Tania García e Miro Serén serán os números 3 e 4 da candidatura socialista

O pasado sábado serviu para a presentanción de Tania García e Miro Serén como números 3 e 4 da candidatura que encabezará Modesto Pose nas eleccións municipais 2011. Esta presentación sirve para completar os 4 primeiros postos, despois de que Manuel R. Cuervo xa fora anunciado como número 2 no día anterior.

Modesto Pose fixo as presentacións de ambos, e destacou de Tania García "a súa forza e ilusión, sumadas á valía que ven demostrando tanto como Secretaria Xeral do Partido en Vilagarcía como na súa labor como concelleira nos últimos meses". Añadiu Pose que "Tania aportará a esta lista moito esforzo e traballo, e unha vontade firme de resolver problemas para os veciños". Destacou Modesto Pose que "Tania é coñecida públicamente dende hai pouco, pero a súa labor no partido vense desenvolvendo dende hai moitos anos". Pola súa banda, a Secretaria Xeral e tamén concelleira de Ordeación do Territorio dende a última reordenación do goberno municipal, mostrou a súa "ilusión por representar ao Partido Socialista. Eu son militante xusto despois das eleccións xerais de 2000, na que Aznar obtivo unha maioría absoluta, e fíxenno porque creo neste partido e na valía do modelo socialista para a nosa sociedade".

Modesto Pose tamén destacou a importancia da incorporación de Miro Serén, director do colexio do Piñeiriño, militante do partido e membro da Comisión Executiva Provincial, que "dará á candidatura moito coñecemento, reflexión, rigor e análise". De esta incorporación destacou Pose que "Miro só puxo enriba da mesa unha condición: que a educación xogara un papel fundamental nas políticas dos socialistas os vindeiros 4 anos". Esta versión reafirmouna o propio Miro Serén, que destacou que "a educación é un dos pilares fundamentais da nosa política, e terá un peso específico nestes anos". Froito desta importancia, el mesmo presentou tres plantexamentos que para os socialistas son fundamentais no eido educativo en Vilagarcía e que serán base do seu programa: a ampliación do centro educativo de A Escardia, a xestión para a construcción do novo Colexio de Carril e a ampliación de prazas de gardería pública para nenos de 0-3 anos en Vilagarcía.

Modesto Pose presenta Manuel R. Cuervo como número 2 da candidatura

O pasado venres o candidato do Partido Socialista á Alcaldía de Vilagarcía, Modesto Pose, presentou públicamente a Manuel Rodríguez Cuervo como o seu número 2 na candidatura ás Eleccións Municipais 2011.

Este acto, que contou coa presencia de varios membros da Comisión Executiva Municipal, serviu para que Pose e Cuervo mostraran a súa vontade de traballar arreo para que os socialistas continúen a gobernar Vilagarcía.

Modesto Pose presentou a Manuel R. Cuervo como un "traballador infatigable", que "coñece Vilagarcía, e sobre todo o eido rural, como ninguén na nosa cidade". Pose destacou que "Manuel R. Cuervo é un artífice de que o PSdeG sexa goberno de Vilagarcía, e durante toda a súa carreira política ven traballando para que isto siga sendo así, como así será.

Manuel R. Cuervo, pola súa parte, mostrou toda a súa disposición para "ser un membro máis dun grupo que fará que o Partido Socialista seguirá sendo goberno de Vilagarcía". O concelleiro fixo público hai uns días un escrito no que mostraba a súa disposición a abandonar a política activa. Sen embargo, Cuervo explicou que "a persistencia de Modesto Pose, e o feito de que eu sexa tido en conta de tal manera fíxome reconsiderar a miña postura e aceptar o número 2 da candidatura de Modesto Pose, que será o alcalde de Vilagarcía".

Modesto Pose e a asociación de hosteleiros Ahituvi reúnense para intercambiar impresións sobre as potencialidades e posibilidades de Vilagarcía

 Pose e os representantes dos hosteleiros coinciden na necesidade dunha “visión estratéxica profunda para Vilagarcía”, e na importancia de que ésta viva “ao lado do mar e da comarca, e non de costas e en competición cos Concellos próximos”.

