A dirección socialista considera que os
resultados obtidos lexitiman todas as posibilidades que Varela e o seu equipo
estimen
Acordouse convocar unha asemblea
extraordinaria para o martes 9 de xuño
Vilagarcía de Arousa, 28 de
maio de 2015.- A comisión
executiva municipal do PSdeG de Vilagarcía celebrou onte a súa primeira
xuntanza despois das eleccións municipais, e fíxoo para facer unha valoración
dos resultados obtidos así como dos vindeiros pasos a dar unha vez definido o
vindeiro pleno municipal. A dirección dos socialistas en Vilagarcía valorou de
maneira extraordinariamente positiva os resultados obtidos pola formación nas
eleccións do pasado domingo, e incidiron na importancia que tivo neste
resultado tanto o proxecto e a candidatura presentada como o traballo
desenvolvido polo grupo municipal socialista nesta pasada lexislatura. Dende o
PSdeG consideraron que se abre un tempo novo e que é preciso estar á altura do
que os cidadáns decidiron, que segundo a interpretación dos membros da
executiva local é un goberno municipal próximo, cercano, dialogante e que formule
con firmeza os retos da Vilagarcía actual e de futuro.
Acerca das relación cos outros grupos municipais, á vista dos resultados
obtidos o domingo, a dirección socialista avalou as intencións de Alberto
Varela, que despois das eleccións manifestou en varias ocasións a súa intención
de iniciar contactos cos demais grupos que obtiveron representación no pleno.
Varela, que tomou parte na xuntanza, explicou a súa intención de coñecer de
primeira man as opinións e ideas que os demais grupos teñen sobre o seu papel
na vindeira corporación. A executiva municipal do PSdeG avalou esta iniciativa
e acordou unanimemente que o grupo socialista electo, con Varela ao fronte,
teñen todo o apoio para definir nos próximos días ata o pleno de investidura a
liña de diálogo que consideren máis apropiada. Na xuntanza concordouse que os
resultados lexitiman calquera das posibilidades abertas para a votación de
investidura do Alcalde e a conformación do vindeiro grupo municipal, sempre que
sexan nunha liña de acción de esquerdas e progresista para Vilagarcía.
A executiva socialista acordou tamén celebrar o vindeiro martes día 9 unha
asemblea extraordinaria de valoración dos resultados, para a que convocarán a
toda a militancia e na que calquera afiliado poderá abordar a situación
resultante.
No hay comentarios:
Publicar un comentario