unha proposta de concesión de espazo no mesmo recinto Fexdega a unha entidade deportiva privada, o Consello Reitor foi convocado para debater sobre o asunto e a decisión tomada foi acordada como “vinculante”, o cal foi refrendado pola unanimidade dos membros do Consello, incluída a actual presidenta da Fundación Elena Suárez. Así se realizou e a postura que o concelleiro de deportes naquel momento, Luis Garrigós, adoptou no Padroado de Fexdega respondeu ao acordó tomado no Consello Reitor.

Por todo isto, Miro Serén resumiu a postura dos socialistas manifestando que “confiamos en que se convoque, en tempo e forma esta vez, ao Consello Reitor da Fundación de Deportes. Agardamos ter toda a información sobre o proxecto que se pretende propor, e supoñemos que servirá para vincular a postura que adopte a concelleira-presidenta da Fundación de Deportes na súa labor de representación no Padroado de Fexdega”. 

O PSdeG chama a unha reflexión sobre Fexdega “serena, pausada e lonxe de empecinamentos persoais inexplicables”

Os socialistas creen que sería positivo reunir ao Consello Económico Social, e recabar opinión de antigos responsables de Fexdega, para buscar entre todos unha saída útil para o futuro de FEXDEGA

Vilagarcía de Arousa, 6 de xaneiro de 2013.- O anuncio da renuncia da Cámara de Comercio a seguir formando parte do patronato de Fexdega supón “unha chamada de atención máis sobre a situación que o recinto ferial Fexdega está a sufrir nos últimos tempos”, en palabras de Tania García, voceira municipal do PSdeG no Concello de Vilagarcía e membro do patronato da Fundación Fexdega. Esta valoración chega despois de que os socialistas xa manifestaran constantemente as súas discrepancias co proceso que vén levando ao Alcalde de Vilagarcía, Tomás Fole, de tentar de sacar adiante o proxecto da instalación dunhas pistas de pádel no recinto Fexdega. Esta idea non prosperou xa en dous intentos anteriores, e un deles previa votación no propio patronato no que soamente apoiaron o proxecto os membros do PP no Concello. Coa incorporación de dúas persoas representantes da Deputación de Pontevedra, entidade que non aporta nin un céntimo a Fexdega, o PP presente sacar adiante unha privatización dun recinto público basándose únicamente nunha entente Louzán – Fole.

Os socialistas consideran que o esperpento neste procedemento, que achacan a un sorprendente empecinamento persoal de Fole en que unha empresa privada utilice Fexdega para o seu negocio, está a poñer en risco todo o desenvolvemento histórico do recinto ferial e o seu futuro uso no sentido en que foi concebido. Dende o PSdeG observan como “o PP quixo entender que un resultado electoral validaba que podían facer o que lle daba a gana, a pesares da oposición dos axentes sociais de Vilagarcía, e así o están a aplicar tamén en Fexdega”, expuxo García, quen engadiu que “facer que o recinto se convertirá nun pavillón deportivo, co custe económico que ten para o Concello en gasto directo e en investimento que deixa de ingresar ao non fomentar a actividade ferial, non foi unha idea que contara coa nosa aprobación. Dende logo, menos vai contar co noso apoio privatizar unha parte importante para que unha empresa veña a facer competencia desleal a Vilagarcía e baixo unhas condicións moi ventaxosas”.

Por todo iso, e ante a deriva que está tomando a situación co abandono do patronato por parte da Cámara, e o rexeitamento social ao proxecto e formas en que se está levando a cabo, os socialistas manifestaron hoxe que consideran necesario “abrir o debate sobre Fexdega para encontrar unha solución conxunta de todos os veciños de Vilagarcía, e non só a solución dunha persoa soa”. A voceira municipal explicou que “no PSdeG consideramos que é hora de facer política entre todos e para todos, e creemos que é momento de que abramos realmente un debate sobre o futuro que queremos para Fexdega. Agora é unha instalación municipal, e por moito que poidamos considerar eso un acerto ou un erro, é a situación que temos que afrontar. Un recinto como este non pode estar para as decisión particulares de ninguén. Hai que superar criterios persoais”. Por todo isto dende o PSdeG, a través de Tania García, manifestaron que”convidamos ao Alcalde a que convoque ao Consello Económico e Social, para que todos os axentes sociais esteann implicados nunha decisión deste calibre, e tamén que contemos coa participación dos anteriores responsables do recinto e cos anteriores rexidores municipais tamén para ter a visión máis ampla posible e tomar a mellor decisión posible”. 

