Alberto Varela reafírmase na súa vontade de ampliar as oportunidades de participación cidadá nos asuntos municipais e considera “normal” que Fole e el teñan “ideas opostas”

O candidato socialista afrontou onte a súa primeira asamblea local do PSdeG como candidato, facendo unha encendida defensa dun “cambio radical na maneira de concebir e facer política en Vilagarcía”

 Varela apunta que facilitar a participación depende “da vontade e actitude política e non de enfarragosos tecnicismos usados como escudo”

Vilagarcía de Arousa, 19 de decembro de 2014.- Alberto Varela participou onte na súa primeira asemblea local do PSdeG como candidato á alcaldía. Os militantes reuníronse na noite de onte en sesión ordinaria para aprobar por unanimidade a xestión da actual Comisión Executiva Municipal, e para valorar as oportunidades que se abren nas vindeiras eleccións municipais, sobre as que predominou a sensación de que “o cambio é posible para os veciños e veciñas de Vilagarcía”, como indicou Varela na súa intervención. O candidato socialista falou ante os compañeiros para agradecer novamente a confianza depositada nel para este vindeiro proceso, e sinalou que “o exercicio democrático tan transparente” exercido a través das primarias celebradas no mes pasado dotou á agrupación de músculo e forza para afrontar os meses que quedan. Varela apuntou que o cambio de goberno en Vilagarcía “é un desexo de todos, e todos somos necesarios para elo”, engandindo que o obxectivo de que exista, a partir de maio, un goberno “da esquerda progresista” é “difícil, pero posible”.

Na súa intervención, Alberto Varela afondou na situación “de estancamento” que está Vilagarcía achacando a responsabilidade ao actual goberno “sen ideas nen proxectos”. Dentro da súa valoración expuxo aos presentes a súa vontade de levar adiante medidas e compromisos adicados a aumentar a participación cidadá, facendo fincapé na idea que deu a coñecer nos últimos días nos medios de comunicación de evitar as decisións de veto que está a exercer nesta lexislatura Tomás Fole, e garantindo que existirá a oportunidade de levar iniciativas a Pleno e que estas terán que ser debatidas se se presentan 500 firmas ou un tercio dos concelleiros do Pleno.

Ante as declaracións públicas do Alcalde valorando esta proposta como “echarse al monte”, Alberto Varela plantexou que “a participación na política é imprescindible para manter un sistema democrático, e facilitar ou non esta participación é unha cuestión de principios, de vontade e de actitude política. Eu estou pola labor de de ampliar todas as posibilidades, e esto non é unha idea nova senón unha situación que xa tería que que ser habitual. O Alcalde actual semella estar na posición contraria”. Varela considerou que, en realidade, é “normal” que el e Fole teñan puntos de vista “opostos” sobre a participación cidadá na política, e sinalou que “polo menos o Alcalde é coherente neste punto. Veta iniciativas dos grupos políticos, non convoca órganos de xestión como o Patronato de Fexdega e agora modifica un Pleno para que solo se poda falar do que diga el. Non muda a súa postura.”

O candidato do PSdeG plantexou que os socialistas falarán tamén nesta campaña de “orzamentos participativos” e puxo como exemplo a Deputación de Lugo, onde José Ramón Gómez Besteiro puxo en marcha este sistema para que moitas poboacións decidirán parte dos investimentos do ente provincial. 

Alberto Varela propón medidas para un funcionamento máis participativo das institucións municipais

O candidato socialista á Alcaldía promoverá os cambios posibles no regulamento de Plenos Municipais para reducir a arbitrariedade do Goberno Local e favorecer as iniciativas veciñais

A idea inspírase nas ILP, e pretende facer máis participativos e abertos os debates das cuestións municipais

Vilagarcía de Arousa, 17 de decembro de 2012.- Alberto Varela, candidato socialista á Alcaldía de Vilagarcía, valorou como "empobrecedor" que "a estas alturas" exista debate sobre a existencia ou non de debate sobre mocións e iniciativas dos grupos políticos no Pleno Municipal, e a posibilidade de calquera persoa de intervir en rogos e preguntas. "O natural é que poidan existir posicións diferentes sobre as propostas e ideas que se debatan nun Pleno. O sorprendente é que en Vilagarcía a cuestión sexa que non se deixan debater", manifestou. Varela comparte plenamente as valoracións feitas no día de onte por Tania García, a voceira socialista no Concello, quen plantexou unha cuestión fundamental ao indicar que Fole pretende escapar dos debates porque intenta non expoñerse. "Non entra no meu concepto da política o feito de que os representantes da cidadanía argallen métodos para fuxir do debate. A miña idea vai no sentido contrario, e por iso plantexo propostas para afondar no dereito á participación", apuntou.

