Tania García explica a Llovo que os socialistas traballan na ordenanza de praias pero que tiveron que adicar moito tempo a "desvelar a corrupción dos concelleiros do PP e destapar as irregularidades urbanísticas de Fole"

En todo caso indícalle á concelleira que terá a proposta socialista para evaluar, xa que parece que non saben facer nada sen que llo faga o PSdeG

Sorpréndense que o Goberno Municipal adopte xa unha actitude de oposición cando aínda lles queda un ano e medio para saír do goberno

Vilagarcía de Arousa, 17 de xaneiro de 2014.- O Partido Socialista, por boca da súa voceira municipal Tania García Sanmartín, respostou hoxe ás declaracións feitas públicas por Rocío Llovo sobre o traballo do Partido Socialista con "estupor", aínda que asumindo que "é unha actitude propia dun goberno incapaz". García Sanmartín estrañouse de que a concelleira voceira do PP non sexa quen de reflexionar sobre que "o Goberno Municipal son 11 persoas, 3 delas liberadas entre as que está a propia Llovo, con todo o corpo de traballadores do Concello á súa disposición. No Partido Socialista somos cinco, menos da metade, e sen os medios e recursos que ten un Goberno". "Aínda así, reclámanos o traballo a nos, que entendemos como un recoñecemento de que eles non son capaces e que asumen que o PSdeG ten que tomar a iniciativa". Tania García lembrou que o seu grupo municipal é o que maior número de iniciativas presentou ao Pleno, e o que máis mocións conseguíu aprobar por unanimidade, dato que amosa xa a súa capacidade fronte á do PP a pesares de ser estes o Goberno Municipal con todos os recursos a favor.

Non entanto, a voceira municipal ironizou sobre as declaracións de Rocío Llovo e indicou que "os socialistas estamos ultimando unha ordenanza de praias adaptada á realidade de Vilagarcía, pero é que o PP andivo poñéndonos moitas tarefas e tivemos que destapar a corrupción, os desfalcos e as grandes eibas existentes no Goberno Local. E claro, son tantas cousas que tivemos que empregar moito esforzo". Lembrou a voceira socialista que o seu traballo levou á dimisión dun concelleiro por destaparse a súa apropiación de fondos públicos ("e o que aínda queda por saber dese caso", deslizou García). Tamén destacou a loita contra as irregularidades urbanísticas que promove o Alcalde Tomás Fole, a loita para que o bipartito conservador non permita que morran animais ás portas dun novo refuxio que non se abre porque Fole non quere ou o esforzo por sacar á luz a realidade das subas inxustas de impostos e taxas municipais, como se está a ver na rúa. 

En todo caso, García apuntou que "Llovo pode estar tranquila, que nós faremos o noso traballo, como xa fixemos coas anteriores ordenanzas. Incluso con alguna que o bipartito PP-IVIL votaron a favor pero dicindo que xa a ían cambiar porque estaba mal". Cree García que "o que a concelleira fai é, básicamente, expresar a incapacidade dun goberno que ten que pedir que os demais fagan o traballo". "Parece que, aínda que sexa goberno, a concelleira toma actitudes de oposición", sorprendeuse García Sanmartín, aínda que concluíu que "será que xa está practicando porque ten asumido o que todos sabemos: que en menos de ano e medio esa será a súa labor".

O Partido Socialista reprocha á concelleira Llovo que presente unha ordenanza tipo baixada de Internet

Os socialistas traballan nun documento adaptado á realidade de Vilagarcía

O abandono das praias é a nefasta política de investimentos reflicten a incapacidade do Bipartito local

Vilagarcía de Arousa, 15 de xaneiro de 2014. O Partido Socialista de Vilagarcía considerou hoxe un avance que o Concello poida iniciar un debate sobre unha futura ordenanza de praias, e felicítase por elo por ter sido “o grupo municipal que impulsou a idea e reclamou a necesidade”. Apuntan os socialistas que este paso amosa que “cando máis caso fagan dende o Goberno Municipal ás propostas que os socialistas facemos, mellor nos irá a todos”, e convida ao Goberno a que se deixe guiar polos representantes do PSdeG.