Vilagarcía de Arousa, 24 de febreiro de 2011.- Modesto Pose, candidato do Partido Socialista á Alcaldía de Vilagarcía, acompañado da Secretaria Xeral do PsdeG Tania García e membros da Comisión Executiva Municipal dos socialistas, mantiveron unha xuntanza o pasado mércores a última hora da tarde con directivos e membros de Ahituvi, a Asociación de Hosteleiros e Iniciativas Turísticas de Vilagarcía.

Nun primeiro momento, Pose destacou “a importancia do asociacionismo en todos os sectores, pero de xeito especial na hostelería nun lugar como Vilagarcía por dúas razóns: a nosa vila merece un plantexamento coordinado entre este sector e as institucións públicas, e a importancia de fomentar unha hostelería de calidade, coa que os cidadáns e visitantes síntanse a gusto e poidan desfrutar de todas as oportunidades que Vilagarcía ofrece”. Dende a asociación insistiuse no feito de que este é un proxecto que xa ten moito pulo, que naceu da vontade dos que levan toda a súa vida adicados á hostelería en Vilagarcía e que confían en darlle cada vez máis consistencia para que perdure no tempo.

Nesta xuntanza foron tratados diversos temas que afecten a Vilagarcía, pois como destacaron os hosteleiros, “para nós o fundamental é que Vilagarcía teña actividade. Despois, nós xa faremos o noso esforzo para que os nosos proxectos e pequenas empresas sexan productivas, pero o obxectivo principal é Vilagarcía”. No mesmo senso, Modesto Pose destacou que “a hostelería é un sector que sirve como medida da nosa vila, pois se a hostelería vai ben é que Vilagarcía vai ben, e á inversa”.

Ademáis, serviu este encontro para plantexar as cuestións de maior interese específico para os asociados, como a ordenanza de terrazas, a humanización da cidade, dinamización do eido turístico, etc. Tanto os representantes dos hosteleiros como os membros socialistas coincidiron plenamente na necesidade de que Vilagarcía non avance “de costas á comarca, senón ao lado”, establecendo políticas e iniciativas comúns para potenciar unha visión común da Ría de Arousa, da que Vilagarcía sempre vai sair fortalecidos.

Ante todos estes temas, Modesto Pose expuxo con claridade que “na miña labor como Alcalde de Vilagarcía, todas as cuestións serán tratadas, por riba de todo, con sentido común e atención ás propostas e suxerencias que se fagan”, e terminou expresando a súa “total e aberta colaboración cos hosteleiros para traballar conxuntamente na búsqueda de obxectivos ambiciosos a medio e largo prazo”.

Modesto Pose continúa a súa rolda de xuntanzas cos axentes sociais entrevistándose coa directiva de FECA

O candidato do Partido Socialista á Alcaldía de Vilagarcía trasladou aos empresarios que o aspecto principal do seu programa será a xeración de emprego e consolidación do emprego, para o cual considera fundamental a implicación das asociacións empresariais.

Vilagarcía de Arousa, 23 de febreiro de 2011.- Modesto Pose continuou hoxe coa rolda de contactos que está a manter cos axentes sociais, iniciada a semana pasada coa xuntanza con UGT, sostendo unha entrevista de traballo coa dirección da Federación de Empresarios da Comarca de Arousa. Nesta xuntanza, os empresarios trasladaron a Pose as súas inquedanzas e perspectivas sobre a situación económica e social de Vilagarcía.

O candidato socialista á alcaldía quixo expor aos membros de FECA o seu prioritario interese pola promoción económica e a xeración de actividade empresarial en Vilagarcía, que repercutirá inevitablemente na creación de emprego, aspecto que para Modesto Pose constitúe o principal e absoluto obxectivo nestes tempos. Pose declarou que “é preciso que dende todas as institucións, públicas e privadas, teñamos claro un rumbo común destinado a afrontar as dificultades nas que hoxe en día nos vemos inmersos. O futuro de Vilagarcía pasa por acoller novas iniciativas empresarias e fortalecer o tecido xa existente, de cara a conseguir xerar novo emprego e consolidar o xa existente, obxectivo para o que porei todo o meu empeño.”

