“Primeiro foron as obras electoralistas, despois os mitins dende o púlpito
e agora a utilización de cartos públicos para costear o seu persoal de campaña”,
sinalou Alberto Varela
Tania García pregúntase “se o rexeitamento de programas como o de
alimentación infantil ou o plan de becas tiñan como obxectivo aforrar cartos
para contratar asesores de prensa en campaña”
Vilagarcía de Arousa, 17 de
marzo de 2015.- O Partido
Socialista de Vilagarcía considera inadmisible e inxustificable a decisión de
Fole de contratar un asesor de prensa con cargo ao erario público a escasos
dous meses da celebración das eleccións municipais. “Despois de catro anos de
inactividade o Sr. Fole sorprende aos cidadáns con obras cun marcado carácter
electoralista, con anuncios dende o púlpito e agora coa contratación dende o
Concello de persoal de prensa destinado a deseñar a súa campaña electoral”,
denunciou o candidato á Alcaldía, Alberto Varela, seguro de que “os cidadáns non
entenderán que con cartos públicos se trate de pagar unha campaña electoral”.
A voceira municipal socialista, Tania García, considera “indigno” este
comportamento, cualificando de “patrañas” as afirmación de Fole durante catro
anos de que non había cartos. “Fole leva repetindo catro anos que non existían
fondos para levar a cabo actuacións imprescindibles para Vilagarcía e agora
pretende financiar a súa campaña cos impostos de todos os cidadáns”, afirmou a
voceira municipal. “Fole debe pedir desculpas á cidadanía de Vilagarcía agora
que se demostra que a finalidade do incremento de impostos como o IBI era
contratar asesores de prensa para un lavado de cara despois de catro anos de
nefasta xestión”.
Neste senso, Tania García recorda que “ademais de subir taxas e impostos,
Fole e seu grupo rexeitaron iniciativas como o programa de alimentación
infantil ou o plan de becas para estudantes baixo o argumento da ausencia de
cartos”. “Despois de catro anos de abandono, tanto dos cidadáns como da cidade,
agora vemos para que gardaba Fole os cartos: para obras en período electoral
sen consultar ao veciños e para aumentar o gasto de persoal de confianza a
menos de dous meses das eleccións”. A voceira municipal tamén engadiu que “Fole
é consciente de que nin con todo o asfalto do mundo, nin co mellor asesor de
prensa posible, volvería a gozar da confianza dos cidadáns, cansados dun
Alcalde instalado na mentira e sen escrúpulos a hora de pagar con cartos do
Concello as súas aspiracións persoais de revalidar a Alcaldía”. “Se Fole
necesita un asesor de prensa para emendar que Vilagarcía leva catro anos sen
Alcalde, que o pague do seu peto o que o contrate o PP, pero que non asuman os
custes uns veciños ignorados e
maltratados durante toda a lexislatura”.