O que xa non resultou de tanto agrado para os socialistas foi que a concelleira que presentou a ordenanza, Rocío Llovo, a utilizara “como arma arroxadiza”. “A incapacidade do Goberno Local non pode levalos a utilizar calquera elemento para intentar facer oposición á oposición” apuntou hoxe Tania García, voceira municipal, quen apostillou que “semella que o equipo de goberno está máis pendente de intentar minusvalorar o traballo dos socialistas que de gobernar”. García valorou como “moi positivo” que as propostas e iniciativas dos socialistas poidan comezar a saír adiante, e apuntou que no seno do PSdeG levan tempo traballando nun documento adaptado á realidade de Vilagarcía. Consideran que é necesaria “flexibilidade que contribúa a convivencia” aínda que consideran que “é necesario protexer o uso natural da praia”. De maneira específica, García sinalou que “queremos constribuír a definir una ordenanza para Vilagarcía, que teña en consideración as cuestión particulares das nosas praias, e non unha ordenanza tipo estandarizada que pode ser aplicada aquí, en Cádiz, Benidorm ou Luarca”. A socialista tamén criticou a deixadez e incapacidade do Goberno local, “un equipo de goberno con tres persoas liberadas, cun corpo de funcionarios e técnicos á súa disposición, tarda seis meses en presentar unha moción que calquera pode baixar de Internet”.

Dende o PSdeG, sen embargo, consideran que a ordenanza de praias non pode ser tomada polo Goberno Municipal como única na acción sobre as praias. García Sanmartín apuntou que “a pesares de que agora se propoña a ordenanza, o estado da abandono e a nefasta política de investimentos evidencian a incapacidade deste goberno”. Os socialistas critican especialmente o abandono da Concha-Compostela, o paseo con moitas losetas soltas e cunha barandilla rota e a medio pintar dende maio do ano pasado. Tamén critican os socialistas a nefasta política de investimentos nos areais. “Parécenos tirar os cartos gastar máis de 200 mil en cambiar unha barandilla que está en perfecto estado na Praia do Preguntoiro, cando hai tantas necesidades que acometer. Levamos meses escoitando a Fole e ao Conselleiro de Medio Ambiente falar da eliminación de puntos de vertidos, algo fundamental para que as nosas augas teñan unha boa calidade e a día de hoxe non se fixo nada ao respecto” Recordou a voceira municipal.

En definitiva, os socialistas celebran que unha medida que foi proposta polo seu grupo municipal se leve a cabo, aínda que reprochan a Llovo que pretenda levarse algún mérito cando a idea non foi dela, e o traballo foi do equipo de traballadores do Concello. Apuntou Tania García que “se Llovo é unha concelleira liberada, pero as ideas poñémolas nos e o traballo o poñen os funcionarios, é posible concluír que so lle pagamos para sair na foto a criticar aos que aportamos cousas”.

Tania García recrimina a Fole que continúe a ofrecer un carrusel de excusas para xustificar a súa incapacidade

A voceira socialista considera “fora de lugar” que Fole pretenda xustificar a súa política fiscal e impositiva culpando ás personas que non teñen recursos para pagar tasas e impostos, e agarda que esto non supoña o aviso para iniciar procesos de embargos

García pregúntase que ocorría con estos casos nos dous anteriores orzamentos de Fole

Vilagarcía de Arousa, 19 de decembro de 2013.- O Partido Socialista de Vilagarcía, a través da súa voceira municipal Tania García Sanmartín, acusou hoxe ao Alcalde de Vilagarcía, Tomás Fole, de “continuar a ofrecer un carrusel de excusas para xustificar a súa propia incapacidade”, con respecto á xestión municipal. García Sanmartín considera que Fole “está máis preocupado de buscar desculpas que de dar respostas. Así o fixo cando pasou dous anos chorando porque as arcas do Concello supostamente estaban baleiras, pero resulta que esas xestións de anteriores Gobernos que el utilizaba como excusa deixaron libres mais de 600.000€ que agora se utilizarán para investimentos, como o propio equipo de goberno tivo que recoñecer”.

