Un decreto
autonómico aprobado en xuño atribúe a responsabilidade do problema aos
Concellos, sen que ninguén en Vilagarcía traballe nunha solución
Vilagarcía de Arousa, 31 de agosto de 2012.- A aparición de
cabalos libres de control nestes últimos días en Castrogudín, situación que
tamén ocorreu en Bamio recentemente aínda que con menos consecuencias
negativas, vén a mostrar unha vez máis a existencia dun problema por mor dos
incontrolables danos que producen nas fincas e propiedades dos veciños. O
descontrol co que estes animais campan polas leiras dos veciños de Castrogudín
xa vén sendo motivo de queixa dende hai tempo, e tamén o é o desamparo ao que
se ven abocados polo desentendemento manifesto que o Concello de Vilagarcía ven
amosando.
Xa no pasado
mes de outubro, o grupo municipal socialista no Concello de Vilagarcía levou a
pleno unha moción referida ao gando mostrenco en liberdade e a necesidade de
controlar e identificar a estes animais, destacando xa naquel momento os graves
danos que preocupan aos veciños. Esta moción foi aprobada por unanimidade, pero
semella que o Concello non tivo a ben traballar no senso de resolver o
problema: determinar a propiedade dos cabalos, obrigar aos propietarios a
identificar aos animais a través dun microchip e xestionar que estes
propietarios se fagan cargo da reparación de propiedades e perdas económicas
derivadas da irrupción do gando nas leiras privadas.
O decreto
142/2012 do 14 de xuño polo que se establecen as normas de identificación e
ordenación zoosanitaria dos animais equinos en Galicia indica (adxúntase), no
seu artigo 25 e 26 (páx. 26980), que no caso de darse unha situación como a que
se ven dando en Castrogudín ou a sinalada en Bamio, “a autoridade municipal
competente (…) ordeará a captura, traslado, mantemento e custodia dos équidos
nunca área habilitada para tal fin”.
No hay comentarios:
Publicar un comentario