Os socialistas califican de inmoral que Fole intente de novo sacar adiante a privatización de Fexdega para instalar unhas pistas de pádel dunha empresa

A intención de Fole pasa por incluír no patronato de Fexdega a dúas persoas que non son de Vilagarcía, en representación da Deputación que non aporta nin un céntimo, para decidir sobre algo que os lexítimos representantes de Vilagarcía xa rexeitaron

Dende o PSdeG se preguntan por que esta actitude teimuda do Alcalde en apoiar este proxecto

Vilagarcía de Arousa, 5 de febreiro de 2013.- A información difundida no día de hoxe sobre a intención do Alcalde de Vilagarcía, Tomás Fole, de rescatar o proxecto da privatización de Fexdega para a instalación dunhas pistas de pádel a cargo dunha empresa, volve a poñer sobre a mesa o concepto da irresponsabilidade política que vén aplicando o PP de Vilagarcía dende o Goberno Local.

Nos últimos meses foron perfectamente coñecidas pola cidadanía as intencións do Alcalde Tomás Fole de levar adiante o proxecto de privatizar o 25% do recinto ferial de Fexdega para que unha empresa instale unhas pistas de pádel para negocio privado. E foron igualmente coñecidos os sucesivos fracasos que esta intención sufríu. Primeiramente por erros no procedemento, que invalidaron todo o primeiro concurso. Naquel procedemento xa foron vergonzantes as formas adoptadas polo Alcalde e o Goberno Local, ninguneando á Fundación de Deportes que unicamente foi convocada porque así o forzaron os clubes deportivos de Vilagarcía contra a vontade do Goberno Local. Nun segundo intento, nunha persistencia e cabezonería sorprendente para sacar adiante un proxecto empresarial privado, foron os propios membros do Patronato de Fexdega os que non apoiaron a proposta do Alcalde votando en conta da apertura dun novo concurso.

Sen embargo, non resulta suficiente para o Alcalde que o máximo órgano de decisión sobre o recinto, e que representa a sectores e implicados na vida económica de Vilagarcía como os empresarios, o pequeno comercio ou NovaGaliciaBanco, ademais dos representantes dos partidos políticos, tumbara a súa proposta. Cabe recordar que únicamente os representantes do PP votaron a favor daquel proxecto, sen recabar ningún apoio máis. Agora os socialistas asisten con preocupación e indignación á intención de Fole de terxiversar aquela vontade conxunta, e todo para facilitar un negocio á empresa privada que se faga coa concesión. Tania García, voceira do grupo socialista municipal e representante do PSdeG no patronato de Fexdega, resumíu a postura socialista explicando que “o modo atopado por Fole resulta inmoral e insultante, xa que en indignante complicidade coa Deputación de Pontevedra o patronato incluirá a dúas persoas, que non son de Vilagarcía e que representarán a un ente que non aporta nin un euro á Fundación Fexdega, para que amañen unha decisión que hipotecará unha instalación municipal que se sostén con medios municipais durante dez anos e practicamente eliminará a posibilidade da celebración de ferias e eventos no recinto”.