O candidato socialista manifestou a súa intención de introducir medidas e compromisos orientados a elevar a participación e diminuir as posibilidades do Goberno Local, e particularmente do Alcalde, de limitar e condicionar o debate. Inspirado nas Iniciativas Lexislativas Populares, Varela plantexa estudiar fórmulas para que as propostas de debate asinadas por un número representativo de veciños, que poden cifrarse en 500, ou un tercio dos concelleiros do Pleno, deban ser tratadas en debate plenario sen posibilidade de exercer o veto que existe agora por parte do Alcalde, quen arbitrariamente decide os temas que van ou non van a ser tratados, "guiándose por un interese persoal e partidista".

"Os socialistas temos un gusto especial polo debate e polo traballo a prol dos veciños, e o traballo do grupo municipal nesta lexistatura amósao sendo o grupo que máis mocións presentou e o que máis unanimidades conqueriu. Esto evidencia a vontade de esforzo por traballar e o acerto á hora de levar ao Pleno temas de verdadeiro interese para os veciños e veciñas", presumiu Alberto Varela, "e por iso queremos contribuir a unha política máis participativa e máis aberta. É o que a cidadanía está a demandar, e con boa parte de razón, e temos que estar en favor desas demandas e non agochándonos oscurantistamente parapetados en argumentacións difusas e inexplicables".

Na mesma liña, o alcaldable do PSdeG apuntou que "os órganos colexiados que regulan algunhas actividades públicas non poden funcionar a mercede do que queira ou non queira un alcalde. O que ocorre co Patronato de Fexdega é ridículo. Se existe un Patronato terá que ser para ter capacidade de debate e decisión, senón é unha pantomima, e non estamos para pantomimas". Así, Varela comprométese a abrir á participación dos axentes sociais e económicos a xestión pública, "pero de verdade, sen utilizalos como escudo como pasa en Fexdega ou coa Fundación de Deportes, que pasou de realizar 25 xuntanzas ordinarias no ano na lexislatura pasada a facer 3 ou 4 agora". 

Os socialistas consideran “bochornoso” o cambio do Pleno Municipal de decembro que elimina as mocións de debate, os rogos e as preguntas

O adianto de 3 días do Pleno é “unha excusa de mal pagador dun Alcalde en fuxida” apunta Tania García

Este anuncio súmase á convocatoria do Patronato de Fexdega máis dun ano despois da última xuntanza. “Ridículo”, valoran dende o PSdeG

Vilagarcía de Arousa, 16 de decembro de 2014.- Os socialistas de Vilagarcía asistiron hoxe a un “espectáculo bochornoso” por parte do Alcalde Tomás Fole, ao ser convocados para o Pleno Municipal de decembro pero, en troques de celebrarse o día 29 (último luns de cada mes) pasará a ser o día 26. Non deberá supor isto grandes alteracións, segundo opinan no PSdeG, non entando esta alteración de tres días supón para o Alcalde “a oportunidade para fuxir dos debates e das iniciativas que presentamos os demáis para debater polo interese dos veciños e veciñas de Vilagarcía”. O Pleno, segundo lles foi notificado, non contará con mocións ou iniciativas a debate nin co habitual punto de rogos e preguntas nas que pode intervir tamén non só os concelleiros senon calquera cidadán de Vilagarcía.