Na súa perspectiva como deputado autonómico e secretario provincial de Pontevedra do PSdeG, Modesto Pose apuntou que “a superación dos momentos difíciles xorde da colaboración de todos os axentes sociais e representantes políticos, que temos a responsabilidade de dar resposta ás preocupacións dos cidadáns”. En conclusión, Pose recalcou: “todos estamos no mesmo barco da recuperación económica, e o meu empeño é aunar esforzos de todos para acadar, canto antes, ese obxectivo”.

O candidato socialista á Alcaldía de Vilagarcía, Modesto Pose, inicia unha rolda de contactos cos axentes sociais cunha xuntanza co sindicato UGT

Pose dá prioridade absoluta ao emprego e á actividade económica para o futuro de Vilagarcía.

Vilagarcía de Arousa, 16 de febreiro de 2011.- O recentemente elixido candidato do Partido Socialista á Alcaldía de Vilagarcía, Modesto Pose, inicia estes días unha rolda de reunións cos diferentes axentes sociais de Vilagarcía. Estas xuntanzas teñen a vontade de recoller as inquedanzas, reflexións e aportacións que dende as distintas organizacións e colectivos queren propor para o futuro da nosa vila.

A primeira destas entrevistas produciuse no día de hoxe coa Executiva de UGT, aberta tamén a todos os membros deste sindicato. Para Pose, “os sindicatos son un elemento fundamental da vida social da nosa vila. A súa perspectiva sobre a situación económica global, e a incidencia particular en Vilagarcía, é unha visión necesaria e imprescindible para poder tomar decisións no eido do emprego e a actividade económica”, valorou hoxe mesmo o candidato socialista.

Como xa sinalou en diferentes ocasións, Modesto Pose terá como eixo principal da campaña o emprego e a xeración de oportunidades para os vilagarciáns. A pesares de non ser os concellos quenes teñen competencias neste senso, senón a Xunta de Galicia, Pose quere centrar aquí a meirande parte do seu esforzo. “O fomento do emprego e de posibles novas posibilidades en Vilagarcía que xeren riqueza, activen a economía e reforcen o noso entramado social e empresarial ten que ser, e vai ser, o eixo principal das nosas propostas”, declarou.

O candidato socialista á Alcaldía, Modesto Pose, continuará este proceso que iniciou no día de onte, solicitando xuntanzas similares coas outras centrais sindicais, así como outros axentes sociais e colectivos e asociacións vilagarcianas, durante as vindeiras datas.

Modesto Pose proclamado candidato do PSdeG á Alcaldía de Vilagarcía

A Asemblea de militantes da agrupación de Vilagarcía, reunida de forma extraordinaria onte martes na sede da rúa Castelao, ratificou a proposta da Comisión Executiva de propor a Modesto Pose como candidato do partido á Alcaldía de Vilagarcía. Os militantes de Vilagarcía ratificaron a Pose como candidato con un 80% dos votos a favor, tras unha das asembleas máis multitudinarias que se recordan na agrupación.

Modesto Pose é a proposta que a Comisión Executiva fixo aos militantes, e que a Secretaria Xeral encargouse de ofrecer aos compañeiros, facendo un percorrido polas circunstancias que rodearon á renuncia do anterior candidato Carlos Guerrero, e expoñendo as razóns polas que a Executiva fixo esta proposta. Na súa intervención Tania García dixo que "Modesto Pose é un gran candidato, e será un gran alcalde". "Esta executiva trae aquí unha proposta a esta agrupación porque é a súa responsabilidade, e consideramos, tras un profundo e pausado debate, que traemos aquí a mellor proposta posible", insistiu. De forma breve, a Secretaria Xeral fixo un percorrido pola vida política de Modesto Pose, dende a súa militancia no partido na clandestinidade ata a súa situación agora como Deputado por Arousa no Parlamento de Galicia e a súa labor como Secretario Xeral da Provincia de Pontevedra, pasando pola súa experiencia municipal como concelleiro na súa vila natal de Malpica.