Todo esta patraña de procedemento parte, ademáis, dunhas premisas que no principio foron ofrecidas como razóns indiscutibles, e que pasaban pola necesidade de buscar fórmulas de financiamento para Fexdega debido ao carácter deficitario do recinto. Este argumento, que deixa en evidencia ao propio Goberno porque amosa o negativo da decisión de permitir á Xunta desentenderse de Fexdega, está agora mesmo fora de lugar xa que é público que o Ministerio de Facenda devolverá 700.000€ máis intereses (co que poden sumar preto dun millón de euros) á Fundación pola devolución do IVE das obras de construción. “Eses fondos desarticulan a idea de que privatizar Fexdega é necesario, e dan ademáis a posibilidade de que entre todos podamos contribuír a definir que queremos para Fexdega e que decisión debemos tomar. É necesaria unha planificación na que todos esteamos dacordo, pensando nos cidadáns de Vilagarcía e non en algunha empresa de fora para que faga os seus negocios”, sinalou Tania García.

“En definitiva” – continuou García – “Fole quere implantar o pádel en Fexdega a golpe de puntos suspensivos, que é a única maneira de facer as cousas que sabe este Goberno”. Os socialistas lembraron que xa nas últimas semanas véñense facendo modificacións na superficie de Fexdega para deixar libre o espazo para as futuras pistas de pádel, sen estar convocado o procedemento. “Síntense por encima da lei, por encima do ben e do mal”, indicou a voceira socialista, que anunciou que “volveremos a estar en contra, porque esto é unha decisión errada para Vilagarcía, porque é opaca, porque non entendemos a teima do Alcalde, porque se está a cometer un desprestixio das institucións ao terxiversar votacións incluíndo novos membros ao gusto de Fole e Louzán”.

Os socialistas de Vilagarcía denuncian a supresión de recursos sanitarios ante a pasividade do Goberno Local

O servizo de neuropediatría do Hospital do Salnés e a supresión do servizo médico en Vilaxoán foron eliminados deixando sen asistencia a moitos veciños de Vilagarcía e Comarca

Vilagarcía de Arousa, 04 de febreiro de 2013.- Os socialistas de Vilagarcía denuncian a supresión de recursos sanitarios en Vilagarcía, ao fío do anuncio, sen previo aviso, da supresión do servizo de neuropediatría do Hospital do Salnés. Este servizo levaba máis de dez anos funcionando no Salnés e agora se suprime, obrigando ás familias de Vilagarcía e Comarca a desprazarse a Pontevedra.

Outro claro exemplo desta supresión de servizos é a ausencia de médico no consultorio de Vilaxoán, que leva varios días sen facultativo porque o SERGAS non cubre a baixa ante a baixa do titular, obrigando aos veciños de Vilaxoán a desprazarse ao xa saturado Centro de Saúde de San Roque.

Con este tipo de medidas os socialistas denuncian que o PP, a través das decisión na Xunta de Galicia, e coa fatal complicidade de Gobernos locais do Partido Popular, como o de Vilagarcía que asisten impasibles a un desmantelamento do servizos sanitarios e non levanta a voz defendendo aos vecinos, está a deixar en estado de precariedade a atención sanitaria cidadá. A inevitable perda de calidade, pola merma de recursos, que está a sufrir a atención sanitaria é inaceptable para todos os cidadáns de Vilagarcía e da comarca de Arousa, que observan como despois o PP pretende xustificar medidas privatizadoras do ámbito sanitario apoiándose na ineficacia do sistema actual, cando son estas medidas drásticas as que dificultan unha asistencia de calidade que agora se sostén gracias ao traballo impagable dos profesionais.

Os socialistas denuncian a pasividade do Goberno local de Vilagarcía, especialmente do Alcalde, que lonxe de defender os intereses dos veciños de Vilagarcía e reclamar que se manteñan os recursos sanitarios, adoita, unha vez máis, a estratexia do avestruz, agocha a cabeza e acepta as decisións do seu partido no Goberno da Xunta. No caso concreto da ausencia de médico no consultorio de Vilaxoán, aos socialistas parécelles unha tomadura de pelo. “¿Que foi daquela promesa electoral de facer un centro de saúde en Vilaxoán, para descentralizar os servizos?”, pregunta a portavoz socialista no Concello de Vilagarcía, Tania García. “O Partido Popular tratou de enganar aos veciños con falsas promesas dun centro de saúde e agora nin cubre a baixa do médico. Pedímoslle ao Alcalde de Vilagarcía, Tomás Fole, que dunha vez se poña a traballar en defensa de Vilagarcía e non permita a perda de recursos sanitarios en Vilagarcía”, concluiu García, que lembrou que esta situación tería sido resolta se o PP tomara o proxecto que o Partido Socialista tiña elaborado para construír un novo centro de saúde na Comandancia de Marina, amplo, accesible,… no terreo xa cedido para esa infraestrutura. 