 As argumentacións públicas feitas por Tomás Fole sobre a repercusión que os índices de morosidade teñen nas contas actuais do Concello non soamente non convencen aos socialistas, senón que as consideran “inapropiadas”. Dende o PSdeG exponen, en primeiro lugar, que os impagos en tasas e impostos que xeneran a morosidade veñen dados pola situación de dificultade dos veciños e familias que non poden afrontar os pagos. En segundo lugar, os socialistas apuntan aos orzamentos dos anos que leva gobernando Tomás Fole e pregúntanse por qué non levou a pleno esta cuestión se tan preocupante era para o Alcalde, e García Sanmartín non deixa de preguntarse “¿acaso é que nestes dous anos non se produciu ningún impago que vaia repercutir nos orzamentos da vindeira lexislatura?”. O que si asegurou Tania García é que “na vindeira lexislatura, os socialistas non utilizaremos estas estratexias da confusión e das herdanzas. Os gobernos deben buscar solucións, non excusas, e a eso nos adicaremos.”

Dende o PSdeG, sen embargo, manifestan sentirse preocupados “atendendo aos precedentes e ás maneiras de gobernar de Fole”, porque todo parece apuntar a que o Alcalde está preparando o terreo para xustificar a esixencia de cobro ás familias e veciños que non teñen recursos para facer frente aos pagos. “A morosidade, na maioría dos casos, dase por dificultades para afrontar pagos de determinadas tasas e impostos. Os recentes anos de crise, especialmente, están deixando un amplo índice de morosidade coas administración que provén de familias con poucos recursos”. García Sanmartín apuntou que “un Alcalde que sube indiscriminadamente impostos como o IBI, sen atender a razóns sociais, semella non estar sensibilizado coas dificultades que os veciños están a pasar”, e por iso os socialistas temen que o Goberno Local poida pretender recaudar as débedas, o que levaría a embargos a persoas que xa non teñen moito. “Confiamos en que non den ese paso”, afirmou con preocupación Tania García.

Finalmente, dende as filas socialistas lembran que esta problemática da morosidade xa foi tentada de abordar polo seu grupo municipal con varias iniciativas. Os socialistas presentaron ao Pleno unha moción para que se fraccionaran os pagos de distintas tasas e impostos municipais, o que contribuiría a diminuir a morosidad por facilitar os métodos de pago, pero o Goberno Local a rexeitou e votou en contra. Tamén lembran que solicitaron en anteriores plenos municipais un informe de morosidade ao Goberno Local. García láiase de que non recibiran aínda ningunha resposta. 

Alegacións presentadas polo Grupo Municipal do PSdeG-PSOE ás Ordenanzas Fiscais.

ALEGACIÓNS:

• Conxelación de todos impostos, taxas e prezos públicos. Non aplicación da subida do 1,8%
• Bonificación do 3% en todos os impostos, taxas e prezos públicos por domiciliación bancaria

• Ordenanza Fiscal nº I.2 Reguladoras do Imposto sobre Bens Inmobles:
• Taxa impositiva do 0,52%
• Bonificacións do 50% a unidades familiares cuns ingresos per cápita sexan inferiores ao SMI do ano en curso
• Bonificacións do 100% a unidades familiares cuns ingresos per cápita sexan inferiores á metade do SMI do ano en curso
• FAMILIAS NUMEROSAS, bonificación do 90% da cota íntegra do imposto os suxeitos pasivos (pai, nai ou titor) titulares de familia numerosa, relativa á vivenda que constitúa a residencia habitual da familia, sempre e cando cumpran coas seguintes condicións:

a)     Contar con ingresos netos per cápita, no exercicio da solicitude, inferiores ao SMI do ano en curso

b)    Que a súa residencia habitual sexa vivenda de protección oficial e non dispoña de máis bens ou propiedades urbanas.

o   Tratándose de inmobles de uso residencial que se atopen desocupados con carácter permanente, por cumprir as condicións que se determinen regulamentariamente, esixirase un recargo sobre a cota líquida do imposto dun 50%. O recargo devengarase o 31 de decembro e liquidarase anualmente polo Concello, unha vez contrastada a desocupación do inmoble, xuntamente co acto administrativo polo que aquela sexa declarada.