Esta modificación, “innecesaria pois o Pleno pode manter o carácter ordinario” é potestade do Alcalde quen unilateralmente decide transformar o Pleno nun extraordinario no que a orde do día a decide únicamente el. “Este procedemento é unha burla, e supón unha indecente maneira de agocharse dunha exposición pública que Fole sabe que é negativa para el”, indicou García Sanmartín. Os socialistas achacan este cambio de data "á nefasta xestión do Goberno Local, un goberno con  maioría absoluta, con tres persoas liberadas e un corpo de funcionarios traballando para eles, e que non foi quen de presentar os Orzamentos e as ordenanzas fiscais a tempo. Esta mala xestión, a demora permanente deste goberno  en todos os asuntos e a actitude despótica de Fole, levano a impedir a celebración ordinaria do pleno de decembro. Sinalou a voceira socialista. Ademáis para Tania García o fin último de fuxir do debate "é que p  Alcalde poida tapar as súas vergoñas e ocultar os méritos dos demáis, pois os socialistas seguemos a facer traballo por esta cidade, e sendo oposición e menos da metade de concelleiros que o goberno local somos o grupo que máis mocións presentou aos Plenos e o que máis unanimidades obtivo”. En todo caso García cree que “non hai estratexia que poida ocultar a incapacidade de Fole”.

Convocatoria do Patronato de Fexdega

No mesmo día de hoxe os socialistas foron sabedores da convocatoria do Patronato de Fexdega, máis dun ano e medio despois da súa última xuntanza, en xullo de 2013. Lembran dende o PSdeG que Tania García apuntou as, que non estaban aprobados o Orzamentos nin o Plan de actividades de 2014, cuestións que non mereceron importancia para Fole, presidente do Patronato, aínda que Fexdega fora a súa proposta estrela. Un ano despois, tras pasar un 2014 con actividades e funcionamento do recinto, pero no que non houbo nin unha soa xuntanza, vólvese convocar ao Patronato. Esto amosa, para os socialistas, que “un goberno que non convoca ao órgano que xestiona a súa proposta estrela define a esa proposta como fallida e ao goberno que a xestiona como incompetente”.

Alberto Varela mantén a súa primeira xuntanza como candidato co Comité de Empresa de Lantero

Os representantes dos traballadores agradecen o xesto e valoran a situación do conflito laboral co candidato socialista

Alberto Varela amósalles o seu total apoio e o compromiso de supeditar todo convenio urbanístico con empresas ao manteñemento do emprego

Vilagarcía de Arousa, 4 de decembro de 2014.- O recén elexido candidato á Alcaldía de Vilagarcía polo PSdeG, Alberto Varela, mantivo hoxe a súa primeira xuntanza oficial e a súa vontade foi que esta se celebrara cos traballadores de Lantero. Varela, quen acudíu acompañado da voceira municipal Tania García e o concelleiro Lino Mouriño, manifestou que, aínda que dende que o conflito se desatou ten visitado en varias ocasións aos traballadores no plante do Pousadoiro, e incluso asistido a varias das asembleas, quixo que a súa primeira convocatoria como candidato fora con eles "por solidaridade e por apoio", como el mesmo indicou. "Todo xesto de apoio é pouco cun colectivo que está defendendo exemplarmente os seus dereitos, que teñen posicións claras e firmes e que amosan un compromiso grupal emocionante", indicou Varela.

A xuntanza servíu para que os traballadores de Lantero actualizaran aos representantes socialistas do estado das negociacións e as previsións de futuro. Todos os asistentes coincidiron no desexo de que a situación se resolva canto antes, e na convición de que existen solucións que sexan válidas para todos.

Varela, pola súa parte, transmitíu aos traballadores todo o apoio dos socialistas nas accións que desenvolven, e valorou que "dende a administración municipal pódense tamén facer cousas, e ser parte importante nas negociacións. Teño claro que non é meu desexo ter que afrontar situacións coma estas sendo alcalde, pero se ocorreran tamén teño clara a miña posición. Unha administración ten que favorecer o desenvolvemento do tecido industrial, e será necesario sentarse con todas as partes e dialogar con todos, pero no caso de que me obriguen a elexir eu estarei sempre cos traballadores. E non terán que obrigarme ou forzarme para posicionarme a última hora pola presión social.". Asimesmo, o candidato socialista explicou que tanto para este, como para futuras situacións semellantes, "non haberá convenios urbanísticos posibles neste Concello se as empresas interesadas non suscriben compromisos de mantemento do emprego tanto en cantidade como en calidade". Alberto Varela aproveitou a ocasión para destacar o apoio cidadán que están tendo os traballadores de Lantero, e amosouse convencido de que vai seguir así nas vindeiras actividades como as previstas para o día 12 deste mes. "Lantero é parte de Vilagarcía, supón un elemento fundamental na nosa economía e os veciños o saben", apuntou, sinalando que "todos temos familiares, amigos ou coñecidos traballando alí, e todos sabemos que esa xente vive en Vilagarcía e tamén contribúe a activar a economía local. Por iso Lantero somos todos". 

