Varela
plantexou a dobre visión do deporte como ferramenta de ocio e formación integral,
especialmente nos nenos e nenas, e o seu valor turístico e de impacto económico
Os
clubes amosaron a súa dispoñibilidade para colaborar máis nunha reorganización
da Fundación de Deportes con maior participación
Vilagarcía de Arousa, 21 de abril de 2015.- Alberto Varela mantivo
na tarde-noite de onte unha xuntanza con clubes deportivos e usuarios das
instalacións de Vilagarcía, na que debateron sobre as propostas que os
socialistas presentan a estas vindeiras eleccións municipais, e avanzaron sobre
ideas de futuro para a reorganización e mellora da política deportiva de
Vilagarcía.
O candidato socialista iniciou a
xuntanza expoñendo a idea da concepción dual do deporte, ao igual que no eido cultural,
que aspira a unha dobre función. Por unha banda está a vertente dirixida ao
ocio e vida saudable, onde Varela Paz incidíu na importancia especial no
traballo con nenos e nenas, dado o carácter formativo do deporte. Varela
lembrou que “eu levo practicando deporte dende que era moi pequeno, e realmente
valoro moito as cousas que aprendín grazas ao deporte. Creo que debemos
potenciar a labor formativa en valores”. Orientado a esta función, Varela
resaltou a importancia de manter as instalacións de maneira adecuada pois
“incluso dende un punto de vista económico, o máis eficiente é manter ben o que
xa é propio”. Alberto Varela lembrou a figura de Adolfo Pedrido, concelleiro
socialista no primeiro goberno democrático que “xa en 1979 apostaba pola cidade
deportiva en Fontecarmoa”, e defendeu o valor das instalacións deportivas que,
baixo o seu criterio “son mellorables, pero constitúen un innegable valor que
durante anos se foi construíndo. Temos unhas boas instalacións, hai que saber
utilizalas e agora esto non está a ocorrer”.
Destacando a labor dos clubes,
Varela apuntou que cree no modelo participativo, no que a Fundación de Deportes
funcionou correctamente durante moito tempo e axudou a consolidar unha
estrutura deportiva “envexada por outros Concellos”. “Mais o Concello non pode
vivir aproveitándose do labor dos clubes, senón que ten que ter unha labor
coordinadora, de dirección técnica e deportiva sobre os obxectivos estratéxicos
e comúns. Esto agora non ocorre e dende a concellería de Deportes funciónase de
maneira pasiva e aletargada”. A xuntanza permtíu un debate aberto de ideas no
que Varela afirmou constatar que “nen sequera existe contacto real entre as
persoas que dirixen a política deportiva de Vilagarcía e os clubes. As persoas
á fronte dos órganos deportivos teñen que estar apegados aos clubes e visitando
as instalacións, con persoal técnico que coñeza as súas dinámicas e realidades.
Houbo bos exemplos no pasado, agora non ocorre”.
Por outra banda, Varela destacou
o valor que o deporte ten como sector de impacto económico para Vilagarcía. A
importancia que adquiren as competicións deportivas, e apuntou Varela á última Semana
santa que acolleu varios eventos, necesita que “tomemos este eido coa
importancia que merece. O impacto económico nunha cidade de servizos como
Vilagarcía é fundamental. Debemos esforzarnos por estar á altura como Concello,
para facilitar e planificar correctamente a organización de eventos ao longo do
ano”. O candidato socialista amosou a súa absoluta dispoñibilidade para
promover e apoiar a celebración de actividades que atraian visitantes, o que
apuntou que é “un eixo clave da nosa visión estratéxica da Vilagarcía do
presente e do futuro”, e por iso comprometeu ante os presentes a súa dedicación
a sacar adiante os proxectos que se presenten neste sentido, e a tratar de
alimentar estas posibilidades no futuro.
No hay comentarios:
Publicar un comentario