• Ordenanza Fiscal nº I.5 Reguladora do Imposto sobre Vehículos de Tracción Mecánica:

Incremento dun 15% nos vehículos de 16 hasta 19,99 cabalos fiscais

Incremento dun 25% nos vehículos de 20 ou máis cabalos fiscais

• Ordenanza Fiscal nº III.4 Reguladora do prezo público pola utilización da Escola Municipal de Música:

Bonificacións do 50% a unidades familiares cuns ingresos per cápita sexan inferiores ao SMI do ano en curso

O PSdeG denuncia que os orzamentos son a constatación de que Fole pretende facer a súa campaña electoral a costa de sangrar ás familias

Os socialistas critican a constante suba de tasas e impostos en dous anos, sen melloras nos servicios, para que agora aparezan fondos para investir por arte de maxia

O recorte en axudas ás entidades sociais que están sendo os que sosteñen ás familias ante a desidia da administración, merece o voto en contra que xa anunciou Tania García

Vilagarcía de Arousa, 25 de novembro de 2013.- Tania García, voceira municipal do Partido Socialista de Vilagarcía, anunciou hoxe o voto negativo do seu grupo municipal no vindeiro pleno aos orzamentos do Concello. Os socialistas votarán en contra da proposta do Goberno Local porque, segundo argumentou García Sanmartín, “hai que ter moito estómago para facer algo que non sexa rexeitalos”.

A voceira socialista desgranou as liñas básicas do orzamento, e deixou en evidencia que “Fole pretende facer a súa campaña electoral do intento de relección a base de sangrar ás familias e aos que máis o necesitan”. Tania García apoia esta afirmación no feito constatable de que “durante dous anos os veciños e veciñas de Vilagarcía vimos sufrindo subas inmisericordes de taxas e impostos, sen que iso repercutirá nunha mellora dos servizos. Agora, sen embargo, e a pesares dos terribles e duros augurios que Fole non deixou de lanzar, resulta que comezan a aparecer fondos para investimentos por arte de maxia”. García Sanmartín considera “unha evidencia” que a situación “nunca estivo como Fole a dibuxou, e se alarmou foi para xustificar unhas medidas durísimas das que agora vemos o resultado: facer caixa para ter diñeiro para investir a medida que se acerquen as eleccións”. “Debería de preocuparse menos por iso, porque intente o que intente xa lle adianto que o seu Goberno ten punto final no 2015”, concluiu.

Dende o PSdeG consideran que nesta proposta de orzamentos, ademáis da percepción de que as familias estiveron pagando para que Fole faga a súa campaña, hai cuestións que non poden ser aceptables. Principalmente, os socialistas consideran “inaceptable” que se recorten sustancialmente as axudas a ONGs e colectivos de acción social, pois “son os que están servindo de red ante as grandes dificultades que pasan moitas persoas”. Os representantes socialistas creen que é posible asumir a falta de certos investimentos se iso repercute en reforzar a acción que levan a cabo entidades sociais que axudan aos desfavorecidos ou ás que apoian a colectivos con necesidades especiais. Tania García sinalou que no eido social, “a Xunta está a abandoar á súa sorte a moitas organizacións que están, precisamente, facendo o que a propia Xunta debería de facer e non fai”, e por iso considera que “Fole vai polo camiño de Feijóo e Rajoy, e aplica a misma receta”.