Os socialistas afean a Fole o preocupante crecemento da súa actitude despectiva cara os demáis

A amenaza de represalias contra os traballadores que reclaman dereitos no Concello é “inaceptable”, segundo a voceira socialista

Tania García denuncia tamén que os medios de comunicación tiveron información dos orzamentos municipais antes que os grupos da oposición

Vilagarcía de Arousa, 24 de novembro de 2014.- A voceira socialista no Concello de Vilagarcía, Tania García, afeou hoxe a actitude do alcalde Tomás Fole, do que afirmou que “vai in crescendo a súa actitude despectiva cara os demáis, non sabemos onde está o límite”. García fixo referencia a dúas cuestións que saltaron aos medios neste fin de semana, como son os avisos de represalias contra traballadores do Concello por denunciar incumprimentos dos seus dereitos laborais, e a presentación pública dos orzamentos sen facilitalos á oposición.

Acerca da polémica xurdida cos traballadores do Concello, García Sanmartín lamentou que cando os traballadores reclamen os seus dereitos o alcalde ameace con despedilos. “Que idea ten Fole dos dereitos dos traballadores?” preguntouse Tania García. “Ameazar con despidos a traballadores porque reclamen o cumprimento da lexislación en materia de saúde laboral é unha actitude absolutamente inaceptable". García apunta que Fole o que ten que facer "é atender aos informe técnicos e tomar a decisión máis favorable para garantir a seguridade no traballo do persoal do concello. Para os socialistas esta actitude déspota co persoal do concello explica a súa total falta de apoio aos traballadores involucrados nos dous conflitos laborais máis importantes dos últimos tempos en Vilagarcía, Cuca e Lantero. "Fole actúa coma o típico empresario despiadado en canto os traballadores reclaman os seus dereitos, con ameazas e represalias", sinalou a voceira socialista.

A voceira socialista apuntou tamén outro tema que amosa unha “actitude despectiva” cara os demáis, como é a presentación dos orzamentos. “Despois de escoitalo durante moito tempo na oposición berrar sobre os tempos e formas de presentación dos orzamentos, resulta que estamos agora cun goberno en maioría absoluta que ten que aprazar o pleno porque non lle dá a capacidade para presentar os orzamentos a tempo, e termina por presentalos antes á prensa que aos grupos políticos que os teñen que estudiar e debater”. García apuntou que “estamos seguros de que a Fole, sendo oposición, non lle importaría esto porque non tería vontade de traballalos, pero os demáis si o facemos” e interpretou que presentalos ante os medios antes que entregalos á oposición amosa que para Fole é máis importante a foto que os orzamentos en si.

Os socialistas presentarán unha moción ao Pleno Municipal en defensa da calidade e dos servizos do Hospital do Salnés

Dende o PSdeG denuncian, unha vez máis, os recortes en personal e servicios que perxudican a calidade asistencia, poñendo como exemplo o peche parcial da terceira planta

A iniciativa xurde da xuntanza que a voceira municipal Tania García mantivo coa Xunta de Personal do Hospital a pasada semana

Vilagarcía de Arousa, 15 de novembro de 2014.- O grupo municipal socialista de Vilagarcía presentará ao vindeiro Pleno Municipal ordinario unha moción en defensa da calidade e dos servicios do Hospital do Salnés. Os socialistas mantiveron a pasada semana unha xuntanza coa Xunta de Persona do Hospital do Salnés, para evaluar as situacións que se van producindo debido á "política voraz de recortes do PP" e as demandas dos profesionais. Os socialistas alertan que "se alguén pensaba que o desmantelamento da sanidade foron apenas algunhas decisións, soamente é necesario consultar cos sanitarios ou ter que ser atendido por algúns dos servizos do Hospital para comprobar que o ánimo destrutor do PP sigue a pleno rendemento", indicou Tania García.