Modesto Pose recolleu a testemuña da Secretaria Xeral, e lembrou o proceso que levaron á celebración desta asemblea. Despois, nun discurso moi potente e ilusionador, Modesto deixou ben claro que "eu preséntome ás eleccións para gañar" e non dubidou en afirmar que "o Partido Socialista vai seguir gobernando Vilagarcía nos vindeiros catro anos. Algúns van ter que mercar un bo taco de papel, xa que os que están poñendo carteis de 104 días que faltan para o 22 de maio, dende ese día van ter que poñer 1457 máis que son os días que faltarán para as seguintes eleccións municipais". O candidato plantexou algunhas liñas básicas do que será o seu programa, que estará centrado na xeración de emprego, a pesares de que "non son os concellos, senón a Xunta, quen ten as competencias para implementar actuacións dirixidas a xerar empleo. Pero nós non podemos quedarnos sen facer nada, coma outros". Tamén arremeteu contra a xestión autonómica en sanidade, eido que coñece perfectamente pola súa condición de médico e portavoz socialista da Comisión de Sanidade, xa que "algúns non creen que Vilagarcía mereza un centro de atención primaria de calidade. Nós pelexaremos por él."

Tras as intervencións dos compañeiros que quixeron falar, a votación ofreceu o resultado de masivo apoio ao candidato que aproveitou unhas últimas verbas para agradecer o apoio e invitar a todos a traballar arreo para conquerir a tan desexada victoria o 22 de maio nas furnas.

Comunicado de Prensa: Os socialistas invitan a J.J. Durán a presentarse as eleccións en Vilagarcía

O PsdeG de Vilagarcía invita a Durán a presentarse en Vilagarcía para adquirir a lexitimidade para opinar sobre política local

Está máis preocupado do Partido Socialista de Vilagarcía que de desenvolver o seu traballo. Valorando a súa actuación na Deputación, semella que Durán considera as campañas fanse comprando vontades.

Ante as declaracións públicas feitas dende o PP da provincia de Pontevedra, na voz de José Juan Durán, que atinxen a cuestións de Vilagarcía, e particularmente do PsdeG, este Partido Socialista quere transmitir a súa sorpresa pola aparición tan alegre do señor Durán en canto as súas aspiracións políticas e electoralistas se refire.

En primeiro lugar, Durán debería aclarar el mesmo onde se vai presentar nas vindeiras eleccións, xa que por todos é sabido que nin vive nin exerce en Vilanova, vila na que foi elexido concelleiro, e que as súas relacións co PP vilanovés non son as máis idóneas. Quizáis as súas frecuentes opinións sobre Vilagarcía sexan xustificadas porque está a interesarse polo seu futuro político nesta vila, e formar parte da lista electoral do PP vilagarcián está entre os seus proxectos próximos. Esa sería a decisión que mostraría, na realidade, se José Juan Durán ten a lexitimidade para falar de Vilagarcía.  

Por outro lado, o señor Durán o que debe de explicar é a súa xestión pública. Dende a súa responsabilidade na Deputación, en vez de falar constantemente dos demáis, debería de presentar o balance das súas actuacións e as explicacións de todas elas. Os cidadáns están interesados en saber qué ocorre cos 14 millóns de euros que o seu superior, Rafael Louzán, gardou para libre disposición dentro do garrafal Plan Anticrise provincial. Tamén a cidadanía quere saber se o señor Durán, ou a Deputación, teñen algunha idea máis para a provincia que non sexa facer campos de fútbol, que sempre fan as mesmas empresas, e que están moi ben pero non de herba (artifical) comen as persoas. Por suposto, estamos esperando xustificación da medida anticrise que a Deputación tomou, contratando a 600 persoas na provincia, sen proceso de selección sen criterios previos e sen obxectivo específico definido, e dos que seguramente poderemos adiviñar que, casualmente, farán un traballo moi intenso para o seu partido político nas vindeiras eleccións municipais. Dende o Partido Socialista consideramos que certas actuacións están fora da ética, e mostran que a conciencia do señor Durán pasa por tentar de comprar calquera cousa con cartos, públicos claro.

Por todo esto, esperamos que o señor Durán aclare primeiro as súas sombras, que son moitas, busque os apoios dentro do seu propio partido (se os ten), e despois adquira a lexitimidade necesaria, por exemplo presentándose as eleccións das vilas sobre as que opina incesantemente. Dende o Partido Socialista seguiremos facendo traballo para propoñer ideas e desenvolver os proxectos que consideramos mellor para os cidadáns. Confiamos en que iso será un bo camiño para revalidar a Alcaldía de Vilagarcía, con Modesto Pose, e gañar a Deputación de Pontevedra.

Saúdos

Comisión Executiva Municipal de Vilagarcía