Dende o PSdeG manifestan a súa vergoña pola actitude do Goberno Local, poñendo como exemplo a Fole e Dorgambide, na xestión da polémica da zona azul

Os socialistas agardan que o Alcalde reflexione sobre a súa situación

O Grupo Socialista considera urxente arrimar o ombro ante a deriva de xestión e actitude popular, e solicita unha xuntanza urxente para afrontar o caso de Luz Salgada

Vilagarcía, 02 de febreiro de 2013.-  Dende o Partido Socialista de Vilagarcía queren manifestar a súa sensación de vergoña allea, ante a actitude que están a comprobar todos os cidadáns do alcalde Tomás Fole e do concelleiro de Seguridade cidadá, Cholo Dorgambide, pola xestión da implantación da zona azul e a pretensión de impoñer sancións a discreción, unha media de 1.000 ao día, medidas, todas estas, moi gravosas para a cidadanía.

A recente actitude de Cholo Dorgambide, acusando aos cidadáns e, sen pudor, ao colectivo de policías de vagos e de falta de actividade, cuestión que resulta máis paradóxica todavía cando el mesmo é o responsable político do corpo, sumado ás súas manifestacións de “poñer todo o empeño en que a zona azul salga adiante” amosan unha perda de sentido da realidade por parte do concelleiro. A súa actitude, obviando calquera método de diálogo e de afrontar unha situación problemática, merecen para os socialistas a dimisión ou o seu cese, como xa foi manifestado.

Pero nada máis lonxe da realidade no grupo de goberno que a vontade de resolver e tender pontes. O Alcalde Fole sorprende hoxe aos hostaleiros e comerciantes cun ataque frontal, acusando de non enterarse das cousas e de discutir por discutir. Os socialistas asómbranse de que o Alcalde non perciba que hostaleiros, comerciantes e veciños en xeral o que están a facer é intentar facerse escoitar polo Alcalde e dicirlle que a zona azul e as demais medidas que anuncian van ser un desastre para as economías locais. Tanto polo feito de pretender sancionar aos condutores a discreción e de ter que pagar por aparcar no propio pobo, como por conseguir que isto diminúa o número de persoas doutras localidades que van vir a Vilagarcía a facer as súas compras. A simpleza e contundencia do argumento é contestada polo Alcalde entrando a chamarlle a atención aos seus cidadáns en actitude chulesca e ditatorial. Cabe lembrar que Fole xa alertou a comerciantes e veciños que, con respecto á instalación de circos en Fexdega e os impedimentos que provocaba (resta de aparcamentos, cheiros,…), que “tiñan que reflexionar”. Fole, pechado no seu propio labirinto de insensateces, está a adoptar unha actitude que os socialistas consideran perigosa porque pode provocar que derive nun Goberno contra os cidadáns, e non ao seu favor, por rencor e por vontade de demostrar o poder que é o que semella estar a ocorrer co Alcalde.

Dende o Partido Socialista, a través da súa voceira municipal, Tania García, manifestaron hoxe esta preocupación e a súa vontade de “implicarnos aínda máis se cabe no traballo municipal, polo que solicitamos que se nos convoque para os temas urxentes e importantes no Concello”. Os socialistas plantexan que consideran que deben estar na toma de decisións dalgunhas cuestións, para ofrecer un punto de vista máis apegado á realidade. Esta petición iníciase polo asunto de Luz Salgada, onde o Alcalde está a ofrecer distintas versións da situación cada día. Os socialistas demandan unha xuntanza urxente de portavoces, para coñecer a auténtica realidade da situación e intentar reorientala, e confían en que exista responsabilidade por parte do Goberno Local e se afronten as situacións conxuntamente.

