Os
socialistas ofrécense ao Goberno Municipal para realizar o procedemento para
salvagardar a ponte e evitar a demolición que pretende a Xunta de Galicia
Fole
xa evitou pronunciarse a favor de protexer a ponte en abril de 2011, e mantén
agora unha indefinición inaceptable
Vilagarcía
de Arousa, 16 de agosto de 2012.- A ponte de Vista Alegre
sobre o río do Con volve a estar de actualidade en Vilagarcía, a partir da xa
coñecida intención da Xunta de Galicia, a través de Augas de Galicia, de derruir
esta ponte como posible solución para evitar as riadas en Vilagarcía producidas
polo desborde do Con.
A posición da Xunta de Galicia conta
cun rexeitamento frontal dunha gran maioría social cidadá dos veciños de
Vilagarcía. Sen embargo, e como tristemente ven sendo habitual en calquera
cuestión nos últimos tempos, o Goberno Local está a dar bandazos sen esclarecer
unha opinión firme e concreta sobre o tema.
O Partido Socialista mantén unha
firme posición sobre esta cuestión. A ponte de Vista Alegre de ningunha maneira
pode ser derruída, xa que non é a causante principal dos problemas das riadas
como é sinalado. Os socialistas apostan, como así fixeron xa na campaña
electoral municipal de 2011, en que as principais accións necesarias no río do
Con son a súa limpeza continua e constante, para evitar acumulación de lixo e
terra, e a liberación da súa desembocadura ao mar. Para iso, os socialistas apostaban
xa daquela pola apertura da desembocadura a ceo aberto, aproveitando a
finalización en 2013 da concesión da nave comercial instalada nese punto. Co
traslado a outras dependencias portuarias desa nave, permitiríase abrir
totalmente a saída do río ao mar mantendo unha ponte axeitada para o paso de
vehículos e peóns pero con moito maior marxe para o caudal do río, que hoxe en
día atórase con gran facilidade. Esta situación, sumada aos momentos de marea
chea, contribúe a producir perigos de inundación e aí se sitúa o gran problema
do desborde do río do Con.
Xa durante o período de Goberno
anterior os socialistas presentaron no pleno de abril de 2011 unha moción ao
pleno municipal para incluír a ponte de Vista Alegre no conxunto histórico –
arquitectónico de bens a conservar conformado polo pazo, a muralla e outros
elementos do entorno. Esta moción permitiría garantir a protección da ponte
para evitar a intervención que pretendía a Xunta do PP. Como era de esperar o
PP local de Tomás Fole abstívose en tal votación, amosando que a súa postura
sobre o tema xa era opaca naquel momento, como o segue a ser hoxe.
Actualmente o Alcalde Tomás Fole
segue a pretender pasar de puntas polo tema, sen ter ningunha capacidade de
decisión, e mentres ningún grupo político da oposición de Vilagarcía foi
consultado ou informado de ningunha opinión do Goberno, o Alcalde tenta de
resolver a situación a golpe de titular mediático, como sempre, pretendendo
contentar ao primeiro que lle pase pola porta ou que lle reclame algunha
cuestión nos medios de comunicación.
Os socialistas reclaman ao Alcalde
Fole que tome unha postura sobre o tema, que aclare se o Goberno Local vai
defender a ponte con todos os seus medios e impedindo a intervención da Xunta
de Galicia, ou se vai limitar a referirse a obviedades sobre a responsabilidade
da dirección xeral de Patrimonio pretendendo dicir todo e logo non dicir nada.
Os antecedentes amosan que o Goberno Local non se caracteriza precisamente pola
súa capacidade de decisión e a súa firmeza nas posicións, polo que o grupo
municipal socialista volve a estar a disposición do Alcalde, e xa van moitas
veces, para resolver este problema tomando as decisións necesarias para evitar
unha inaceptable intervención que destruiría unha referencia histórica e
cultural fundamental para Vilagarcía.
No hay comentarios:
Publicar un comentario