Os socialistas anuncian que votarán en contra destes orzamentos no vindeiro pleno, e García Sanmartín explicou que presentarán alegacións no periodo que se abra para tal fin. Descartan dende o PSdeG a presentación de alternativa neste vindeiro pleno, porque a pesares de ter presentado propostas sempre, nunca ninguna delas foi tida en conta polo Goberno Local. “Con vergoña allea lembramos cando eu mesma propuxen aumentar en 70.000€ o apartado de servizos sociais nos últimos orzamentos, e Fole negouse a facelo dicindo que en Vilagarcía non había necesidades. Xa todos sabemos o que ocorreu”, sinalou Tania García apuntando a que meses despois o propio Goberno Local tivo que levar a pleno un aumento da partida para servizos sociais de 70.000€. 

O Partido Socialista considera que a resolución xudicial que revoca a actuación de Tomás Fole na sanción a un empresario de hostelería é “bochornosa” para o Concello

Piden ao Alcalde que reflexione sobre o feito de que “a súa teima persoal de usar a administración como arma contra os que lle caen mal vaille costar cartos aos veciños”

Preguntan que vai ocorrer agora cos locais que acataron e cumpriron unha sanción que agora comproban que era inxusta e arbitraria

Anuncian que insistirán na solicitude de información que, por agora, “o Alcalde non está a facilitar no prazo legal establecido” para saber se houbo falsedade de documentos públicos que puideran ocultar que había máis locais implicados dos que foron sancionados

Vilagarcía de Arousa, 14 de novembro de 2013.- O Partido Socialista de Vilagarcía valorou hoxe a resolución xudicial que foi emitida onte mércores que resolveu revocar a decisión que tomou o Alcalde de Vilagarcía de ditar sanción de 600 euros e peche do negocio durante un mes, contra un empresario de hostalería por causa do incumprimento de horarios na Festa da Auga de 2012. Os socialistas consideran “moi grave” que un xuíz teña que revocar unha decisión desta índole, que segundo a voceira socialista Tania García, “agora se comproba que foi desmedida, errónea no seu procedemento e falta de todo rigor”. Para os socialistas a situación resultante deixa en evidencia a actuación do propio Fole, “quen dirixiu todo este procedemento de maneira personalísima” e que consideran que estivo ao frente do caso “por enemistade persoal”. Así, dende o PSdeG queren chamar á reflexión sobre o feito de que “non se pode utilizar a administración, como se de un sheriff do Antigo Oeste se tratase, para ir contra determinadas persoas por cuestión persoais”, e García aproveitou para apuntar que “as teimas persoais de Fole fan que o Concello, ou sexa todos nos os contribuíntes, teñamos que devolver a sanción, máis os intereses, e pagar as costas do xuizo”. “Os ataques de autoridade de Fole pagámolos todos”, sentenciou.

Mais non quedou aí a crítica sobre o procedemento que fixeron os representantes socialistas. A propia Tania García preguntouse “que vai ocorrer agora cos locais que tamén foron sancionados, cumpriron e pagaron as súas sancións, e agoran comproban que a sanción non se axustaba á legalidade”. Para os socialistas, pechar un negocio nestes tempos merece ser unha decisión “moi meditada e xustificada”, cousa que neste caso non ocurre como ditaminou o xulgado.

Pero por se fora pouco grave esta situación, dende o PSdeG lembran que o xuízo que se levou a cabo deixou tamén moitas sombras de dúbidas sobre a xestión administrativa do procedemento por parte do Alcalde, xa que foi coñecido que houbo ún informe policial do que existen dúas versións distintas. Esta discrepancia podería levar ata o caso de que puidera ter sido manipulado intencionalmente para ser presentado como unha proba falsa, facendo ademáis que algúns locais se viran afectados e outros non pola mesma medida. Estas sospeitas de manipulación de informes e de arbitrariedade nas decisión son “moi perigosas” segundo explicou Tania García, quen indicou que “a información que manexamos é que o informe incluía a moitos máis locais na mesma situación, que incluso poderían chegar a ser máis do dobre dos que se sancionaron finalmente, e o Alcalde decidíu personalmente sancionar só a algúns, aos que lle caían mal, e despois pretendeu ocultalo todo”. Para comprobar esta información, os socialistas exponen que “xa lle pedimos hai uns días a Fole que el mesmo explicara a situación para tranquilidade de todos. Como non o fixo, nós mesmos solicitamos por escrito este informe do que, pasados cinco días, debe sernos entregada unha copia. Como tampouco esto ocorreu, insistiremos na solicitude porque se os documentos que poden aclarar a situación están sendo agochados por Fole, a cousa da que pensar…”, suxeríu a voceira socialista que lembrou que “está obrigado, por lei, a entregar o informe. Lembrámolo para evitar tentacións…”. Os socialistas apuntan que todo este embrollo amosa que a xestión que fixo o bipartito da Festa da Auga 2012 foi “desastrosa”, e que non se pode lexislar “contra” os veciños, senón que debería sentarse a escoitar máis, especialmente aos hostaleiros neste caso.