Os socialistas amosan a súa preocupación polo descoñecemento, por parte da concelleira de deportes Elena Suárez, do estado das instalación deportivas municipais

Resulta paradóxico que a máxima responsable das instalación teña que recorrer a persoas externas ao servizo para que lle informen

Os representantes do PSdeG manifestan que o seu único desexo é que as instalacións estean nas mellores condicións posibles, e convidan á concelleira a acompañalos nunha visita aberta a medios e a técnicos ás instalacións deportivas

Vilagarcía de Arousa, 1 de febrero de 2013.- Ante a alerta concitada polo estado das instalacións do estadio municipal de Fontecarmoa, da que se fixo eco o PSdeG de Vilagarcía, os representantes dos socialistas amosaron hoxe a súa preocupación polo descoñecemento evidenciado por parte da concelleira de deportes, Elena Suárez, sobre a situación das devanditas instalacións.

Os socialistas queren transmitir que o seu desexo é que as instalacións se manteñan no mellor estado posible, e que permitan a celebración en Vilagarcía de probas do maior nivel competitivo e se disputen nas mellores condicións. Para isto consideraron fora de lugar o estado no que se atoparon as instalacións do estadio de atletismo de Fontecarmoa o pasado fin de semana para a disputa do Campionato Galego de Combinadas, cuestión que non soamente argumentan os representantes do PSdeG por si mesmos senón que, como foi público, é tamén opinión de persoas presentes nas probas e de técnicos contrastados. Sen embargo, a única explicación que ofrece a concelleira de deportes é dicir que se reuníu cun federativo que lle asegurou que as pistas estaban ben. Resulta sorprendente, afirman os membros do PSdeG que a concelleira de deportes teña que recurrir a alguén externo ao servizo de deportes de Vilagarcía para que lle explique como están as instalacións. Os socialistas pregúntanse por que a propia concelleira non ten a posibilidade de expoñer por si mesma o criterio do estado das pistas. E, a pesares de todo, a postura do PSdeG segue a ser que o estado das instalacións deixa moito que desexar: o peche perimetral está en estado lamentable, os obstáculos da ría están abandoados, o céspede ten graves problemas, a tabla de batida en mal estado, os fosos dos saltos sen picar… A sorpresa maiúscula para os socialistas foi descubrir que a torre de control inundouse “porque chovía”, en palabras da concelleira, preguntándose se non é precisamente un problema que polo mero feito de chover se anegue unha instalación. O extremadamente grave sería que se inundase se non chovera, consideran dende o PSdeG. Aproveitan os socialistas que unha maneira de resolver estas discrepancias de criterio é que a concelleira de deportes acompañe aos membros do PSdeG a unha visita polas instalacións aberta aos medios de comunicación e a técnicos deportivos.

Aínda así, hai máis cuestións que dende a agrupación socialista de Vilagarcía manifestaron en recentes declaracións e que non foron resoltas pola concelleira, como explicar cal foi a representación institucional do Concello na proba (no inicio, na clausura,…) e por que non se traslada información tanto aos demáis membros do Consello Reitor da Fundación como ao público en xeral. Os socialistas consideran que é necesario publicitar e dar difusión á celebración de probas deste nivel en Vilagarcía, pero non parece ser o criterio da concellería de deportes.

Por último, dende o PSdeG aseguran que tanto o estadio de atletismo de Fontecarmoa, como outras instalacións municipais (poñendo como exemplo o deficitario estado do pavillón de Castelao, ao que extenden a invitación a visitar coa concelleira) merecen unha reflexión conxunta de todos os membros do ámbito deportivo de Vilagarcía, e quererían trasladar esta idea ao Consello Reitor da Fundación de Deportes pero, sen embargo, non existe reunión ordinaria para poder facelo dende setembro.