Os socialistas denuncian na moción que presentarán a Pleno o peche parcial da terceira planta, que segue sen funcionar na súa totalidade, o que provoca problemas asociados. Esta infrautilización coa intención de recortar gasto provoca que se den situacións que empeoran a calidade do servizo. Como exemplo os socialistas remarcan que os Hospital ten a calificación "Hospital amigo dos nenos" pola calidade do servizo de obstetricia, por cuestións coma que as parturientas dispuxeran dunha habitación individual, cuestión que agora non se dá porque as nais están a compartir habitación, habendo camas pechadas. No mesmo sentido, a sección de paliativos retirou a cama aos acompañantes dos enfermos que están neste servicio, o que supón "unha absoluta falta de humanidade" segundo sinala Tania García. Os constantes recortes en recursos materiais e a derivación de pacientes a centros privados, "o que sí supón un sobrecoste innecesario" son outros dos elementos obxecto da moción. "O recorte en calidade e servicios supón que teñamos que pagar cantidades elevadísimas a hospitais privados para facer un servizo que, por menos gastos, podían facer os profesionais sanitarios na pública", denuncia García Sanmartín, quen apuntou que esta política de recortes agravouse cando o centro de Rubiáns se integrou na xestión do CHOP de Pontevedra, "coa pretensión do PP de que o Salnés se convertise nun ambulatorio".

Os socialistas anuncian tamén que esta moción se replicará noutros Concellos do área sanitaria do Salnés, e que irá acompañada de iniciativas no Parlamento de Galicia.

O Partido Socialista mobilizarase en pleno en apoio dos traballadores de Lantero

Estarán presentes na mobilización a secretaria de organización do PSdeG, Pilar Cancela, e a deputada Patricia Vilán, así como representantes das agrupacións da comarca

Os socialistas chaman a manifestarse a toda a cidadanía en defensa dos dereitos dos traballadores, esenciais na actividade económica da vila

Vilagarcía de Arousa, 5 de novembro de 2014.- Os socialistas de Vilagarcía mobilizaranse en bloque en apoio aos traballadores de Lantero na manifestación convocada para mañá xoves 6, ás 20h con saída na casa do Mar de Vilagarcía. A voceira municipal socialista, Tania García, explicou hoxe que o partido, en continuo contacto cos traballadores, está a mobilizar aos seus afiliados e simpatizantes para defender a un colectivo que considerou "aldraxado nos seus dereitos, e que merece todo o apoio da cidadanía". García Sanmartín sinalou aos traballadores de Lantero como "un exemplo de esforzo colectivo en defensa dos dereitos de todos, pois a loita dos traballadores redunda no beneficio común". Apuntou a voceira socialista que "o impacto que Lantero ten en Vilagarcía é fundamental, e por iso todo o que a eles lles pase repercute en todos os demáis veciños e veciñas. E se Lantero está en Vilagarcía é porque os seus traballadores rinden, son efectivos e son produtivos, como demostran os datos reais que se coñecen da produtividade da planta do Pousadoiro".

Tania García aproveitou para anunciar que na manifestación estará presente Pilar Cancela, secretaria de organización do PSdeG e "número 2 do partido en Galicia", en representación de todos os socialistas de Galicia, e tamén Patricia Vilán, deputada no Parlamento de Galicia que presentou xa iniciativas en relación ás subvencións recibidas pola empresa e os compromisos laborais aos que estas axudas poden comprometer en relación aos traballadores.

Ademáis, os socialistas da comarca estarán tamén en apoio ao colectivo de traballadores, con representantes das distintas agrupacións socialistas de Arousa, a pesares dalgunha ausencia obrigada como o alcalde de A Illa de Arousa, Manuel Vázquez, que estará no Pleno Municipal pero que terá representación a través doutros compañeiros illenses. Os socialistas pretenden así demostrar todo o seu apoio e ánimo aos traballadores que "están a sufrir un ataque inxusto e inxustificado dunha dirección que unicamente mira torticeramente os seus intereses numéricos e dunha reforma laboral que o PP aprobou a petición de empresarios como a dirección de Lantero".