Os socialistas pedirán explicacións “urxentes e claras” sobre a “gravísima” sospeita de imparcialidade e posible manipulación de documentos oficiais por parte de Tomás Fole

A voceira municipal Tania García solicitará hoxe por escrito copia do informe da policía local do día 16 de agosto de 2012, a partir do que se abren os expedientes sancionadores a varios locais de hostalería.

Suxiren ao Alcalde que faga público dito informe, se é que non ten nada que ocultar

Vilagarcía de Arousa, 8 de outubro de 2013.- O Partido Socialista valorou hoxe como “gravísima” a sospeita que asola ao Goberno Municipal de Vilagarcía de que puideron ser alterados e manipulados informes policiais para xustificar e levar a cabo sancións de maneira arbitraria e deliberada. Os socialistas recollen a información publicada hoxe nos distintos medios de comunicación locais nos que se fai referencia ao xuizo aberto entre o Concello e o propietario dun local de hostalería, a raíz da sanción recibida por este local por supostas irregularidades durante a celebración do Día do Auga do pasado 2012. Esta información desvela que os representantes legais do local hostaleiro presentaron documentación que, presuntamente, evidencia que foi alterado o informe policial que deu pé a que o Alcalde impuxera unha sanción pola que ordenou pechar durante un mes ao citado local. A alteración deste informe suporía a ocultación de información alí incluida, e que desvelaba que non era o único local que estaría na mesma situación, co que se poría en evidencia que, ademáis da gravidade que supón a alteración dun informe, tamén existiría arbitrariedade na decisión para tomala en contra dun local pero non doutros.

A voceira municipal socialista, Tania García, manifestou hoxe a súa intención de personarse hoxe mesmo no Concello para solicitar o devandito informe, e aproveitou para esixir “explicacións urxentes e claras” ao Alcalde Tomás Fole, xa que considerou que falsear documentos oficiais suporía “cruzar a liña máis vermella”. Considera García que debería ser o propio Alcalde o que fixera público o citado informe, para amosar que non hai nada raro e que non ten nada que ocultar. A actitude do Alcalde, sen embargo, non sorprendería de todo aos socialistas, que lembran que xa existiron “certas incongruencias e rarezas” sobre documentación relacionada co mesmo departamento cando se quixo saber quen deu a orde, inédita ata o momento, de identificar co DNI ás persoas que acudían a un pleno municipal. Para García, resulta “sorprendente e bochornoso” que se puidera dar o caso de que “se estivesen falseando documentos oficiais para perxudicar a algúns ao tempo que se presume públicamente de facer a vista gorda para facilitar obras sen licenza en terreos públicos portuarios a outros”.

Dende o Partido Socialista apuntan que “é necesario recuperar o sentido común”, e apuntan a que están “preocupados” pola dirección que está tomando o Goberno de Vilagarcía cando quedan en evidencia “día si e día tamén” actuacións que amosan unha “total falta de criterio e do mínimo sentido da responsabilidade”. Tania García apuntou que “semella existir a conciencia de que as cousas se teñen que facer a golpe de puntos suspensivos, como dixo o propio Goberno Local, e perdeu o sentido da mesura e a normalidade”. E esixíulle ao Alcalde, como máxima autoridade neste municipio, “o exquisito cumprimento das leis  e para todos por igual”. Concluíu.